Ahmiatua ta daihti nata tlâna phapa na pietuhpa eima Khazohpa hnohta alyna bie reih na ta, Mara Autonomous District Council - ry liata Pachutuhpazy nata nama hrialâhpazy, achuhaipa zydua nama tiamana nata hriapasana zydua vâta nama hnohta palôh hmeiseihpa ta châly ei na ta, Teachers’ Day Samaw ei cha hlâ ei.

Pahno chyupa hawhta Teachers’ Day he India President panona Dr. Sarvepalli Radhakrishnan - apina noh athei thlâh n’awpa India sawhkha ta kô tota târi 5th Thlarâh thlapa liata eima hmâh tyhpa a châ.

He noh he Siku Pachutuhpazy dei châ leipa ta achuhaipazy nata India râh liata chyhsa hluhpizy ta Pachutuhpazy liata aly kawna chôta palyupalihna eima hlâna daihti rôhna ngaita pa a châ.

Khizaw liata eima pahrâh chhôh heta achuna he achhâ thai rima awpa châleipa ta; eima thi noh dei he eima chu pachhâh noh a châ. Chavâta Chyhsa to hrochhôh lâthlôh awpa cha Pachutuhpazy ku liata â pahnieh hmeiseih. Achuna nata pachuna phapa ta hmâhsiena phapa miah pie tyh ta, Râh hmâhsiena thaby chaipa chhao Pachutuhpazy ku liata a y hra.

Dâh nata phôh thaipazy thaina cha Châbu liata ropa châ ta, Dawhtyzy thaina cha atlâh leipazy chô liata eima hmô hra. Pachutuhpazy hriapasana nata thaina deikua cha chyhsa to palôhrupa nata lathli liata pasopa châ ta, ama hlaotlohnazy cha achuhaipazy liata alâ ta; ama tao chheinazy chhao chyhsa to chô liata hmo thei awpa a cha tyh. Chavâta Pachutuhpazy he Phopi paduatuhpa châ ei ta, râh hmâhsiena thaby chaipa ama châ.

Eima Beipa Zisu Krista cha Pachutuh rôhna chaipa châ ta; ahrozie tlaita maniah pachupa a châ. Chatanachata Hatipa cha asie n’awpa lâthlôh dopa liata pachupa ta ahrochhôh ta asiesai lei awpa zie chhao eima Bible ta asia ngaitapa ta maniah a chho hrapa a châ.

India sawhkha ta pachuna phapha apeimawhzie pahno ta; achuna liata hmâh eima sie via lymâ thei n‘awpa ta Scheme - chi nano nanopa hluhpi chhao tao ta, hmah ala lyma hra.

Marasawzy pi he Abeipa ta sai maniah hei ngaita ta; chatanachata England râh tawhta Missionary - maniah kawtuapa ta, Thâtihpha ta maniah ama kaw pakhaihsa. Sawhkhâ ta a pykheipa châ hravei sala Lorrain Ville, Saikao liata Primary School - cha kô 1908 lia khata eima Missionary - zy phahnai ngiahna zawhzi ta paduapa a châ haw. Chatanachata Rev.R.A. Lorrain nata achhôhkhazy ta hmo hlupi maniah ama pachu ei ta, Marasawzy châta cha R.A.Lorrain nata achhôhkhazy he Pachutuh rôhna ngaitapa ama châ tah leithei awpa châvei.

Atanoh he Marasaw pachutuhpazy hry liata hlaotloh ngaitapazy ama rohnazie ei paloh liata thata alâ ta, âmo vâta eima râh he aboh ta, a hmâhsie lymâ hrapa a châpa ta pahno na ta, ei ly ngaita. Mara râh liata Pachutuh phapa hluhpi hneipi ta; Puhpa A.Zakia nata  Dr.S.Hrachu ‘L’ zy chhochhi cha Primary Pachutuhpa dei ta ama châ tarawpa ta ama hlao atloh ngaita. Ama thâtih chhao rei awpa hluhpi eima hnei chyuna ta ei pa ngiasa. Aly â chhih hmeiseih.

Abeipa ta Mara râh sai aheizie he arôhna ngaita. 

Pachutuh phapazy ta khitlâh nata râh châta thei phapa patheisa ei ta, pachutuh pha leipazy deikua cha Khitlâh parao-pakei ei ta, chi ama chhih ngaita. Achuhaipazy ama daihti hluh via cha ama Nô nata Pawzy kiah lia hlâta Pachutuhpazy kiah liata hmâh hluh via ei ta; chavâta pachutuh phapa nata pachuna phapa ama ngiah ngaita tyh. Pachutuh phapazy cha achuhaipazy châta Nô nata Paw phapazy châ ei ta; Achu haipazy hlaotlohna nata khitlâh phapa paduana kyh zydua chhao he Pachutuhpazy hriapasana nata maohphaona a châ. Pachuna phapa nata Pachutuh phapa ta Khitlâh phapa nata khochhihpa tao ta, hmâh apasiesa. Pachutuh pha leipa deikua cha chyhsa hluhpi parao ta; râh hmia haopa a châ tyh. Chavâta Pachutuh phapazy he râh phapa nata hmâhsiena thaby chaipa ama châ tah leithei va na.

Mara râh he râh hropazy pachapa ta reikhi tloh leipa nata chyhsa chyh ta pahrâna a châ. Chavâta Pachutuh phapa nata achuna phapa angiahpi ta, cha cha eimâ bohna nata hmâhsie n’awpa thaby chaipa chhao a châ hra.

Pachuna phapa cha râh hmâhsiena thabypa châ ta, pachutuh phapazy he za achhih ei ta, palyupalih tlâh chhao ama châ hra. Hrozie tlaita pachuna phapa apiepa tuhpazy cha rohna ei ta, za ama chhih ngaita tyh. Pachutuhpazy cha khatai suh lia raita za achhihpa ta, ama rôhna ngaita awpa a châ. Chatanachata Pachutuhpazy he Phopi paduatuhpazy châ ei ta, ama hriapasana theilâpazy cha chyhsa hluhpi hnohta hmô thei awpa a châ tyh.

Nama zydua ta Teachers’ Day  Samaw cha hlâ chanei ei na ta, Pachutuh phapa nata achuhaipa hlaotlohpa châ lymâ chyu awpa ta khokheina ei cha hlâ ei. 

Râh châta nama deichhy haipa,

N.ZAKHAI

Chief Executive Member       

Mara Autonomous District Council

Siaha : Mizoram – 796901.