PRESS RELEASE 

NO.52/2026

Siaha, târi 23 Chhiepa, 2026 (Hriaheinoh) - Atanoh dawh 12 : 00 Noon liana khata   Siaha District chhôh liata Village Councils 71 zy hnohta Computer Set raina programme cha MADC Golden Jubilee Hall liata a hmâpa châta; Puhpa M. Laikaw, Hon'ble CEM, MADC,  Puhpa K. Chhuabei, Hon'ble EM (LAD), MADC nata Puhpa VL. Hruaizela Khiangte, DC, Siaha zy ta ama hmâkhei.

Local Administration Department, MADC pachhuahpanohpa ta Computer Set VCs zy hnohta raina programme liata Pihnô S. Lalmuanpuii, Sr. LAO, LAD, MADC cha Chairperson châpa ta programme a chhihtha. Rev. F.   Vanlaldika, Moderator Elect. ECM Assembly ta Bible Ephesi 2:10 reina hneipa ta Khazohpa hnohta apavaosana daihti a hmâ. 

MADC Golden Jubilee Hall liata computer raina programme liata CEM Puhpa M. Laikaw ta biereina hneipa ta, "atanoh computer set 71 raipapua thei awpa a châpa he aly achhih kaw ta, Computer Age liata computer hnei theileipa eima y no ta, set 71 tlaita rai thei awpa a vaw vaw châpa he eina palysa kaw , LAD liata hriatuhpenawh ama hriapasazie a palâsa hmeisei."

"Atahmâ cha Digital Era liata y habâ pita, Type Writer daihti chhâ hata, Computer Age lia chhao hmahta Artificial Intelligence daihti a châ habâ. Atanoh ta Chairperson ta a reipa hawhta eima district he khokheina dao hluh kaw pita, Minister Prof Lalnilawma chô liata chhao ei ly hmeisei. Atlia liata Siaha a vaw tly nona khata  ano tlaita Computer Set sâ 7 vaw raih hata, tahmâ Set 71 rai thei heih awpa a châpa he ei ly hmeisei. He hleikhô ta kao nanonanopa liata MADC maniah khokhei tyh tuhpenawh Mizoram Chief Minsiter nata ahrialâhpazy hnohta alynabie MADC vyuhpa ta ei rei hmeisei. Minister nahzy ta Siaha ama vaw tly maihta, ama sie tawhta, daihti rei leita liata a theilâ hmô awpa a y tyh. Atlia liata Health Minister Pihnô Lalrinpuii ta Siaha vaw tly ta, Nursing School chhao thlaita pahypa a châ hr'aw tahpa ei hnabeisei."

"Atahmâ cha MADC liata ahriapazy chhao eima pachâna liahsa ta pitlo habâ ta, hmialâ nota MADC property zy chado lei kaw ta ama hmâh tyh pazy chhao kha hmô awpa y khao leipa ta, keimo Private Property hawhta daodo kawpa ta eima hmâh pathao habâ, a ly âchhih hmeisei. VC nahzy chhao nama term a vaw chhâ tita, nama hnôhla ta a vaw y awpa VC nahzy ta ama hmâh thei n'awpa ta a pha kawpa ta mohôh ula, tahpa he ei châ haw ei. Râh hmahsie awpa ta Grassroot level liata ryureituhpa VC nahzy nama peimawh hmeisei, hmahlana hmoto liata nama ku lia a pahnie ta, chavâta , a sohsi kawpa ta, tiama kawpa ta nama rai hria u la tahpa he ei cha pasyu kho hra ei" tahpa ta CEM ta VCs zy hnohta pasyuna bie pha kawpa a rei.

EM (LAD) Puhpa K. Chhuabei chhaota biereina hneipa ta," atanoh ta computer set 71 rai awpa he ₹35 lakhs mâpa châta, he lâchhâ ta hmah maniah la kheituhpa RD Minister Prof Lalnilawma hleikho ta Directorate lâta hyutupazy hnohta ei ly hmeisei. LAD EM ei vaw châ tawhta a daoh lymâ pita, RGSA ry liata hmo ama rai tyhpazy eima district maniah khokhei hr'awpa eimâ hawnazy cha Sawhkha lâta hyutuhpazy ta maniah pachâ peimawh ei ta, atanoh liata ahlaotlohna Computer Set rai thei awpa a vaw châpa he ei na palysa hmeisei."

"Atanoh he Computer Set nata Printer VCs âvypazy eima charai awpa châta, Computer nama thai nata thai lei cha pahno leipa pita, chavâta, nama châ ta Computer training zy chhao pachhuahpanoh a chhuahpa châta, a daihti deikua he tawhta information eimâ pie awpa châ sala. Tahmâhlâ khizaw lia cha Computer leita rai a hria thei hmeisei khao leipa ta, chavâta,  a pha kawpa ta mohôh awpa ta ei châhaw ei. He hleikho ta, a dao mahleipazy chhao tahmâ Puhpa M. Laikaw sawkhana ry liata nama dao theina awpa ta hmah eima la lymâ aw"

Deputy Commissioner Puhpa VL Hruaizela Khiangte chhaota biereina hneipa ta," Siaha he a pahneituhsa kawpa châ na ta, biezy chhao he eima pha n'awpa a châ awpa khiah phihzâh leipa ta reih tyhpa ei châ. Atanoh he Computer eima rai awpa châta, hmahsiena he achychyh ta eima hnei awpa a peimawh kaw. Ei khapi ta Chyhsapa pi he asosâh  thei leipa pita, a chychyh ta hmahsie chyu eimâ chhuah awpa a peimawh kaw."

"India heta 2047 liata 'Developed' rah châ a chhuah kaw ta, Khihpi ngâlâh developed sala Thotlâh khih lâzy asosâh hleilei khiahla 'DRâh developed pa tloh lei ta, Developed Country châ awpa ta châ Khi chaki chabâzy taih âsosâh khai awpa he byuh. Atanoh ta Computer Set adao awpazy he Grassroot level liata rai a hria hmeiseihpa châ ei chi ta, India ta ko 100 a tlohna a ly nawpa chata Developed Country cha âchhuana kyh liata nama peimawh hmeiseih" tahpa ta Siaha DC ta VCs zy hnohta pasyuna biepha kawpa a rei hra.

Puhpa Henry PL Hnaihly, LAO, LAD, MADC ta Vote of Thanks  reina hnei ta,  John Beizachhi Phuto nata Dinai C. Lalruatdiki zy ta hlasapa ta programme âhlaopazy ama palôhpahawh.

ISSUED BY:

Information & Publicity Department,

Mara Autonomous District Council,

Siaha.