PRESS RELEASE
NO.122/2023
By: Puhpa T. Seidô,
Executive Member i/c Sports & Youth Services etc.
Mara Autonomous District Council, Siaha
“Bei Zisu Krista khizaw liata a charei no hawhta châna rônah ngaitapa 'PACHUTUHPA' rai a hria pazaotuhpa zydua saih u, atanoh ta nama noh peimawh ngaitapa atyhheihnanoh eima vaw tlô thei heihpa vâta a ly ngâsâ na ta, nama zydua hnohta anaohna pathaih chaipa ei cha hlâ chyu ei.”
“He daihti a tlô thei khao leipa, thina lytlâh maniah a khôsai hapa zydua hnohta chhao palôh hmeiseihpa ta taokheina ei hlâ chyu hra ei. Tlâhleina vâta Hospital liata daihti a hmâh hai penawh zydua chhao, he noh rônah ngâsâpa nama vaw hmâh thei hra leipa vâta palôh hmeiseihpa ta ei cha taokhei hmeiseih ei.”
“Eima râh ta Pachutuh penawhzy ei chi he za namâ chhihna hawhta nata palyupalih tlâh nama châna hawhta cha palyupalih thei ma pi, apei ngaita kaw. He zydua chhao he, eima râh liata zohna a pai khai mâh leipa vâta châ via chai ta, miah nama vaw pahnothai chy awpa ta he râh zawpi vyuhpa ta ei châ haw ei. Chyhsa zohna tawhta khaihna lâ ta a chhihthatuhpa nama châna he a rônah ngaita kaw. Sawhkhâ rai hropa a hria penawhzy hawhta nama dawkâh zy he rônah vei hra sala, châ peimawhpa zy pahawhsapa ta (file pending) a y thai leipa dawkâh a vaotuhpa zy châ ei chi ta, za namâ chhih hmeiseih.”
“Atanoh, he nama noh 'TEACHERS’ DAY' peimawh ngâsâpa siepahliepa he ta, Mararâh liata Pachutuhpa zydua zana a sâhchaipa cha hlâ chanei heih chyu ei na ta, râh zawpi ta nama hriapasana nata tiamana zy nata namâ piekhaina zydua pahnopasiapa ta pahnothai khai mâh to vei hraw si la, Abeipa Khazohpa ta hmoto pahno ta, byhnâ reitiahlei a cha pie cheingei thlyu aw ei tahpa he khâchâ â ngiapâ na ta, ei thlahchhâna chaipa chhao a châ.”
“Nâmo vâta Mararâh zohna he vâro vaw pavâ ha ta, atahmâ cha Officer zy, Pastor zy, Politician zy nata Contractor zy vaw pua hôlô bâ ei ta; he nah zydua hlaotlohna he nâmo pachutuhpa zy hriapasana theilâpa sai a vaw châ. Mararâh châta byhnâ reitiahlei nama vaw hriapapua haw, aly’pa a châ ngâsâ. Mararâh zawpi, apahchaipa ta thyutliapazy pi he ta nama hriapasana zydua he vaw my chacheita leip'aw pi ta, eima vaw pasô via rili lymâ aw.”
“A chhâchaina liata cha, khopasa tu ha na vâta reipachhiena zy hleikhôta nama palôh eima cha vaw pasasana zy nata eima ch'aw deichhy thai leina zy kao hluhpi a vaw y ngyuthei aw. Cha zydua cha, hnabei a padyna châta hmâh thlâh ha leipa ta, eima Beipa Zisu Krista lâthlôh a châ tahpa athei thlâh ha na chô ta nata namâ chhuahna 'goal' khâ a thei thlâh hâhna chô ta hmialâ tiama kawpa ta râh châta tôh lyhlia lymâ heih chyu awpa ta eimâ pasyu chanei hmeihseih.”
“Abeipa Khazohpa hmoto ataotheituhpa nata hmoto apahnotuhpa hnei pi ta, Ano lia khâchâ apahniehpa ta, thlalôh kawpa ta adona nata ngâchhihna zy vyhphao nata chaihhrai châta hmâh ei sila, tiama kawpa ta hria hualua chyu ei suh vy.”
“Abeipa ta Mararâh liata Pachutuhpazy hnatlâna phapa piepa ta, cha hrôbieh chyu ei sa la, byhnâ hluhpi ta cha vaohei chyu mawh ei sy.”
ISSUED BY:
Information & Publicity Department
Mara Autonomous District Council
Siaha.
(Dated Siaha, the 5th September, 2023).
