PRESS RELEASE

NO.34/2025

SIAHA, 31 Pamih, 2025, Hriatuanoh - Atanoh dawh 11:00 AM kha ta AZ. Dyutha Hall, Vahia liata a tliata târi 18-22 March, 2025 chhôh ta Zyhno liata B. Beichakao ‘L’ Memorial Tournament (Men: Football, Women: Volleyball) pachhuapanohpa liata Vahia ta sâkhana lymâ ama daopa alyna programme ahmâpa a châ.

He daihti liata Vahia biatuhpa MDC Puhpa K. Chhuabei, Hon’ble EM i/c LAD, MADC etc. ta biereina hnei ta, “Politics liata kô 31 chhôh vaw y ha na ta, Vahia khih heta hmo lychhihpa chi nano nanopa eimâ vaw tyh hôlô. Châhrasala, atanoh hawhta Championship alyna he cha ei kha (1) eimâ hmâna a châpa ta ei pahno. Mara Idol chhao eithôh (3) tlai eima vaw la haw. Bia chhôh mohphana a tlôkheituhpa nah zydua hnohta alynabie reih na ta; he hawhta a châ no ta khatino rai ta Abeipa athei thlâh ha awpa ta eimâ pasyu” tahpa a reih.

“Sports liata hlaotlohna to awpa ta cha paritheipa - pa-ôpazy liata asohsi theina nata uhthei viapazy nata chhituhpazy zana eima hnei awpa a châ”

“Achuhaipazy chhao ta achhuahna hnei awpa a châ” tah ta, pathaihna kyh reih pazao ta, Mizoram pôpalôhpa pathaihna ataopasuana liata eima District sânona châ pi ta, eima Bia Vahia chhao pathaihna kyh liata hmahla lymâ awpa a byuh tahpa a reih.

He programme liata ahlao thei hrapa Puhpa T. Seido, Hon’ble EM i/c Sports & Youth Service etc., MADC  chata biereina chyupa daihti hmâh hra ta, “Vahia he, hmialâ tawhta Hockey athaipa châ ei chi ta, Boxing lia chhao ta namâ vaw lâ haw hra; Vahia khih he, Hlasa thaipa puana khih châ ei chi ta, nama vâhnei kaw” tahpa reih ta, atahmâ hlâta tiama via tah, hmahsie via awpa ta, pasyu ei ta, “Dyhchhiena he bai thai’pa châ vei; Cristiano Ronaldo zy, Hockey Player Rani Rampal zy chhao dyhchhiepa chhôhkha tawhta apuapa sai ama châ hra. Achhuahna hmeiseihpa hnei awpa a peimawh. Atanoh hlâta hlâta pha viapa chance nama hnei tahpa nama my awpa châ vei” tahpa reih ta, Paritheipa tawhta asohsi chyu awpa ta bietana a reih hra.

Puhpa K. Hmôly, President MTP Branch, Vahia ta programme he chhihtha ta,   Rev. FC. Paw Moti, ECM Biatuhpa Pastor ta devotion a hmâh.  Puhpa H. Manase, Game & Sports Secy, MTP Branch: Vahia ta report pie ta, Puhpa K. Chhuabei, EM, MADC, Puhpa T. Seido, EM, MADC nata Puhpa S. Vabeihasa, S&YO, MADC zy hleikhô ta NGO, VC nata khitlâh nôpawzy ta biereina nata pasyuna bie reih reih ei ta, laihsa Jessica Ngody Hlychho, Dezili Bohia, Pricilla Notlia nata Local artiste hro hropazy ta hlasa ei ta, Cultural item nano nanopazy pamosana hneipa ta arônah kawpa ta ahmâpa châ ta, Puhpa J. Vabeichhua, GS, MTP Branch, Vahia ta vote of thanks reih ta, daihti chhâna liata Revd. Dr. ST. Zawsi ta thlahchhâna a hnei. 

Champion alyna programme  chhâ tawhta zâlâ kyhchhina pachhuapanohpa châ ta, a khih zawpi ta aly kawpa ta dôhpa a châ.

He Tournment he Zyhno Zone ôna chhôh châta taopa châ ta, Chapaw Football akhaihpa liata Middle School Vaih, Zyhno nata Vahia akhaihpa ta 2-1 ta Vahia tlô ei ta,  Chanô Volleyball (b) liata Zyhno Centenary Vaih nata Vahia amâ Final-pa liata Vahia team zy ama champion heih hrapa a châ.

ISSUED BY:-

Information & Publicity Department

Mara Autonomous District Council

Siaha.