PRESS RELEASE 

NO.19/2023

TÔKALÔ, 28 Nawh, 2023, Pachynoh - Atanoh kha Tôkalô khihsawzy ta Tôkalô Volleyball Court liata Puhpa M. Laikaw, CEM a châpa alykheina nata palyupalihna daihti pha kawpa ama hmâh.

Zâhnia târi 27.1.2023, Chutynoh khata Puhpa M. Laikaw, CEM he Siaha tawhta Tôkalô khi pangaipa ta sie ta, lâpi liata a chapiapa khihzy ta a rônah kawpa ta vaw y dy laih lymâ ei ta, zâlâ dawh 3:30 Pm pa ta Tôkalô khih he angia ta, Tôkalô khihsawzy ta Volleyball Court liata rônah kawpa ta parotheipa; Chiamie, Meithei etc. zy parosapa ta vaw dy ei ta, welcome programe chyupa ahmâpa a châ. 

Atanoh dawh 10:30 Am liana kha ta Tôkalô Volleyball Court liata CEM alykheina nata palyupalihna programme he ahmâ pazaopa châ ta, Puhpa S. Beima, VCP ta programme he chhihthapa ta, Rev. Joseph Hlychho, ECM Tôkalô biatuhpa ta devotion hmâh ta, MTP Choir, Tôkalô zy ta thai kawpa ta hla ama paryh.

Hmosai piena daihti ahmâ pazaopa châ ta, VC, MTP, MCHP nata MSO Branch, Tôkalô zy tawhta nata Primary School, Middle School, ECM nata CCI (M) Tôkalô zy tawhta alykheina châta CEM nata a lapinô hnoh ta hmosai piena daihti hneipa a châ. 

Puhpa M. Laikaw, CEM chata biereina daihti hmâh ta, "atanoh Tôkalô khihsawzy ta eiphuh leipa palyupalina nata CEM ei vaw châpa alykheina nama pachhuapanohpa he arônah tah na ta, nama zydua chô liata alynabie ei reih hmeiseih. Râh chakaona liata eivaw y tawhta he hawhpa palyupalihna he dao beih leipa na ta, atanoh liata he hawhpa palyupalihna eivaw topa he aly ngaita kaw na ta, nama zydua chô liata alynabie ei reih hmeiseih.”

“Tôkalô bia ta MADC liata CEM eima to theipa he Abeipa Khazoh ngiachhiena vâ deita châ ta, Abeipa lâ ta alynabie reih su vy. Election no ta thapi phia ta a chatôh hra ei si la, eima daihti khô chiehpazy kha my khaipa ta, Party politics zy eima palôru liata y khao leipa sa la, eima khih nata râh hmahsie nawpa ta palôru pathaih kawpa nata hriaparaohna pha kawpa hnei chyu awpa ta eichâ haw ei.”

“Khazohpa khona dâh hawhta nata Mararâh hmahsie lymâ nawpa ta rai ei hria thei nawpa ta eina deichhy awpa ei chi nata nama thlahchhâna liata khâ einâ thei thlâh awpa ei chi ta ei châ haw ei.”

“Sawhkhâna thiepa eima vaw padua pataw nahta eima biepipa châ ‘Mararâh thiehpa’ (New Maraland) tahpa he a châ. Abeipa Khazoh angâhchhâna chô ta Mararâh chhihtha achhuah pi ta, eima Missionary nahzy hmâpa ta Abeipa Khazohpa ta byhnâ maniah pie ta, District Council eima hneipa chhao he Abeipa byhnâ rônah ngaitapa eima topa a châ. Chavâta MADC liata akhokhei patluana tlyma, apathluahnazy tlyma y leipa aw ta, sawhkhâ alâpahlie (Transparent) kawpa ta he sawhkhâ he sie eimâ chhuah.”

“Khih nata tlâh hmahsie nawpa ta eima pathipalôru apahy chyu si la, eima chhôhkha chyu hmahsie thei nawpa ta patuapaluana phapa hnei chyu si la, palôru pathaih kawpa ta hmahsiena lâthlôh pangai awpa ta ârapasua awpa ta ei châ haw ei.”

“Achuna (Education) lia chhao ta hmahsie achhuah chyu si la, châ thaipa papua awpa ta Tôkalô khih liata pachutupa rai ahriatuhpa (Teacher) zydua chhao tiama papua awpa ta châ haw khoh ei na ta, hri-iah pathaihna (Health) lia chhao ta hmah eima sie lymâ thei nawpa ta hmahla chyu suh vy.”

“Khazohpa tovyuh, ‘suhraw sukha’ piena kyh liata hmasiehna lâ pangai awpa ta châ haw khoh ei na ta, Abeipa eih achâpa vâta suhrawh sukha he Abeipa tawhta byhnâ eima hmôna lâpi peimawh kawpa a châ tahpa my leipa ta, suhrawh sukha he âdo kawpa ta vaw pie lymâ awpa ta eichâ haw ei.”

“Pathipalôru miakha phaona chô ta eima khih nata râh hmahsie nawpa ta reiraoh kawpa nata tiama kawpa ta hmialâ sie lymâ awpa ta châ haw ei na ta, khokheina sâh chaipa ei cha hlâ ei" tahpa ahawna nata pasyuna bie pha kaw a reih.

Puhpa M. Laikaw, CEM palyupalihna nata alykheina programme liana heta MADC Elected Office holder tawhta Puhpa T. Seidô, EM i/c Sports etc, chhaota bietana pha kawpa reih ta, hla sa thaipazy ta hla ta zawpi ama palôpahawh hra. 

Puhpa HC. Beichhuady, VC Member, Tôkalô ta alynabie reina hnei ta, Tôkalô khihsaw zy ta CEM thiehpa alykheina châ ta zâpati ama pachhuahpanohpa cha aly kawpa nata thapha kawpa ta khichhai lâ tawhta ahlaopazy nahta khichhôh liata apahrâpazy ta ama dô lâh.

Puhpa M. Laikaw, CEM  zachhihpa he a lapinô nata sawzy hleikhô ta Elected Office holder tawhta Puhpa T. Seidô, EM i/c Sports etc., 

Puhpa Beirahmô Syhly, EM i/c RD etc., Puhpa  Tiahlei Syuhlô, EM i/c Forest etc., nata Puhpa M. Chiadung, Chairman, Town Committee zy hleikhô ta MADC Official lâ tawhta Officer nata Staff thokhazy ta ama chakaochahlâ.

ISSUED BY:

Information & Publicity Department

Mara Autonomous District Council

Siaha.