PRESS RELEASE

NO.109/2022

By: Puhpa HC. Lalmalsawma Zasai

Deputy Chief Executive Member

Mara Autonomous District Council, Siaha

“Ahmiatuata atanoh târi Noh 5 Thlarâh, 2022 miah tlôkheituhpa eima Khazohpa hnohta alynabie reih na ta, eima râh achuna Primary School tawhta College taihta Pachutuhpazy nata Marapa râh zawpi zydua hnohta Samaw ei cha hlâ chyu ei.”

“Eima pahno chyupa hawhta Pachutuhpa zy maophaona he â sâh ngaita kaw. Chhâ avaw y lymâ awpa liata Râh nata Phopi hmahsiena a tlôkheituh chaipa châ ei ta. He vâna he ta, Sawhkhâ chhaota ama raihria peimawh zie nata sôhzie pahnopa ta amo palyupalihna châta TEACHERS’ Day he Kô1962 tawhta a vaw hmâh pathao.”

“India Vice President hmiatuachaipa nata Prime Minister panona Dr. Sarvepalli Radhakrishnan pih Noh Târi 5 Thlarâh he Teachers’ Day châta hmâpa a châ. Achhâpa cha ano he chysa rôhnapa nata châthaipa a châpa vâta a châ.”

“Eima Râh liata College Sâkha hnei pi ta, Higher Secondary nata High School chhao vâro eima hnei ha bâ. MADC ry liata Primary Schools-113 nata Middle Schools-24 eima hnei hai. State Sawhkhâ ry liata Middle Schools 26 zy chhao eima biehneina liata thlaita y awpata hmahla haipa a châ hra.”

“School nata College zy, Private School nata Awnanopa ta a mohôh haipa school liata ahriatuhpa Faculty members, Teachers nata Non-Teaching Staff zydua he eima Râh aboh nawpa liata maophaotuhpa châ ei chi ta, achuhaipazy thaina nata pahnona piepa hleikhô ta hrozie dopa lâthlôh liata achhithatuhpa nama châ. Nama zydua tiamana nata apiepasana liata eima râh duahmo awpa he â pahnieh tahpa nama my lei awpa ei khoh kaw.”

“Nelson Mandela ta cha ‘Khizaw panano thei awpa chariah chhaichhi pha chaipa cha Achuna hena a ch’ a tah. Atanoh eima râh duasu kho âkhileina zydua chhao he ataopathi theituhpa cha Pachutuhpazy nama châ tahpa a sia ngaita kaw.”

“Atakô Independence Day liata State Best Teacher Award adaotuhpa Puhpa Lalropuia Chinzah, Govt Higher Secondary School Siaha, nata District Best Teacher Award adaotuhpa Puhpa R. Israel Chozah (Middle School Teacher) nata Puhpa K. Sachai (Primary School Teacher) zy hnohta alynabie reih na ta, ama hmialâ daihti châta khokheina ei hlâ chyu ei.”

“Eima râh Elementary School zy liata rairuna hluhpi atyh hai pi ta, School-O taopathi awpa zy, pachutuhpa akhileina zy nata hmo hropa hluhpi zy he eima Budget ta â khileipa vâta taothei mâh hra v’ei sih la, Official lâ tawhta eima theina hawhta hma vaw la hra aw pi ta, Pachutuhpa adaihleina zy chhao thlaita pabie awpa eimâ chhuah.”

“State Sawhkhâ nata NEC zy chhao adaoh pi ta, hlaotlohna hmô awpa chhao eima hnabeiseih kaw. Samagra Shiksha nata eima hrialâhna chhao aphaviapa nata phahnai viapa ta eima sie thei nawpa ta aryhna (Agreement ) eima tao khei hra.”

“Eima râh liata achuna hmah pasiesa via lymâ awpata Pachuhtuhpazy ta, tiama papua via lymâ u la, nôchâ hrozie liata hawti zy amopâtlâh châ awpa ta hro achhuah chyu awpa ta cha pasyu khoh ei na ta, zawpizy chhaota Pachutuhpazy he za ama chhina hawhta za thaita, palyupalih thai awpa ta ei châ haw chyu ei.”

“Mararâh Education he phakawpa ta a sie thei nawpata eima hyutuhpa hmiatuahpazy hria pasana nata phahnai ngiahna vâta Marapa sawzy ta thata hmasiena hmô pi ta, “Mizoram Public Service Commission tawhta result a puapa he Marapa saw a hlao leipa ta papua thei khao vei ei” ei ta tyh. Cha cha eima Teachers nata eima râh Nôpaw hmiatuapazy hriapasana vâta châta, ama chô liata eimâ ly hmeiseih. Cha ama hriapasana cha pazao ta, a paw papawsa rili awpa he eima maophaona a châ tahpa pahno na chô ta School Education Department, MADC chhao ta eima theihna rakha liata hma eima la lai lymâ hra.”

“Mararâh Education ta hmah sie tah, quality education sa papua awpata Village Council nahzy, NGOs nah zydua chahrua ei na ta, eima zydua ta hriah khohna pha kawpa hneipa ta eima vaih nata khih chyu liata Education châta tha thyu chyu awpa ta ei cha hrua hmeiseih ei.”

“Mararâh pachuhtuhpa zydua zana nata khokheina sâh chaipa ei cha hlâ ei.”

“Ei châly kaw ei.”

ISSUED BY:

Information & Publicity Department

Mara Autonomous District Council

Siaha.