PRESS RELEASE

NO. 70/2023

 

SIAHA, 29 Pachawh, 2023, Pachynoh - Atanoh dawh 12:00 Noon pa ta MADC Golden Jubilee (1972-2022) Closing function ahmâpa liata Chief Guest Puhpa M. Laikaw, Hon’ble CEM, MADC biereipa ary liata palâsapa a châ:

 

Ti nata râh châta ei chakaolâhpa; Hon’ble Chairman, Elected Office Holders, Staffs nata eima nôpaw hmiatuapazy, he liata avy theipa nata Online ta maniah avaw hlao theipa zydua alyna bie cha reih ei na ta, MADC Kô 50 a tlohna Golden Jubilee Celebration Closing Ceremony 2023 hmâh thei awpa ta byhnâ maniah pietuhpa eima Khazohpa moh ta nama zydua ta MADC Golden Jubilee anaohna Samaw ei chahlâ ei.

 

Ahy hriapasana nata novâhna tlyma, siana nata thai-sona vâta châ leipa ta Abeipa eima Khazohpa saiheina nata kyhpachâna vâ deita Chi nata Pho ta reipa Marasawzy ta kô hluhpi byhnâ thata dao lymâpa ta, ryureina eihhrâhpa, he MADC chhao he ahneipa eima châ tah lei thei va na. Arôhna ngaita.

 

Atanoh he, Marasawzy ta ‘Eima Râh’ tah thei awpa ta ryureina no eihhrâhpa Mara Autonomous District Council eima hnei theina chhâpa he eima my lei awpa nata pachâpasia awpa hluhpi deikua a y.

 

Abeipa ta Missionary Revd.R. A Lorrain nata a chhôhkhazy maniah kaw tuapa ta thâtihpha ta maniah pakhaihsa ta, byhnâ hluhpi a daopa eima châ. Mara râh nôpaw hmiatuapazy hmahlana nata hriapasana zydua chhao my thei rimâ awpa châ mapi. Eima Missionary nahzy deichhyna nata paso pakâna vâta Mara Beizy siepahliepa ta ryureina eih hrâhpa hnei awpa ta vaw hiah ei ta, cha zawhzi ta atanoh, he duahmo liata avaw duah theipa eima châ. Chavâta atanoh, he Ryureina eih hrâhpa eima hmô thei n’awpa ta thaby maniah pathaopatuhpa zydua nata Autonomous District Council eima hnei thei n’awpa ta P.L Regional Council daihti no ta ama Sawhkhâ rai chhao bâhsai ngȃhpa ta Boycott pa nah zydua thokha vaw y tlâ khao hravei ei sala, Zana nata palyupalihna ei hlâ ei.

 

Thâtih alaichadai thaipazy reizie liata cha Marapazy he atahmâ ta eima pahrâhna tih nata râh he Kô zabi 17 na (17th Century) rachhôh tawhna khata avaw pahrâpa hawhta reipa a châ. Chatana chata ti nata râh hneipa ta, ahy ryureina nata biehneina ry lia hmahta y beih leipa ta, Abei no eihpa hnei chyupa ta sasyh ta ryu areihpa Chi nata Pho eima châ.

 

Hlâno ta cha Marapazy pi he eima chheipâh liata pho hropazy ta moh nano nanopa maniah bi tyh ei ta; Lushei/Mizo phozy ta “Lakher” maniah tah ei ta, Khumi nata Arakanese nazy ta “Shendus/Shindus” maniah ama tah tyh hra. Hakas nazy ta “Miram” maniah tah hra ei ta, keimo deikua ta cha atanoh taihta Marapa eima châpa vâta Mara a tahpi ta, cha cha eima châna dopa a châ hra.

 

He hawhta eima chheipâh liata British sawhkhâ ta a vaw vao tuapa chi nata phozy ta moh maniah ama bipa vâta British sawhkhâ chhao ta “Lakher” tahpa ta maniah vaw pahno tua ei ta, eima Missionary rôhna ngaitapa Revd.R.A.Lorrain chhao ta Maraland a kaw hmô hlâ tawhta “Lakher” tahpa ta maniah a vaw pahno tua hrapa a châ.

