PRESS RELEASE NO.40/2021 

SIAHA, 15 Thlazoh, 2021 – Atamy dawh 10:30 AM kha ta Mara Autonomous District Council (MADC) ta a eino (2) nawpa ta India râh khotalaina ei 75-na cha MADC Complex liata ahmâpa châ ta, Khichhai laipa Puhpa N. Zakhai, CEM zachhihpa ta 75th Independence Day alyna châta Indian National Flag a parai khai tawhta bieriena chyupa a hnei.

Satlia MC. Beihrohmô, Assst. Audit Officer, MADC nata Laihsa HC. Joane Mary, VO, MADC - zy ta pahnie kawpata host pa ta programme ama chhihtha.

Daihti chhâna lâ liata MADC ry liata sawhkhâ raihriapa nata Teacher nahzy hleikhô ta MADC ry liata Department a ypazy hry tawhta kô a sie hapa liata Revenue apangia pha chaipa Department sâ 3 zy hnohta lymâ raina hneipa châ ta, he lymâ raina he Pihnô N. Elizabeth, Sr. RDO chhih ta, Chief Guest Puhpa N. Zakhai, CEM ta lymâ a rai.

Ary liata palâsapazy he lymâ adaopazy ama châ:

1. Best Officer Award – 2021 = Puhpa Pachi Hlychho, Executive Secretary, GAD

2. Best Group “C” Employee Award – 2021 = Puhpa S. Vahro, A/A, DP & AR

3. Best Group “D” Employee Award – 2021 = Puhpa Laltlana, LAD

4. Best Driver Award – 2021, Puhpa MC. Vanlallawmchhunga, Road Transport Deptt.

Submission of Highest Revenue Receipt by Departments under MADC:

1. Environment & Forests Department

2. Road Transport Department

3. Land Revenue & Settlement Department

Teachers Award:

1. Best M/S Teacher Award – 2021 = Puhpa K. Mytha, Headmaster, Auxilium M/S, Siaha.

2. Best P/S Teacher Award – 2021 = Puhpa A. Halai, Headamster, P/S-II, Meisatlâh

Atanoh 75th Indian Independence Day, 2021 ahmâna liata CEM zachhihpa Puhpa N. Zakhai biereipazy:-

Introduction:

Ahmiatuata Marasawzy Chi nata Pho ta maniah paduatuhpa eima Khazohpa hnohta alyna bie ei reih. He 11th term Mara Autonomous District Council ryureina chhihtha awpa ta maniah deichhytuhpa, MADC ry liata ahriapa nata Mara zawpi  zydua hnoh chhaota alyna bie ei reih hmeiseih hra.

India’s Independence:

India Independence Day he Kô 1929, January 26 khata Indian National Congress ta Lahore Session liana khata vaw phuah ta, a moh ta ‘Purna Swaraj’ tahpa a cha. Chatana chata Kô 1930 nata 1946 likah chhôh zydua kha January 26 he Independence Day ta ama hmâ tyhpa a châ.

Atanoh he India Independence Day ei 75th na châ ta, India ta British ryureina a puasai tawhta India Prime Minister hmiatua chaipa Pt. Jawaharlal Nehru ta Ko 1947 August 15 pa khata Lahori Gate, Red Fort, Delhi liata Indian National Flag a chaluahna noh ei 75 na a châ. British ryureina puasai awpa heta Mohandas Karamchand Gandhi ‘Father of the Nation (India Pho Paw) nata a hrialâhpazy ta kô hluhpi thisai palo leipa ta ama vaw teikhâna theilâpa a châ. India ti nata râh châta ama hriapasana zydua my leipa pi ta, Palyu palihna nata zana eima hlâ.

India Independence Day at Maraland:

Khahlâ cha eima râh liata Mizoram State sawhkhâ hriaparaohpa ta hmaohkhata India Independence Day he ahmâh tyhpa châ ta, Kô 2020 tawh deikua Mizoram State sawhkhâ ta Order of Precedence Main Table tawhta Mara zawpi vyuhpa ta eima tly patlohpa, eima râh Nopawpazy a thy pathlah hapa vâta Mara râh ryureina Opi (MADC) liata ano-eihta ta eimâ vaw hmâh hapa a châ.

