PRESS RELEASE

NO.48/2025 

SIAHA, 29 Pachawh, 2025, Hriaheinoh – Atanoh zâlâ dawh 2:00 PM khata Puhpa Antar Singh Arya, Hon'ble Chairperson, National Commission for Scheduled Tribes, Government of India nata a hrialâpazy ta âlâh ta Siaha kaw tly ei ta, MADC CEM’s Bungalow liata Dyna, Apakyhna nata Felicitation Programme taopa ta apalâ kawpa ta programme ahmâpa a châ.

Daihti thaona liata Rev. K. Vabeinochô, Moderator, ECM Assembly ta Biesozy 29:20 Biehrai Reina nata Thlahchhâna hnei ta, Puhpa S. Lalremthanga, Hon’ble Dy. CEM, MADC ta Welcome Address reih ta, Puhpa John Beizachhi Phuto ta hlasana hnei ta, Puhpa VL. Hruaizela Khiangte, DC Siaha ta short speech a reih. 

Puhpa Antar Singh Arya, Hon'ble Chairperson, Atanoh he National Commission for Scheduled Tribe (NCST) ta biereina hnei ta, “NCST member manôh pathôh-zy chhao ta akhy pi ta, Puhpa S. Lalremthanga, Dy. CEM nata Siaha DC zy chhao nata he su liata avypa nata Social media liata eima meeting miah ahlaopa zydua zana Samaw ei cha hlâ ei.”

“Mara Autonomous District Council he Mizoram State chhôh liata ypa, a thâtih chhao Puhpa Nirupam Chakma, Hon’ble Member, NCST ta na chho tyh ta, atanoh liata ei ly kawpa cha nama District Council Day alyna noh liata he (Siaha) liata ei y theipa ei ly pachaipa a châ.”

“Atanoh he liata akhypa ta daihti phapa eimâ hmâpa he eima chipho ngâlâh châ dei châ leipa ta, eima râh thâtih nata society ataozaona châ chhao ta hmo pha ngâsâpa a châ nahta ei hnabeiseih.”

“He District Council eima hmô thei nawpa ta chyhsa hluhpi nata râh chhituh hmiatuapazy ta thata tôhpi vaw phia ei ta, cha ama tiamana zawhzi ta atanoh he daihti he ahmâ theipa chhao eima châ.”

“Chavâta District Council chhôh liata hmahsie nawpa ta atanoh he step sâkha eima tlypa ta â lâ.  District Council eima hneipa he Tradition & Culture nata eima reih zy pabohsa awpata â chhuah chaipa châ ta – eima chipho châna nata reih pabohsa, reih hmahpasiesa awpa hleikhô ta eima Culture hmah pasiesa awpa ta dâh ta biehneina miah a piepa a châ.”

“Adona nata ngâchhihna ta rai eima hria leipa ta a châ khiata cha chipho nata râh châ he ta phahnaipa nata hriapapuapa (Contribution) hnei thei aw ma pi.”

“He District Council he ta a râh chhôh liata a pahrâpa a chyhsa nahzy châ he ta hmo hluhpi thata tao ta, a chuna kyh nata nietluana kyh lia chhao ta thata hmophapa a tao ngâhai.”

“NCST he chipho chynawh viapazy cheihchalo awpa zy, ama reih nata ama chipho zy pabohsa awpa zy nata ama châ ta hmophapa tao awpa ta hmah a la ngâhai.”

“He NCST ta â chhuah chaipa cha khâpa ma a châ eima tah khiata cha Tribal nahzy ama nietluana (economy) nata ama chipho reih zy liata ama thâtih achu ta voice ama hnei thei nawpa ta paduapa châ ta, chipho hropazy ta eima Culture, reih, chipho zy he ama vaw za lymâ thei nawpa ta hmah pasiesa awpa he eima tao awpa rai a châ.”

“He liata avypa zydua hnoh ta bietana ei rei khohpa cha vâtlâh châta keih chakâ lymâ awpa nata hmophapa tao lymâpa ta hmahsiena lâthlôh achhih lymâ awpa ta ei châ haw ei.”

“Unawh zydua saih u, nama zydua ta chahrua ei na ta, he râh liata a pahrâpazy he ta Education kyh liata zy, achuna kyh liazy nata Economy nata hmahsiena kyh liata palôh miakha phaopa ta kei chakâ ei suh u.”