 

Pahno chyupa hawhta Kô hluhpi avaw khô hapa tawhna khata Mara râh he ahy ryureina ry lia hmâh ta y bei leipa pi ta; Mara Beizy ta amâ Beina khih no châ liata ryureih ei ta, bie ama hnei tyh. Kô 1924 rachhôh liana khata British sawhkhâ ryureina ry liata a y khai chyu chyuhpa eima châ.

 

Atanoh, he MADC eima vaw hnei thei n’awpa ta India ta British ryureina puasai awpa ta aphora lichih Kô 1945 rachhôh liana kha ta Mara Beizy ta Mara râh he ryureina no-eihpa hnei hr’awpa ta hmah vaw la pathao hra ei ta, Târi 1st April 1945 khata Mara Beizy cha Saikao khih liata ama tlô pakhy. He daihti liata ryureina no-eihpa hnei n’awpa kyh Bie peimawh kawpa ama pathlupa cha Puhpa Bowman, Additional Superintendent of South Lushei Hill, Lolei hnohta hiana pangia ei ta, achhyna ama hmô leipa vȃta Târi 3rd November 1945 liata tlô pakhy heih ei ta, he liana deikua cha a eino n’awpa ta Puhpa L.L Peters Superintendent of Lushei Hills, Aizawl liata pangia hapa a châ.

 

Ei thôh (3) n’awpa ta Târi 1st April 1947 liana khata hiana pangia heihpa châ ta, he lia chhochi cha Chin Hills, Lushei Hills, Arakan Hills Tracts liata Marasaw ypa zydua Crown Colony ta y awpa ta ama vaw hiah.

 

Adyuhpina ei 2 na (World War – II) vaw chhâ ta, India cha British ryueina tawhta Independence thlai a vaw hmô ha hra. India Dâhpipa (Constitution) phora awpa ta Constituent Assembly thlai paduapa châ ta, Dr.BR. Ambedkar cha Chairman a châ. Chatana chata India sawhkhâ ta Constitution (Schedule Tribes) Order 1950 ry liata Lakher (Mara) cha Tribal Pho khata sopa eima vaw châ haw. India sawhkhâ ta Lushei phozy nata â raoh hâh kawpa ta maniah mohôh ta; Clerical post chhao Lakher Clerk nata Lushei Clerk tahpa ta piepa eima vaw châ.

 

British sawhkhâ ta maniah âvao hlâ zydua cha Marasawzy heta khota lai zaohlaopi ta, keimo tlai ta nie nata baw, abu nata asaih apatohpatiapa ta apati pavypa eima châ. Ahy ryureina ry lia hmâh ta y beih leipa, keimo kho tlaita Abei ahneipa chi nata pho eima châ. Ahy baokhâna nata deichhyna rai a hnabeiseih beih leipa ta khihsapa, ahy vângia leipa ta charei palao tyhpa, chihro phohropazy ryh liata abôh beih leipa eima châ.Ti nata râh pabohsana kyh liata riahpha ngâchhihpa, tiamapa, chariah adyuhna lia chhao ta chihro phohropazy chhao ta ama ngiaroh ngaita tyhpa eima châ.Chatana chata eima chheipâh liata chihro phohropazy ta British ryh liata amâ bôh khai tawhta Kô 1924 rachhôh tawhna kha ta British sawhkhâ thatlô ngaitapa ta maniah â vao chyu chyuhpa a châ.

 

British ryureina daihti tawhna chhao ta Marapazy cha ryureina eih hrâhpa ta mohôhpa châ lymâpi ta, British sawhkhâ ry liata Superintendent ta khito liata Mara Beizy siepahliepa ta ryu a reih tyh. Cha chata Chi nata pho ta pahnopa eima châzie apalâsa ngaita. Daihti vaw khô lymâ ta Adyuhpina einona (World War – II) avaw pai tawhta râh hluhpi ta British ryureina tawhta vaw pua lymâ ei ta, India sawhkha chhao cha Independence hmô awpa duasu liata avaw y haw.

