PRESS RELEASE 

NO.42/2026

Siaha, târi 13 Patô, 2026 (Pakhynoh) - Atamy dawh 6:30 AM liana khata RGSA centrally sponsored scheme tawhta Siaha District liata Village Councils (7 VCs) zy hnohta Computer Set raina programme cha  Prof. Lalnilawma, Hon'ble Minister, RD & AD, Gov't of Mizoram nata Puhpa K. Chhuabei, EM LAD, MADC zy ta ama hmâkhei.

He Computer Set raina programme he Golden Jubilee Hall, MADC liata ahmapa châ ta, Pihnô S. Lalmuanpuii, Sr. LAO, MADC cha Chairperson châpa ta programme a chhihtha.

Dr. Lalngura Tlau, Director, Dte. LA, RD&AD ta Keynote Address hneipa ta , "Kô 2018 tawhna khata RGSA part - l , Grassroot Level administration tha patlô awpa ta Capacity Building Programme ry liata VCs hnohta Computer Set piepa a vaw châ ha. Atakô liata cha VCs - 98 hnota piepa a châ aw. Mizoram chhôh liata 830 VCs y ta, 99 VCs MADC Area liata a y. 425 VCs zy ta Computer Set he dao mâh leipa ei ta, he adao mâhleipazy hnoh chhaona heta pie pazao lymâ pa a châ aw. Atakô liata he hawhta Computer Set raina programme taopa a châna chhâpa cha; kô hropa liata vaw raih tyh pita, VC thokha ta ama dyhkha/mo pakha eih hawhta âvaw vaopazy ama ypa vâta, he hawhpa a y khaolei n'awpa pachâna vâta atakô cha âlâhâh pata raipa a vaw châ", tahpa ta a reih.

Puhpa K. Chhuabei, EM, LAD, MADC ta biereina hneipa ta, " Atamy liata 7 VCs hnohta Computer Set pie awpa a vaw châna liata Prof. Lalnilawma, Hon'ble Minister, RD & AD nata RD & AD liata ahriatuhpazy hnohta alynabie ei rei. VCs zy ta Computer ama vaw dao tuapa kha daihti rei a vaw sie hapa vâta hmâthei awpa vaw châ tlâ khaoleipa ta, atamy liata 7 VCs zy ta Computer Set nama dao awpa he châ lykhei ei na ta, phahnai kawpa ta hmâ chyu awpa ta khokheina ei cha hlâ ei". 

"Minister thatlô kawpa ry liata LAD ta hmahsiena thatha hneita, keimo LAD, MADC chhaota thatha hmahsiena hneipa ta, ama khokheina zawhzi ta RGSA ry liata VC Court House sâno sa  hapa châta, atahmâ he sâno sa ngâpa a châ hra. Atahmâ daihti liata cha Computer leipa ta raihria ru ngaita ta; eima District liana heta Computer ahneileipa VC ama hluh ngaita pa vâta Computer rai heihna daihti liata cha District hropazy hlâta miah khokhei via awpa ta ei châ haw ei. ADCs Area liana heta DUDO hnei leipa pita, SDO Sadar he nodel Officer châta raopa châ ta, he no na heta amô hra ama rai vâta bua tlôh ei ta, LAD Sanitation heta DC nah nata hriapakao pata, atahmâ ta Puhpa M  Laikaw, CEM chhihthana ry liata Sawhkhâna asie ngâpa chhao heta pathaihna liata thapi phiapa ta; District ataopasuana liata lymâ sâthôhna, sânona nata sâkhana zy vawla ha pita, he vâ chhaona heta khokhei theina kao liata cha miah nama khokhei awpa ta ei châ haw ei". 

"Achhâ chaina liata ei rei khohpa cha, eima Minister hryta, Aizawl liata Officer Laipazy hryta, eima District liata HOD thokhazy chhao heta District Council he miah pahnopasia leipa ei ta, Department sâkha hawhta miah pachâpa he ama y. ADC he India constitution ry liata a pihpa, State nata UT zy hawhta ryureina nata biehneina a eihpa ta a hneipa a châ. Sôh kho hawhta hmâ awpa eima hnei leipa vâta nata Revenue Sources eima hneipha leipa vâta kho hawhta rai a hria thei leipa tlâ eima châ. District Council he State Sawhkhâ liata âpahniepa eima châpa vata State Sawhkhâ a pha khiah; District Council liata ahriapazy, Awnanopa liata ahriapazy nata nohto ku raihria ta nie âtluapazy eimâ ly tyh. He vâna heta atamy liata eima Minister nata Officials zy chhao District Council hmahsiena awpa he kha miah nama pachâkhei tyh awpa ta ei châ haw ei," tahpa ta EM ta a biereipa a pachhâsa.

