PRESS RELEASE

NO.18/2025

  

VAHIA, 09 Hmypi, 2025, Abeipanoh - Puhpa K. Chhuabei, Hon’ble EM i/c LAD, MADC ta noh 3 chhôh ryupa ta a bia (Vahia MDC Constituency) tly ta, a bia liata khih ypa – Vahia, Miepu, Supha, Lopu nata Khaikhy zy a tly hleikhô ta a tliata tawhta MADC area ôna chhôh liata Indo-Myanmar Border liata sôhpaliepazy siepahlie chaina Forest Check Gate, Ralie (India) tlypa ta rairuna ypazy mopasiana a hnei.

 

Puhpa K. Chhuabei, Hon’ble EM he ta a bia a tlyna khihzy liata khitlâh nôpawzy nata bia zawpi zy ta vaw y dy laih ei ta, khi to liata public meeting chhao hnei laihpa ta a bia zawpizy châta peimawh a tah viapazy reina, pasyuna nata khokheina bie zy reih laih ta, 2025 kôthiehpa liata a bia ei kha a tly tua chaina a châna hawhta bia zawpi zydua hnoh ta Kôthieh Anaohna a hnei laih.

 

Khito liata a bierei tlâhpi viapazy cha;

 

1. “Sapa hnatlâna byhnâ sôh kawpa hneina chôta bia zawpizy hmiahmô thei heih awpa ta nâ chhihtatuhpa nata kô 2025 miah tlôkheituhpa eima Beipa Khazohpa hnoh ta alynabie ei reih. Kô 2025 pa he sapa nata thlahpa liata byhnâ eima to kô châ awpa ta khokheina sâh chaipa ei cha hlâ ei.”

 

2. “Keimo bia he vâhnei chhih kawpa ta Lyu tla nawpa su hnei pha chy pi ta, eima râh leilôzy liata Abeipa byhnâ miah pie tyh ta, kô vei zy pha kaw ta, eima nôpaw nawh zy uhthei laih bâ hra ei sala, eimâ tivy via lymâ thei nawpa ta keimo thyutlia viazy ta lyu tao he eima pazao lymâ awpa a châ.”

 

3. “Deichhyh byuhpa deichhy thei awpa nata Abeipa khih-na-râh châta suhrawh sukha zy â pôh via lymâ thei nawpa ta eima hriapasa via lymâ awpa he a peimawh kawpa a châ.”

 

4. “Kôchareih kôthieh bia chahlô daihti liata cha politics hlâta ku raihria lâ chhâh he eima rei khoh via tyhpa a châ; a chhâpa cha Marasawzy eima râh liata kôvei pha kaw hra sala nata sôh-thih hluhpi hnei hra ei sila, eima hria pasa vei khiah eima hnei tlakaihpa vaw chhâ laih aw ta, tahmâ tawhta eima hriapasa lei khiatala chi hro pho hropa sei liata eimâ tâh pathlei aw tahpa he chichhih kawpa a châ.”

 

5. “Chahawh pyly ta, châ thaipazy chhao eima y chakhy awpa châ vei – competitive exam liata eima hlao tloh thei nawpa ta châ chu patlô tawh chhao ta châ rei eima tiama lymâ awpa a châ.”

 

6. “Khizaw hmahsiena liata heih pha awpa ta achhuahna lai kawpa eima hnei awpa byuh tah, eima râh liata sawhkhâ scheme nano nanopa liata hlao patlohtuhpa eima châ khiah eima khih nata râh hmah a sie awpa a châ.”

 

7. “Sawhkhâ ta Pathaihna kyh liata thata hmahlana siekhei lymâ ta, Mizoram pôpalôhpa ataopasuana taopa liata Siaha District cha kô 2023 liata sâ 3-na, kô 2024 liata sâ 2-na eima châ thei haw, eimâ ly ngaita – he he Siaha khichhôh anua viapata mopadona hneipa a châ; keimo eima bia lia chhao pathaihna kyh pachâ peimawh si la, NGO, Awnano nata khitlâh apakaoh thai kawpa ta hmah eima la chyu awpa ta eimâ haw.”

 

8. “Siaha khihchhôh liata âhnalasi (vegetable) ama zuapa zydua cha District hro lâ tawhta a vaw ngiapa sairô châ ta, keimo ta eima hriapapuapa he a chyh ngâsâ; keimo bia – a eihpachaipa ta Salyu chavâh chheipâh zydua he châhvâ chichei nata âhnalasi a pha khoh kawna su châ ta, he su tawhta eima hriapapuapazy cha Mararâh eima supply (piepazao) thei lymâ thai khiah chi hro pho hropazy tawhta supply peimawh khao leipa ta, keimo sasyh ativy aw pi ta, cha cha eima Economy hmahsie nawpa khohchih kawpa chhao a châ. Chavâta ei bia chyhsazy, kô 2025 lia he cha hriapasa via si la, Mararâh liata âhnalasi ama zuana mâ zydua he keimo Marasaw tlai ta athôhna eima hnei thei nawpata eima hriapasa awpa ta eimâ pasyu” tahpa a reih.

 

Public meeting hneina su lia maih ta ano a chakaochahlâtuhpa Puhpa T. Seido, Hon’ble EM, Puhpa B. Dawpho, MDC nata Puhpa Jeffery Khara, Editor (Moonlight) zy ta khitlâh hmahsie nawpa nata eima râh hmahsie nawpa châta pasyunabie nata thapatlôna bie pha kawpa ama reih laih hra.

 

Puhpa K. Chhuabei, Hon’ble EM he târi 6 Hmypi, 2025, Pobienoh ta Siaha tawhta a thao ta, târi 8 Hmypi, 2025, Pachynoh ta apalâ kawpa ta Siaha â kaw ngia heih hra. He a bia a tly chhôh daihti liata a vaw dytuhpa zy, pawpi ri chhao ta a vaw mokhâhtuhpa zy, niedo nata ariena pha kawpa a vaw chhuanohtuhpa zydua hnoh ta, EM i/c LAD chata alynabie a reih.

 

Puhpa K. Chhuabei, Hon’ble EM he a lahpinô Pihnô Nakho Solo hleikhô ta Puhpa T. Seido, Hon’ble EM i/c Sports & Youth Services Department etc., Puhpa B. Dawpho, MDC, Puhpa Beirôkhu Beitâ I & PO, Puhpa MC. Beisia, JE (PWD), Puhpa Jeffrey Khara, Editor (Moonlight), Puhpa T. Pabua, Cameraman, Puhpa John Beizachhi Phuto, Asst. Bio-digester zy ta zipa ta ama chakaochahlâh.

 

ISSUED BY:-

Information & Publicity Department

Mara Autonomous District Council

Siaha.