 

Kô 1947 khata India sawhkhâ ta Puhpa Gopinath Bordoloi, Chairman chhihthana ry liata Sub-Committee of the Constituent Assembly padua ta, Bordoloi Commission tahpa a cha. He Commission heta a Recommend pa hawhta Pawi-Lakher Regional Council cha Notification No.TAD/R/50/119 of 31.07.1951 ta Article 224 (2) nata 275 (1) hmapa ta Sixth Scheduled to the Constitution of India liata pachopa chapi ta, Târi 20th May 1952 liata Council padua theina Order pua ta, Târi 23rd April 1953 liana khata Pawi – Lakher Regional Council chhao cha Lôlei (Lunglei) liata pahypa a vaw châ haw. Puhpa B.W.Roy, S.D.O Lolei (Lunglei) cha Chief Executive Member ta so chypa a châ.

 

Kô 1963 December liata Zyhno khih liata Mara Freedom Party paduapa vaw châ ta, he liata Chhithatuhpa thokhazy cha;

 

President - Puhpa V.Hlychho

VicePresident - Puhpa Hiphei

General Secretary- Puhpa Mylai Hlychho

Assistant General Secretary - Puhpa S.Pailei

FinanceSecretary - Puhpa Chhobi

Treasurer - Puhpa Sialua Hlychho zy ama châ.

 

Chatana chata kô 1964 Puhpa B.P Chaliha hnohta pangiapa châ ta, hlaotlohna chara ta hmôpa a châ leipa vâta Târi 5th February 1965 my Dawh 10 pa ta P.L Regional Council tawhta Boycott na phuahpa a vaw châ. He daihti no ta Marasawzy rei eima raoh zie nata chhithatuhpazy amâ pie pasana zie he reithai tlâh châ ta, arôhna ngaita.

 

North Eastern Re—organisation Act 1971 hmâpa ta Mizo Hills District Council cha Union Territory lâta sopa châ ta, Târi 2nd April 1972 liata Mizoram Administrator Puhpa J.C. Das ta Regional Council pachhaihna nata ADC 3 (sâthoh) paduana Order hmô ta, Târi 29th April 1972 khata Pawi – Lakher Regional Council cha Pawi District Council, Lakher District Council nata Chakma District Council tahpa eima vaw châ haw.

 

Kô 1988 Amendment of Sixth Schedule to the Constitution of India daihti lia khata MADC tahpa ta thlapa eima vaw châ haw.

 

Mara Autonomous District Council châta avaw hriapasatuapazy, eima Chi nata Pho thapasapa nata kyh pachâpa ta keih avaw chakâ lymâ tuhpa zydua my leipa ta khâ eimâ thei awpa peimawh ta, PL – Regional Council daihti no ta, Sawhkhâ raih bâhsaipa ta, ti nata râh châta Boycotte – tuhpa eima pahno phapazy cha thina lytlâh maniah vaw khôsai khai ha ei ta, ama hry tawhta Puhpa A.Pawchi s/o A. Heilo of Tisopi deita he atanoh eima hnoh ta maniah âvaw hlao theipa a châ. Arôhna tahpi ta, eimâ ly ngaita.

 

PL – Regional Council daihti no ta, Sawhkhâ raih bâhsaipa ta, ti nata râh châta Boycotte – tuhpa pa 16 eima pahno phapazy cha;

1. Puhpa A. Pawchi of Tisôpi

2. Puhpa K. Paichhô (L) of Tipa ‘B’

3. Puhpa Thalua Azyu (L) of Vahia

4. Puhpa HC. Sâhdô (L) of Siaha Vaihpi 5. Puhpa KT. Chialo (L) of Saikao

6. Puhpa A. Khaichhy (L) of Saikao

7. Puhpa HC. Kiamâ (L) of Siaha Bazar 8. Puhpa L. Elaiza (L) of Saikao

9. Puhpa SC. Hlychho (L) of Amôbyu ‘B’

 