“Aizawl eima kaw tlôna daihti liata chyhsa thokha ei pakyhna liata ama reipa cha, India ta khotalaina a hmô tawhta NCST Chairman he atahmâ taih ta Mizoram a kaw tlypa y mâh leipa ei ta, keima he a pakha nawpa châ na ta, eily ngâsâ.”

“He Commission he ta Political Party to ta apazao khai ta, achyh chaipa tawhta alai chaipa taihta apazaopakhypa ta hmahpasiesa awpata biehneina lai kawpa a hnei. March 12-16, 2024 kha ta he Commission term a sie ngâhaipa he paduapa a châ tawhta a eikha nawpa ta Droupadi Murmu, President of India siepahliepa ta meeting hmiatua chaipa hneipa a châ. Cha ahmôpakhyna liata mopakha ta dawh 4 chhôh sai daihti piepa châ pi ta, cha no ta Droupadi Murmu ta a biereipa cha India râh liata Tribal ypa a chyh chaipa tawhta alai chaipa taihta tly u la, achuna (education), hnatlâna kyh nata economy kyh liata khâpa ma ama duasu a châ tahpa khâcharâ achupa ta mohpasia awpa ta miah a chho. Cha khai tawhta India Prime Minister Puhpa Narendra Modi ta miah aw ta a reipa cha, India ta khotalaina ahmô khai tawh he ta Tribal nahzy he ta achuna (education), hnatlâna kyh liata khâpa ma ama duasu a châ tahpa pahno khoh na ta, he he hmah vaw la u la, a thâtih zy chhao na vaw chho muh vy tahpa ta bie miah a tapa a châ.”

“Commission ta rai eima vaw hria tawhta  kô 1 vaw tloh ha ta, State hluhpi tlypa ta eima rai zy cha eima hria pazao lymâpa a châ.”

“Hmialâ tawhta he su he kaw tly awpa a chhuah tyh pi ta, a chhâpa cha he Commission liana he ta nâmo lâ chyhsa senior leader Shri Nirupam Chakma, Hon’ble member hnei pi ta, chavâta ano chhao ta Aizawl, CADC nata MADC tly awpa ta thata hmah miah lakhei ta, chavâta a kaw tlô theipa eima châ. Keima chhao he Madhya Pradesh liata kô 15 chhôh Cabinet Minister ta y ha na ta, Tribal nahzy duasu cha pahnopasia kaw na ta, keima chhao pho chynawh kawpa tawhta akaw puapa châ na ta, Tribal ta a tao awpa, a y dâh awpa nata Tribals chô liata hmo a tlô awpazy cha ei pahno chhielie hrana chô ta asu tlôpa nama thâtih a kaw chu awpa ta akhypa eima châ.”

“Atanoh eima hmia liata student atyuhpazy, hmialâ daihti liata eima râh nôpaw nata chyhsa hmâtlâh khochhih kawpa ta a vaw pua awpazy ama châ. Chavâta, he liata thyutliapazy hnoh ta ei rei khohpa cha – he ti nata râh liata a pihpa châ pi ta, eima thipa chhao ta he ti nata râh châta athi awpa châ pi ta, chavâta eima palôh liata hmo sâkha y awpa ei kho kawpa cha India chyhsa eima châ tahpa he eima my awpa châ vei.”

“He su liata avypa zydua, eima reih pabohsana kyh liata eima Council pabohsana kyh lia chhaota nata palôh miakha phaopa ta hmahsie lymâ awpa nata keih chakâ lymâ awpa ta ahnôh chaipa liata bie ei chata khohpa ei a châ, ei châ ly kaw ei” tahpa ta bietapa Hindi ta reih ta, Puhpa David K. Azyu, Hindi Promotion Officer, MADC ta zawpi hluh via pahno thai awpa ta Mara reih lâ ta a palie.

Programme chhâ tawhta CEM’s tlyhmia liata Thodaw lona hnei ta, CEM’s Bungalow Conference Hall liata MADC, LADC nata NGO leader zy apakyhna a hneipazi pâ hra.

Atanoh programme he Satlia MC. Beihrohmo, AAO nata Laihsa Ornella Khithie zy chhihthana ry liata apalâ kawpa ta ahmâpa a châ.

ISSUED BY:

Information & Publicity Department

Mara Autonomous District Council

Siaha.