PRESS RELEASE

NO.123/2022

SIAHA, 19 Thlarâh, 2022, Hriatuanoh - Atanoh dawh 11:00 Am khata UPSC Challenge, Inter-College Quiz Competition 2022 MSU zy ta ama organised pa liata Siaha College Students AZ. Zarzomawii nata Thomas Beizalai zy cha 2nd Prize Winners lymâ ama lapa cha Siaha College ta alykheina (Felicitation Programme) ama pachhuahpanohpa liata Puhpa H. Malvina, CEM, MADC cha khichhai laipa (Chief Guest) châpa ta â hmâkhei ei. Puhpa HC. Lalmalsawma Zasai, Dy.CEM cha Guest of Honour châpa ta â hmâkhei hra ei. 

Programme he Dr. Z.D. Lalhmangaihzauva, Assistant Professor, Siaha College ta chhihtha ta, Madam H. Lalrinfeli, Assistant Professor ta devotion â hmâh. Siaha College Principal Prof. Abdul Hannan Barbhuiya ta welcome speech reina hnei ta, L. Hnairili, III Semester Student nata Clara K. Melita, III Semester Student zy ta hlasapa ta zawpi ama palôhpahawh. Dr. Thokchom Budha Singh, Associate Professor, Puhpa Benjamin F. Nohro, Assistant Professor, Byhna Chozah, General Secretary, MSO (HQ) nata Puhpa Jeffrey Khara, Moonlight Editor zy ta short speech reina ama hnei hra.

Puhpa H. Malvina, CEM, MADC biereipa tlâhpi viapazy:-

Siaha College liata achuhaipazy Mawrâh pôhpalôh liata nama dua leizie he Quiz Competition liata hlaotlohpazy tawhta â vaw hno kaw. Mawrâh pôhpalôh liata Inter College liata lymâ sânona a dao phapa nama vaw châpa tawh heta Siaha College student nata pachutuhpazy chô liata hnabeiseihna sâh kawpa a thiehpa ta ei vaw hnei heih. He nama hlaotlohna heta MADC tha miah nama papawhsa hmeiseih.

Mawrâh chhôh liata College hry lia heta Siaha College he a hnôh chai châ achhuah leipa u la, tiama papuapa ta hmia tôh lymâ achhuahpa ta âsâh chaipa châ namâ chhuah lymâ awpa ta khokheina ei cha hlâ ei.

Hlaotloh awpa heta time management nama thai kaw awpa byuh ta, khizaw lia heta tiama ta daihti ahmâh thaipa maih he hlaotlohna ama to tyh. Hnabeidy leipa ta tiama papua lymâpa ta achievement hnei via lymâ namâ chhuah chyu awpa ta khokheina sâh chaipa ei châ hla ei.

Guest of honour Puhpa HC. Lalmalsawma Zasai, CEM, MADC chhaota biereina hnei hra ta a biereipa tlâhpi viapazy:-

Atahmâ khizaw lia heta achuna school pha leipa tlyma, a su pha leipa tlyma y khao leipa ta, achutuhpa liata apahnieh kawpa a châ. Qualified Teachers zy ta thotlâh khih achaki chaipa lia taihta pachupa ta y bâ ei ta, India râh pôhpalôh liata one education system hmâpa ta school mohôh khaipa a châ ha bâ. Cha vâta, a kheihawhpa su liata rai y  sala, achuna su he peimawh chai khao leipa ta, a chyhsa pachutuhpa he peimawh chai ta, cha vâta he Siaha College tawh heta student zy ta IAS, MCS, Competitive Exam hlaotloh awpa ta ei châ vaw hnabeiseih aw ei.

Achuna education he râh pachha nawpa, chi nata râh a bo nawpa a châzie nama my lei awpa ta ei châ haw ei. Siaha College tawhta India main stream liata namâ hlao thei ha tahpa pahno u la, nama Information Technology he nama hmâh phahnai kaw awpa a byuh. Adona, ngâchhihna nata tiamana hmâpa ta thytliazy nama value system he nama pahro lymâ awpa ta ei châ haw ei.

Ei châ ly kaw ei.

Puhpa B. Dawpho, The Times of Maraland, Editor nata Beirachhitha Bohia, Assistant General Secretary, MSO (HQ) zy chhao he programme he amâ vaw hlao thei hra.

CEM nata Dy. CEM, MADC he Official lâ tawhta Puhpa Syuhlô Beichakhei Mara, PS to CEM, Puhpa Pawsa Lava, AITO nata Puhpa T. Pabua, Cameraman zyta ama chakaochahlâh.

Dr. V.B. Nopha, Assistant Professor ta vote of thanks reina a hnei khai tawhta daihti pachhâsapa a châ.

ISSUED BY:

Information & Publicity Department

Mara Autonomous District Council

Siaha.