Kô 2021 India Independence Day he Boycott leipa pi ta Order of Precedence Notification 11th August 2020 tao pathi awpa ta bie hneituhpa lâta ei hluhpi tlô kheipa a châ tawh chhaota y zie a hneileipa chôchâh vâta Târi 30th August 2021 (Chutyhnoh) ta Mararâh liata All Political Party-zy, All NGO-zy nata MADC chhihthatuhpazy bie pathlupa hawhta a hmâhpa eima châ.

He noh peimawh kawpa he COVID-19 vâta zawpi hluhpi ta ahmâh thei awpa a châ leipa vâta hrua eihpazy deita eimâ hmâpa a châ. Atanoh he Marasawzy châta noh ngiatlâh châ kawpa a châ hra. MADC ta Mara reih tlaita India Independence Day eima hmâh ei 2 na a châ. 

Maras’ Contribution to India’s Freedom struggle:

Abeipa ta Missionary eihrâhpazy maniah kaw tuapa ta, British sawhkhâ ta India â vaono tawhta India ti nata râh châta Marasawzy ta hniehnô vaw hnei laih lymâ hra pi ta, India Independence a hmôna taihta Marasawzy cha Chi nata Pho ta pahno lymâpa eima châ. Chavâta ryureina no-eihpa hnei pi ta, Abeipa byhnâ eima to ngaita.

Marasaw British pheisaih a châpazy chhao ta World War – II daihti lia khata France râh taihta chariah ama siehnao hrapa a châ. He hawhna heta India ta Independence ahmô n’awpa kyh liata tha ta eima hria hrapa a châ.

Mawrâh liata Abeizy ahmaoh pakhyna daihti khata a thaota tawhta Mara chi nata Pho vyuhpa ta Mara Beizy chhao a hlao lymâ hra ei ta, Bordoloi Commission chhaota Mara Chi nata Pho pahno pasia ta, ryureina eih-hrâhpa hmo awpa ta maniah a khokhei hrapa a châ.

Mara râh châ dei châ leipa ta Mawrâh nata India râh, British châ taih chhao ta Chi nata Pho reitlâh leipa eima tah tyhpa Mara râh heta a theina zydua a papua lymâ hrapa a châ. He heta Mararâh cha Abeipa kyh maniah pachâ ta Chi nata Pho rei tlâh châpa eima châzie a chhopasia ngaita.

Formation of MADC:

India Independence a hmô kô 1947 khata India sawhkhâ ta Puhpa Gopinath Bordoloi, Chairman chhihthana ry liata   Sub-Committee of the Constituent Assembly a paduapa, achyunazie ta Bordoloi Commission ta a Recommend pa hawhta Pawi-Lakher Regional Council cha Notification No.TAD/R/50/119 of 31.07.1951 ta Article 224 (2) nata 275 (1) hmâpa ta Sixth Scheduled to the Constitution of India liata pachopa a châ. Kô 1971 liata Mizo Hills District Council cha Union Territory lâta sopa châ ta, PL. Regional Council chhao cha LAD, PADC nata CADC ta pachhaihpa vaw châ hra ta; Kô 1988 Amendment of Sixth Schedule to the Constitution of India daihti lia khata MADC tahpa ta thlapa a vaw châ heih hra. 

India sawhkhâ ta he hawhta ryureina no eihpa maniah a piena chhâ chaipa cha eima chi nata pho, taozie nata phoryhpa, reih nata khozie, eima ti nata râhzy pabohsa ta, palaiseihsa awpazy, eimâ sosâh via lymâ thei n’awpa nata keimo tlaita ryu eima rei lymâ hra thei n’awpa ta khokheina maniah a patosapa a châ. He heta eima chheipâh liata chihro phohropazy ta maniah ama disaoh awpazy tawhta maniah a pabohsa. MADC he India Dâhpipa liata pachopa a châpa vâta rainao kawpa ta State sawhkhâ chhao ta maniah a disaoh thei leipa a châ.

