PRESS RELEASE

NO.26/2022

SIAHA, 15 Pamih, 2022, Hriaheinoh – Atanoh dawh 2:00 PM liata Puhpa N. Zakhai, Hon’ble CEM, MADC ta Industry Building cum Common Facility Centre, MADC Court Building kiahpâh/mathi liata paduapa cha ribbon chakiepa ta a pahy.

Ribbon chakie khai tawhta Programme chyupa taopa châ ta, Pupa HC. Lalropuia, Industry Development Officer, MADC ta chhihtha ta, Puhpa H. Sahlo, Hon’ble Chairman, MADC ta devotion a hmâh. Technical in-charge Puhpa K. Beichhua, J.E. (PWD) ta he building he 1st September, 2019 tawhta sa pathaopa châ ta, North East Region Textile Promotion Scheme (NERTPS) Rs.28.00 Lakhs nata GIA sôh Rs.8.00 Lakhs, total Rs.36.00 Lakhs ta sa patlôpa a châ tahpa Technical Report a pie.

Laihsa Jessica Ngody Hlychho, Mara Idol 2021 ta hla sâ 2 sa ta, daihti chhâna lâ liata Puhpa Syuhlô Beichakhei Mara, PS to CEM ta Vote of Thanks reina hnei ta, he khei tawhta Zisu thlahchhâ pachupa reiparaohpa ta programme khawpa a châ.

Building pahytuhpa nata Industry Department portfolio a to tuhpa Puhpa N. Zakhai, Hon’ble CEM chata biereina chyupa hnei ta, he building he Assam type ta sa awpa tahpa a châ no ta eima MADC nôpawpa, ei hrialâhpazy ryrao thaina nata pasopakâna hawhta Concrete building ta sapa ta MADC châta ryu tlohpa a châ nahta hnabeiseihpa a châ tahpa ta reih ta, atahmâ he Industry Department he ta Officer nata Staff zydua manôh 12 deita rai hria hai ei ta, Department chynawh kawpa hmah châhrasala he hawhta building pha kawpa ama hnei theipa he â lyzie reih ta, Abiepa Khazohpa hnoh ta alynabie a reih.

Department liata hriapa officer nata staff zy chhao apahâ leipa ta tiama kawpa ta raihria lymâpa ama châ tahpa ta a reih. He hleikhô ta Industry Department ry liata hriapazy ta he building thiehpa liata Mara Cultural Dress nata Mara poh hluhpi vaw sa lymâ aw ei ta, Industry Department zy ta apha viapa ta department châta hmah ama la thei nahta a hnabeiseih zie reih ta, officer nata staff zy hnoh ta chhao pasyuna bie a reih. He su lia pyly he ta Training zy chhao pachhuahpanoh laih awpa a châ zie a reih. Atanoh building pahyna programme liata a vaw  hlaopa zydua hnoh ta alynabie a reih.

He programme liata Puhpa K. Hrahmo, EM (Edu.), Puhpa K. Chhuabei, EM (PWD), Puhpa FC. Lawmkima, EM (Forest), Puhpa K. Siakhai, Adviser to CEM, Puhpa Pasa T. Azyu, MDC zy ahlao ei ta, Department hropa tawhta Puhpa K. Chhihrau, Executive Secretary, Puhpa K. Beingiachhie, Sr.LAO, Pihnô S. Lalmuanpuii, Dy. Secretary (Fin.) zy amâ hlao. MJA Siaha District tawhta Puhpa B. Dawpho, Editor(the Times of Maraland), Puhpa Jeffry Khara, Editor (Moonlight), Puhpa Lalramnghaka Chinzah, Editor (Kawl-eng) zy amâ hlao thei hra.

ISSUED BY:-

Information & Publicity Department

Mara Autonomous District Council

Siaha.