PRESS RELEASE

NO.51/2025

SIAHA, 2 Patô, 2025, Chutynoh - Atanoh my dawh 11:30 AM kha ta MADC Golden Jubilee Hall liata Model Students Scholarship Cash Awardees lymâ raipapuana nata alykheina programme hmâpa châ ta, he daihti he Chief Guest Puhpa S. Lalremthanga, Hon’ble Dy. CEM MADC ta a hmâkhei.

He daihti liata Dy. CEM chata biereina daihti hmâh ta, “Board of School Education (BSE) ry liata Officers & Staff nahzy hriapasana nata apiepasana vâta student zy châta byhnâ châpa ta exam ama conduct thei vâta aly â chhih kaw. Thaina sâh viapa ahneipazy answer script pamosapa ama châ; apalâ kawpa ta result papuapa a châ khôlâ ta atanoh daihti lychhihpa eima hmâ thei vâta a eihpachaipa ta BSE Secretary & Staff zy hnoh ta alynabie ei reih.”

Awardee-zy hnoh bietapa reih ta, “Lymâ chyh kaw hrasala ataopasuana liata sâkhana nama châpa he my leipa u la, Awardee nahzy namâ chuna liata tiama papua via lymâ u la - next academic exam liata taopha via heih awpa ta hnabeiseihpa nama châ; final exam liata nama tao chhie via tlamaw tlai khiatala noza chhihpa hmo a châ. Cash Award nama daopa hawhta achuna kyh liata amopâ tlâh nama châ awpa a châ” tahpa ta bietapa nata pasyuna bie a reih.

Pachutuhpazy (Teachers) hnohta pasyuna bie reihpazi ta, “Nama pachuna liata tiama kawpa ta pachu pazao lymâ u la - eima râh he paritheipa ta thata miah angiahnaoh ta, student-zy taihta amâ boh lei thei bâ - atahmâ he NGOs, Awnano nata sawhkhâ ta eima buakhei chaipa a châ. Student zy he Achuna O liata ama daihti ama hmâh hluh chai - chavâta paritheipazy tao lei awpa ta apachu hluh awpa apeimawh kaw. School Education Department tawh he ta palôh pie khaipa ta eima chhôhkha, râh nata chipho hmiahao chaipa paritheipa he eimâ dyuh lymâ awpa châ.”

“Hâta hmiatuapa liata Town chhôh School-zy eima tly no ta Student hry liata paritheipa ataopa ama y khiatala Department lâ report awpa ta ahawna chhao eima tao laih; he he eimâ hao vâ châ leipa ta lâpi dopa liata chhihtha eima khoh vâta a châ.”

“Kyhpachâna chô ta hawti nawh hro achu tah, mohôh awpa a peimawh ngâsâ. Kg. & Primary liata nata ama hawti no tawhta hro lâpi dopa liata amâ chhih awpa he apeimawhpa a châ - ama addict ha tawhta la Camping chhôh nata Home liata ama y chhôh ngâlâh pha ei ta, hawkhô ama vaw pua nahta pha hmeiseih thei khao hlei vei ei.”

“He hawhta Marasawzy eima sie lymâ khiatala chi hro pho hropa ku liata eima y pathlei aw. Eima chhôhkha chyu mohôh pha awpa a peimawh chai. Chhôh to ta eima sawnahzy ama sapa nata thlahpa pachha awpa ta eima tei hmeiseih awpa a châ. Eima sawnah tlai cha Home lia soh pi ta, NGOs, sawhkhâ nata Awnanopazy ta mohôh awpa hawhta apachâpa lyu pi ta, amohôh khoh leipa eima lyu - he he hmo pha chaipa châ hlei vei. Eima chhôhchhipa eima sawzy he kyhpachâna chô ta eima mohôh khiatala Khazohpa baona ta eima pachha papua thei cheingei aw.”

“Chavâta eima theina chyu liata tiama kawpa ta eima râh hmiahaopa he adyuh lymâ awpa ta chapasyu ei na ta, bie ei chata khoh ei” tahpa ta ahawna bie nata pasyuna bie pha kawpa a reih.

Programme he Puhpa BM. Khaimeichho, Secretary, Board of School Education (BSE), MADC ta chhihtha ta, Rev. AZ. Beirakaw, ES (i/c SM & D), ECM Assembly ta devotion a hmâh. Puhpa John VT. Hniehu, Controller of Examination, BSE ta report pie ta, Puhpa S. Lalremthanga, Hon’ble Dy. CEM, Puhpa C. Chehnei, Dy. Chairman nata Puhpa TT. Kholaw, President, BSE zy ta biereina chyupa daihti ama hmâh. 

Laihsa Rovina Khaimeichho, Artiste ta hlasapa ta zawpi palôpahawh ta, Chief Guest hleikhô ta atanoh programme liata ahlao thei hrapa Puhpa C. Chehnei, Dy. Chairman, Puhpa Nahlo Solo, Chairman, Town Committee, Rev. AZ. Beirakaw, ES (SM & D), ECM Assembly, Puhpa K. Beingiachhie, Sr. EO (MS), Puhpa TT. Kholaw, Sr. EO (PS), Puhpa Beirôkhu Beitâ, I&PO, Puhpa Elson Eliasa Nôtlia, President, MSO Gen. HQ, Siaha zy Cash Award lymâ raina ama hnei. He khai tawhta zawpi ta Abeipa thlahchhâ pachupa reiparaohpa ta programme he pachhâsapa a châ.

A ei 5 nawpa ta BSE pachhuapanohpa MADC Model Students Scholarship 2024-2025 he MADC ry liata MDC Constituency 25 a ypazy liata Class IV tawhta VII taih châta pachhuapanohpa châ ta, class to tawhta ataopha chaipa pakha chyu hnohta pie tyhpa a châ.

Model Students Scholarship 2024-2025 châta a exam theipa zydua cha: -

1). Class-IV = 562

2). Class-V = 445

3). Class-VI = 413

4). Class-VII = 310

Total = 1,741

Students 98 zy ta Scholarship (2024-2024) he hmô ei ta, kô kha Rs.6,000/- ( Thlakha ta Rs. 500/- hawhta ) piepa ama châ.

ISSUED BY:

Information & Publicity Department

Mara Autonomous District Council

Siaha.