Today’s Contribution:

Eima mahnô mapaw daihti tawhta Marasawzy he ti nata râh phapa ahneipa châ lymâ pi ta, atanoh taihta ti nata râh châta phahnai ngiah ngaitapa ta ahria lymâpa eima cha. Marasawzy cha chyhsa veihseih palôhâhpa, saiheina ahnei kawpa, ngâchhihpa nata riahphapa, ti nata râh kyhpachâ kaw tyhpa eima châ.

Atahmâhlâ COVID-19 adyuhna daihti lia chhao heta sawhkhâ ta maniah a mohôh dâh eima kho âkhi leizie cha pahno chyupi ta, MADC chhochhi cha he Pasana hri adyuhna kyh liata State nata Central sawhkhâ lâta eima rairuna ei hluhpi tlôkheipa a châ tawh chhaota atanoh taihta hlaotlohna hmô awpa y mâh vei. Châhrasala Marasawzy pi heta nôuna rai hnei leipa pi ta, NGO, Awnanopa nata veihseihpazy ta deichhyna rai khâ ama hria lymâpa a châ. He heta ti nata râh phapa eima châzie tha ta apalâsa.

Conclusion:

Marasawzy kaototi liata hmahsie via lymâ ta, chi nata pho, reih pabohsa ta, palaiseihsa via lymâ n’awpa kyh lia chhaota eima zydua maohphaona nata hriaparaohna apeimawh ngaita. Sixth Schedule Amendment chhao alaichadai haipa châ ta, hlaotloh awpa ta hnabeiseihpa a châ. He 11th term MADC ta eima raihriapa nata ryureina kyh hluhpi liata tloh leina nata kho akhi leina hluhpi chhao a y hra aw. Mara zawpizy deichhyna nata baona chôta he hlâta hmahsiena rôhna viapa liata eima Khazohpa heta miah achhihtha lymâ aw tahpa hnabeiseihna chôta hmialâ tôh lymâ suh vy. 

MADC piema eima vaw châ tawhta atakô he Kô 49 na eima sie ngâhai. Abeipa ta â ryh a tah khiata cha hâhkô April 2022 khi a Kô 50 na (Golden Jubilee) a kaw tloh ha bâ awpa a châ. 

“Marasaw, keimo ta bâhlia a cha ao ei sih; Lyna khih pavâna suh lâ”

Atanoh India Independence Day ei 75 na noh he eima zydua ta India râh châta ti nata râh saw phapa châ awpa ta ahlâ pathieh chyu suh vy.

Nama zydua ta India Independence Day 2021 anaohna Samaw ei cha hlâ ei.

Ei châly kaw ei.

Jai Hind!

Atanoh he MADC ry liata office DAO, Tipa nata CAO, Vahia liata ahmâpa châ hra ta, Tipa liata Puhpa K. Siakhai, Adviser to CEM, MDC ta   hmâkhei ta, Vahia liata Puhpa L. Prisila, EM i/c Soil etc., MADC ta a hmâkhei hra.

MADC ta he hawh ta anoeihta eimâ hmâna chhâpa cha Mizoram sawhkhâ ta Warrant/Order of Precedence 2020 a taopa liata CEM, EM nata MDC zy duahmo âhnai kawpa liata ama sopa pasâh via awpa ta hiapa hlao tlohna a y mâh lei vâta a châ.

COVID-19 hriiah a charei no a châ vâta Independence Day alyna liata chyhsa hluhpi hrua thai’pa châ lei ta, Official thokhazy, Ex-MLAs, Ex-MDCs, Presidents of all Political Parties, Siaha District, ECM HQ tawhta Sr. Exe. Secretary, Exe. Secretary i/c Edu. & Mission, Moderator zy hruapa châ ei ta, MTP, MSO, MCHP, MHP, MWC General Headquarters President & General Secretary, MJA Siaha zy dei hruapa ama châ. Seat arrangement liata Social distancing taopa châ ta, sawhkhâ dâh taopa SOP zyna chô ta programme he ahmâpa a châ.

ISSUED BY:-

Information & Public Relation Department

Mara Autonomous District Council

Siaha.