PRESS RELEASE

NO.15/2023

SIAHA, 24 Nawh, 2023, Hriaheinoh - Atamy dawh 11:30 Am kha ta Revd. NC. Vabeilua châbu ropa “Bierai liata Chapawzy” nata paliepa “Molei chaipa chôta ngiachhiena reitiah leipa” zy cha MADC E & F Conference Hall, Siaha liata palâhâhpa a châ.

Pihnô Nazee Khailah, Sr. EO & Secretary, BML, MADC ta chhihtha ta, Rev. K. Beisa ta Devotion daihti hmâh ta, Laihsa B. Beihruaki ta mopakha hlasana a hnei.

Châbu sâkhana “Biehrai liata Chapawzy” he Puhpa M. Laikaw, CEM, MADC zachhihpa ta palâhâh ta, châbu sânona “Molei chaipa chôta ngiachhiena reitiah leipa” cha Puhpa K. Hrahmô, EM i/c Revenue etc. MADC zachhihpa ta a palâhâh.

Puhpa M. Laikaw, Hon’ble CEM ta biereina daihti hmâh ta, atanoh liata Châbu palâhâhpa a châpa he daihti ngiatlâh a châpa a châ tahpa reih ta, aly â chhih zie a reih. Châbu he aroh tuhpa ta roh ta, a reih tuhpa y tyh lei pi ta, pei ei tah kaw; HoD, officers & staff zy ta eima Mara Opi miah achhaipa châbu rohtuhpa deichhy tah, palâhâhna programme liata ahlao lymâ awpa ta pasyu ta, District Council he eima Mara identity zawhzi ta ahmôpa eima châna hawhta Mara Art & Culture hmahpasiesa si la, châbu rohtuhpazy eima deichhy lymâ awpa he apeimawh kaw tahpa a reih.

Marapazy pi he eima thâtih sianôpa pahno awpa ta châbu hnei chyh kaw pi ta, khichhaipa NE. Parry ta The Lakhers a vaw rohpa nata mo hropazy ta Marapa thyutôna ama rohpazy ta ei dâhphi papai vei; châthaipa Marasaw hluhpi y ha bâ pi ta, keimo tlai ta eima thâtih eimâ roh â daih haw; he atanoh châbu release he ta pahaona miah pie sa la, Mararâh châ nata lôbô atao awpa ta hrochhôh ta châbu sâkha chhâ roh chyu awpa ta ahawna a tao. Châbu he eima reih hoh leipa chhao ta chalei chyu si la, he châbu he ta Chi & pho châta ngâchhihna miah pachu sa la tahpa reih ta  Author chhao hnatlâna phapa hnei lymâ awpa ta khokheina hlâ ta, châbu vaw roh via lymâ awpa ta a pasyu; ahyrai châbu arohpa maih MADC ta eima deichhy lymâ aw tahpa ta CEM zachhihpa Puhpa M. Laikaw chata pasyuna bie pha kawpa a reih.

Puhpa K. Hrahmo, EM i/c Revenue, MADC zachhihpa chhao ta châbu release-na daihti a hmâ khai tawhta biereina chyupa daihti hmâh ta, zawpi avy pakhypazy hnoh ta alynabie reih ta, Author he thyutliazy pahno thai kawpa ta Khazohpa bietana a reih athaipa a châ tah ta, pastor pension tawh chhao ta châbu a vaw roh theipa kyh liata reithai tlâh a châ hmeiseih tah ta, hmialâ daihti liata tiama via lymâ sala, ti nata râh châta hria via lymâ awpa ta ahawna a tao.

Eima Missionary nah nôvah ta thâtihpha miah chho leipa ei sa la, Krizyhpa cha châ aw pi ta, Vârâh cha eima kiah pyly aw. Anodeikua Lôlei Missionary ta tly ma miah kaw pakhaih sa la, Mara reih châropa he eima hnei nahta pangiasa va na; Hiakha Baptist Missonary ta thâtihpha miah chho sa la, Mara reih he atahmâ eima cheih khao nahta pangiasa va na; RA. Lorrain he ta â chhuahpa la Mara reih miah pahneisa ta, Mara reih ta Khazohpa achhy tah, Marasawzy chi nata pho hawhta aduahpa ta Missionary tuapapua hra awpa he â chhuah chaipa a châ nahta ei pangiasa kaw. RA. Lorrain zawhzi ta sapa nata thlahpa liata byhnâ thata eima to; Chi nata Pho ta miah a paduapa he arônah ei tah hmeiseih.

Vaili mahpaw ta Mara chi nata pho thapasana vâta Pakao liata a mothlih a pathla pâ ngâpazy athei thlâhna chô ta Mara chi nata reih paleiseihsa ta eima reih chei lymâ awpa he Mara chi nata pho abohna peimawh ngaitapa a châ tahpa reih ta, Author Revd. NC. Vabeilua hnoh ta alynabie a reih chanei.

Châbu mâzy he sâkhana Rs.350/- châ ta, sânona he Rs.150/- a châ. Achalei khohpazy châta BML office, MADC nata Author liata pado theipa a châ.

ISSUED BY:

Information & Publicity Department

Mara Autonomous District Council

Siaha.