PRESS RELEASE

NO.41/2025

SIAHA, 17 Pachawh, 2025, Pobienoh - Atanoh zâlâ dawh 1:00 PM khata Puhpa T. Seido, EM i/c Social Welfare, MADC ta a Office chhôhpadâh liata Charity Home liata hriapazy hnohta baona sôh a hlâ ei.

Programme he Pihnô Patricia T. Azyu, Social Welfare Officer, MADC ta chhihtha ta, Rev. T. Beipathai, Manager (Agape Home) ta Abeipa lâta pavaosana thlahchhâna a hnei.

Puhpa T. Seido, EM, MADC chata, "District Council he Abeipa ta Missionary zy siepahliepa ta miah pie ta, Machâzy thlakha ta Rs.500 lymâ pie tyh pi ta, heih alyuleipazy, Mohôhtuhpa hnei rai rai leipazy chhao thlakha ta Rs.1,000 eima pie tyh," a tah.

"Charity Home liata ypazy he District Council ta pachâ peimawh kaw ta, tao theipa deikua vaw chyh ngaita ta, atanoh a mohta ta sôh chyhta cha pie khoh pi ta, chavâta eima cha awpakhypa a châ. Nama daihti sôh kawpazy paruapa ta eima châ hawnazy pachâ peimawhpa ta programme miah namâ vaw hlao theipa he eimâ ly hmeiseih," EM ta a tah.

EM chata, "Missionary raihria ta lâ hla via lâ pua thei vei hr’ei sih la, eima chheipâh liata baongiahpazy bao lymâ awpa palôh eima hnei chyu awpa he a peimawh ngaita kaw. Hâra rietheipa zy, nôhmeipazy baopa he Khazohpa ta papeimawhsa ngâsâ ta, keimo chhao eima theina rakha ta, baona rai eima hria via lymâ awpa he a peimawh ngaita kaw," a tah.

"Charity Home liata hriapazy ei chi he, Abeipa hmiakô liata la nama lymâ hluh kaw ta, nama rônah  kaw aw. Chavâta hnabeidy leipa ta tiama kawpa ta hriapazao lymâ awpa ta ei châ haw ei. Rairuna namâ vaw tyhpa chhaota apahnosa lymâ pi ta, eima theina rakha ta eimâ baokhâ lymâ aw," EM ta a tah.

Atanoh Puhpa T. Seido, EM, MADC ta baona a piepazy:-

1. Grace Children's Home, College Vaih, Siaha.

2. Orphanage Boys' Home (Salvation), ECM Vaih, Siaha.

3. Kalvary Healing Ministry, Siahatlâh - 1

4. Charity Home (Saikao)

5. Agape Home

6. Mary Hechia Residential Special School, Zyhno.

Charity Home liata hriapazy ta report chyupa piena hnei chyu ei ta, Abeipa thlahchhâna (The Lord's Prayer) reihparaohpa ta daihti pachhâsapa a châ.

ISSUED BY:

Information & Publicity Department

Mara Autonomous District Council

Siaha.