PRESS RELEASE

NO.24/2023

SIAHA, 3 Hmypi, 2023, Chutynoh - Atanoh dawh 1:30 Pm pa ta Siaha District Football Association (SDFA) chhituhpazy ta Puhpa JH. Beihnai, Sports & Youth Officer, MADC a office chhôhpadâh liata palyupalihna ryuchâ ama hlâ.

T. Cassidy, Treasurer, SDFA chata SDFA â vaw duah tawhta atahmâ ta palyupalihna ryuchâ Puhpa JH. Beihnai hnohta ama hlâpa he a eikhana a châ hleikhô ta nata SDFA â vaw duah tawhta Puhpa JH. Beihnai hmahlakheina vâta Beinô Football Academy ama hnei theipa a châzie nata amâ lyzie a reih.

Puhpa JH. Beihnai, S&YO, MADC chhaota SDFA ta palyupalihna ryuchâ ama vaw hlâpa â lyzie reih ta, SDFA hmialâ ama kaw sie laih lymâ nawpa liata a palâ kawpa ta ama sie thei lymâ nawpa ta khokheina a hlâ hra ei.

Palyupalina ryuchâ liata he hawhta ama roh, "Mara thyutliazy football liata hmah eima sie via lymâ thei nawpa ta na hriapasana nata nâ pasaina zydua he a rônah tah pi ta, eimâ ly ngaita kaw. Thyutliapazy châta na hriapasana liata Abeipa ta sona novâhna cha pie sala, nâma nata na chhôhkhazy thatlôna cha pie via lymâ mawh sy" tahpa ta ama roh.

Atanoh palyupalihna ryuchâ hlâ awpa ta SDFA chhituhpazy a vaw hlaotheipazy cha: Puhpa VT. Martin Vabeiduakhei, President, SDFA, Puhpa KT. Neikha, Vice President, SDFA, Puhpa F. Vanlalmuanpuia, Honorary Secretary, SDFA nata T. Cassidy, Treasurer, SDFA zy ama châ.

ISSUED BY:

Information & Publicity Department

Mara Autonomous District Council

Siaha.