Prof. Lalnilawma, Hon'ble Minister, RD&AD ta 7 VCs hnohta Computer Set raina hneipa ta biereina a hneipazi , "Atahmâ eima Khizaw liata Computer he peimawh ngaita ta, Minister, Officer, VCs nata kao nano nanopazy liata ahriapazy heta Computer eima hriathai leipa khiah eima raihriana liata hmahsiena hneithei khao mapi. He vâna heta VCs nah chhao heta Computer he hnei ei sala, Ministry, Departments zy nah ta information a chatliepa ta apiepa ta, hmahsiena rai hriana kyh liata hmo phahnai ngaitapa a châ awpa vâta he RGSA scheme ry liata VCs zy hnohta Computer Set raina he hneipa a châ. VB-G RAM G liata ângia awpa eima châpa vâta atahmâ ta a peimawh chaipa cha internet ta apazaopa ta Computer he eima hmâ phahnai awpa he a peimawh ngaita bâ. BADP tahpa kha VVP ta thla hapa vaw châ ta, he scheme ta a pachâ peimawh chaipa cha internet connectivity he a châ. He a châ nota Khih thokha  internet facility y leina khihzy y ta, he he State Sawhkhâ nata a ADC hawh chhaota internet facility ama hnei theina awpa ta hmah eima la awpa a byuh". 

"Grassroot Level (VC Level) politics eima la pasa tuhpa heta hmahsiena raihria liata rairuna miah a tlôkhei tyh. Election daihti liata cha eima Party thatlô theina awpa ta thapi eima phia awpa tlai a châ, châhrasala election khô tawhta deikua cha eima râh hmahsiena pachâpa ta lôraoh kawpa ta tlâ hriakho heih awpa he keima pachâzie cha a châ. Kheihawhpa rai vaw châ sala, District Council nata State Sawhkhâ he amo panano leipa ta hriaparaohna phapa he eima hnei awpa a peimawh". 

Grassroot Level administration, VC he peimawh ngaita ei ta, ama peimawhna hawhta atanoh he ama châpha tlyma?. VC nairu he âlyulei thei kaw, thokha VC Court House pha kawpa ama hnei nota thokhazy Court House diekua kho âkhilei kaw. Centre heta VC ta Own Sources of Revenue he ama hnei awpa a khoh. VC Court House nata Sawhkhâ Building hropazy chhao châ sala, a mohôh pazi n'awpa sôh he a eih hrahpa ta a yleipa vâ heta VC ta a kheihawhpa tawhta chhie lapa ta, cha soh tlohpakhypa tawhta a mohôh pazina liata ama hmâ thei awpa he a châ. Atahmâ cha Mizoram Sawhkhâ ry liata, ADCs pahly leipa ta Village Council Act thiehpa hnei pita, cha liata cha 'VC ta ama ôna (area) chhôh liata chhie la theina power ama hnei'. He hawhna heta, atahmâ cha District Council ôna chhôh VC ta Own Sources Revenue hnei theina awpa kao pachâpa ta   eima palôh chhao eima hmâh awpa a byuh kaw bâ. Atamy liata programme pha kawpa eima hnei theipa vâta nama zydua chô liata alynabie reih nata, râh hmahsiena châta thapi phiakhoh lymâ awpa ta ei cha hrua ei. Ei châ ly kaw ei", tahpa ta Minister ta a biereipa a pachhâsa.

Computer Set adaopa VCs zy :-

1) New Siaha East - I

2) Old Tisopi

3) Siaha Vaihpi - II

4) Vahia

5) Iana - I

6) Laki - II

7) Siasi

Puhpa ST Lalhmingmawia, D(P), Dte, LA, RD & AD  ta Vote of Thanks reina hneita, programme pachhâpa a châ.

ISSUED BY:

Information & Publicity Department,

Mara Autonomous District,

Siaha.