10. Puhpa HC. Rôhmô (L) of Amôtlâh

11. Puhpa NC. Chhâsia (L) of Amôbyu ‘B’ 12. Puhpa N. Chiapô (L) of Siaha Vaihpi 13. Puhpa Rôcho Nôhro (L) of Saikao

14. Puhpa L. Zamo (L) of Siaha Bazar

15. Puhpa K. Châbâ (L) of Tipa ‘B’

16. Puhpa S. Ngiadô (L) of Tipa ‘V’

 

India sawhkhâ ta ryureina no eihpa maniah apiena chhâ chaipa cha eima chi nata pho, taozie nata phôryhpa, reih nata khozie, eima ti nata râhzy pabohsa ta, palaiseihsa awpazy, eima sosâh via lymâ thei n’awpa nata keimo tlaita ryu eima rei lymâ hra thei n’awpa ta khokheina maniah apatosapa a châ. He heta eima chheipâh liata chihro phohropazy ta maniah ama dihsaoh awpazy tawhta maniah a pabohsa. MADC he India Dâhpipa liata pachopa a châpa vâta rainao kawpa ta State sawhkhâ chhao ta maniah a dihsaoh thei leipa a châ.

 

Mara râh he eima râh châ ta, achhôh liata a y pa zydua ; Mara reih, aleilô nata abie hneina zydua chhao keimo eih sai a châ. Kyhpachâna chôta pabohsa ta cheih-chalo lymâ awpa chhao eima tao awpa hialia a châ hra. Mara râh khôtho lâta a y pa zydua chhao ta cha cha pahno thaipa ta eima râh tha pasana ama hnei via lymâ hráwpa nata Mara reih chhao ama thai lyhlia awpa a peimawh ngaita. Chatana chata Marasawzy cha khataih lia rai y hráw ei sih la, apôhkha ngaitapa ta hmahsiena phapa liata eima laiseih lymâ aw.

 

Mizoram ta Union Territory tawhta State pitlohpa lȃta amâ kaw khaih nona khata MADC chhao ta duahmo asâh viapa lâta eimâ khaih hra awpa ta eimâ hnabeiseih. Châhrasala Lakher District Council tahpa cha Mara Autonomous District Council tahpa ta thlapa deileipa ta cha hlaotlohna hropa y thei khao vei. Chavâta atanoh taihta bie hneina lai viapa hiapa ta Sixth Schedule to the Constitution of India Amend awpa ta eima teih ngâpa a châ. Abeipa ta a paryhsa khiata cha eima hlaotloh ngiathia hra aw.

 

Atahmâ he, MADC cha Kô 50 na Golden Jubilee vaw châ ha ta, he 12th Term MADC liata chhithatuhpa nata Marasawzy, he daihti phapa ahmâh thei awpa ta byhnâ eima topa he vâhnei a chhih ngaita ta, eimâ ly ngaita.

 

Atanoh eima râh nata Marâpazy ta eimâ ngiahpa cha sapa nata thlahpa liata apôhkhana nata ryureina dopa, pathaihpa nata siapa padua awpa he a châ. Abeipa khozie ta eima y ti ta cha, ato tao theituhpa cha ta Phopi ta miah padua aw ta, Sapa nata Thlahpa byhnâ rei tiah lei ta miah a vao aw tahpa he my kha ei suh u.

 

He 12th term MADC chhôh heta Abeipa ta Marâpazy châta hmo rôhnahpa, Chi nata Pho châta lâthlôh phapa miah â chhuahnohpa aw tahpa chhao he ei ngiapâna a châ hra. Ti nata râh châta ei chakaolâhpa zydua Khazohpa ta sapa nata thlahpa byhnâ hluhpi chapie mawh ei sy.

 

Mara Autonomous District Council vyuhpa ta nama zydua ta, he Golden Jubilee Closing Ceremony he aly kawpa ta hmâ chyu awpa ta cha hrua ei na ta, khokheina sâh chaipa ei chahlâ chanei ei. Ei châ ly kaw ei.

 

ISSUED BY:

Information & Publicity Department

Mara Autonomous District Council

Siaha.