PRESS RELEASE

NO.65/2022

SIAHA, 24 Chhiepa, 2022 – Atanoh dawh 11:00AM khata Congregational Church of India (Maraland) Headquarters, Saikao ta Puhpa H. Malvina, Chief Executive Member (CEM), Mara Autonomous District Council (MADC) cha a Official Chamber liata alykheina ryuchâ (citation) nata Mara Holy Bible present ei ta cha hleikhô ta, Abeipa lâ liata byhnâ awna thlahchhâna chhao ama hnei pâ heih hra.

Felicitation programme he Rev. K. Vabeinochô, Assembly Elect Chairman, CCIM (Hqrs), Saikao ta chhihtha ta, Rev. Z. Hrohmô, Executive Secretary i/c Fellowship, CCIM (Hqrs), Saikao ta thlahchhâna ta daihti a pathao. Alykheina ryuchâ (citation) nata Mara Holy Bible present-na (presentation of citation) daihti he Machâ HC. Beichhua, Assembly Secretary (Sr) ta hmâh ta, byhnâ awna thlahchhâna he Rev. Az. Beirôna, General Secretary, CCIM (Hqrs), Saikao ta a hnei.

Rev. Az. Beirakaw, Executive Secretary i/c Mission, CCIM (Hqrs), Saikao ta short speech reina hnei ta, Bible text Leviticus (Theihthaina) 19:15 Ryureina liana chata a sia leipa ta nama pachia awpa châ vei, sipasapa châ leipa ta, chyhsa hmo a tao theipa na za hlei awpa châ leipa ta, a sia ngaitapa ta na vaih ryu na reih awpa a châ tahpa bie hmâpa ta pasyuna pha kawpa reih ta, ngâchhihna hneina chôta nata Khazohpa pahnona chôta râh chhihthana raihria awpa ta khokheina a hlâ.

Puhpa H. Malvina, CEM, MADC chhaota biereina chyupa hnei ta, a ry liata palâsapa he a bierei tlâhpi viapazy a châ:-

Eima Awnanopa CCIM (Hqrs), Saikao nama hmopha taopa he a rônah ta hmeiseih na ta, nama chô liata ei châ ly hmeiseih ei.  Ryuchâ pha kawpa nata eima hro miah chhihthatuh awpa Bei Khazoh châbu Bible na hlâ ei chi ta a rônah tah na ta, ei châ ly hmeiseih ei. Hmo sâkha ei cha share khoh kawpa ei cha, thâtihpha vâta he ryureina O pi chi nah pho ryureina O pi a hneipa eima châpa Mara sawzy pi Awnanopa ta pakhaihsapa châ tua pi ta, cha tawhta,  ryureina eihrâh council zy Abeipa ta miah pie ta, Ei chyh via nota cha Awnano liata ahmâh kawpa châ na ta KHP lia chhao recitation pareisapa ta pahânoh ta Achhyna O liata daihti a hmâh tyhpa ei vaw châ. 

Kaw pitloh via laih na ta KTP phana ei kaw pahno pathao ha, hlapy lia chhao eikha eino cha hla paryh awpa ta eimâ thao hmâ ha hra. Chata, eima Awnanopa zy a vaw chhaihpa ta vaw y ta, he Awnanopa â vaw chhaihna kyh lia heta ataotuhpa pakha ei châ hrapa ta pahno na ta. Kei mo pakha pachâ dâh ta cha member hluh viana lia y kha a phapa ta pahno na ta, anodeikua chhôhkha lâ tawhta CCIM lâ y awpa khona a vaw ypa vâta chhôhkha reingiahpa ta CCIM lia vaw y pita, Awnanopa â vaw pachhaih tawhta khata CCIM tlyma ECM tlyma avaw hmâh tu khao tlâ leipa na ta, Abeipa ta ryu vaw reih ta, ânano ei vaw tah kawpa cha, atakô, keimapa MDC ei vaw tloh kô cheingei ta CEM vaw châ pâ na, Awnanopa aryh kô vaw châ pâ heih, council golden jubilee kô vaw châ pâ heih tah ta ei palôh na vaw palysa kaw ta. 

Awnanopa Assembly ta eimâ ryhnapa he ahlao patlohtuhpa cha nâmo ahriatuhpazy kha châ ei chi ta, Awnanopa he sapa nata thlahpa liata eimâ pôhkha awpa na a châ e tahpa he atanoh ta nama hnohta bietana ei hnei khoh kawpa a châ. Ei châ ly kaw ei.

Puhpa H. Malvina, CEM, MADC chata atanoh liata avaw lykheituhpa Congregational Church of India (Maraland) Headquarters, Saikao nata felicitation programme a vaw hlao theipa Puhpa N. Viakhu, Chairman, MADC nata Puhpa Pawsa Lava, AITO, MADC hnohta alynabie a hlâ ei.

ISSUED BY:

Information & Publicity Department

Mara Autonomous District Council

Siaha.