PRESS RELEASE

NO.43/2023

SIAHA, 23 Hmypi, 2023, Pakhynoh - Tisi biatuhpa MDC Puhpa Tiahlei Syuhlô, EM i/c E & F Department etc. MADC ta atanoh târi 23.2.2023 he ta a bia liata khih ypa Theiri nata Tisi zy tlypa ta bia zawpi lâ anaohna nata alynabie a reih.

Theiri nata Tisi khihsawzy ta ama biatuhpa ta ama khih â vaw ngiapa cha pasô kawpa nata nohâh taopa ta dyna gate rônah kawpa chhao ta vaw dy ei ta, Pawpiri nata Ryuchâ zy ama hlâ hleikhô ta public meeting programme pha kawpa vaw taopa ei ta, Alykheina programme zy hmâ khai tawhta Theiri liata mypati pachhuapanohpa ei ta, Tisi liata khih zawpi nie awpa ta alykheina zâpati achhuanoh heih hrapa a châ. He zâpati he Tisi liata VC sâ 2 zy nata Political Party lâta Unit sâ 2 nahzy achhuanohpa a châ.

Puhpa Tiahlei Syuhlô biatuh zachhihpa chata biereina daihti ama piepa liata alynabie reina nata biereina daihti chyupa hmâh ta, atanoh duasu liata apadua tuhpa cha Khazohpa a châ tah ta, MADC Term 3 tlai a vaw tlohpa liata atahmâ term liata châna peimawhpa a vaw patupa cha bia byhnâ a châ tah ta, bia zawpizy thlahchhâkheina nata deichhyna a peimawh tahpa a reih.

Executive Member hry liata Major Department mohôh thei hra awpa ta châna phapa asaihei tuhpa Puhpa M. Laikaw, CEM zachhihpa nata a hrialâhpazy hnoh ta alynabie reih ta, he hawhpa duahmo phapa liata â dua theina chhâpa cha bia zawpizy vâ a châ tah ta, a bia zawpi zydua hnoh ta alynabie a reih.

Election daihti liata hmiahaopa hawhta hmia akha leinazy kha atahmâ cha my khaipa ta ti nata râh châta lôraoh kawpa ta hrialâh phapa châ chyu awpa hruana tao ta, a bia chhôh liata châthai quality phapa papua thei awpa ta Teacher nahzy tiama papua via awpa ahawna a tao pâ hra.

EM zachhihpa chata MADC Forests Department ta râhsa, pazu-pavaw, thokô nata râhmâhpa zy pabohsana liata hmah ama lapa kyh liata ano portfolio a châna hawhta a bia chyhsazy cha bia hropazy amopâtlâh châ awpa nata ano deichhy lymâ awpa ta ahaw ta, ano bawlawpa chhao EM i/c Forests a vaw châ tawhta râhsa nata pazu-pavawzy nie awpa â taih khai hapa cha a mopâ chyu hra awpa ta pahruana nata ahawna tao ta, dyna gate rônah kawpazy ama vaw tao vâta nata pawpiri, ryuchâ, alykheina programme nata alykheina pati pahâh kawpazy ama vaw patohpatia vâta palôhru hmeiseihpa ta alynabie a reih.

A hrialâhpazy hry liata ano azi thei hrapa Puhpa K. Hrahmô, EM i/c Revenue nata Puhpa K. Chhuabei, EM i/c LAD zy chhao biereina chyupa nata khokheina nata alykheina bie ama reih hra.

EM zachhihpa he a lahpinô Pihnô Lucy Solo ta zi ta, Puhpa J. Beichhualai, Member, Planning Board, MADC a zi thei hra. 

Officials tawhta Puhpa Thaly T. Azyu, CF, Puhpa Beirôkhu Beitâ, I & PO, Puhpa S. Siko, UDC, Puhpa SBC. Vabeihalai Nôhro, PA to EM(F), Puhpa John Beizachhi Phuto, Asst. Bio-Digestor Operator, Puhpa K. Nehemiah, Cameraman, E & F Department staff tawhta Laihsa B. Ngote nata Laihsa M. Beikypachasô zy ta zi ei ta.

BJP District HQ: Siaha tawhta Puhpa LC. Apaw, Ex-MDC & GS, Puhpa H. Beitlolai, Secretary, VB. Rahnei Zawhly, GS(BJYM), Puhpa Beidaolai Syuhlô, Secy. BJYM & Convener(IT) zy ta zi ei ta, hlasa thaipa Laihsa Jessica B. Khuhly ta a zi thei hra.

EM zachhihpa Puhpa Tiahlei Syuhlô he Tour Programme hawhta atazâ Tisi liata arie aw ta, mylâ târi 24.2.2023 pa ta Siaha pangaipa ta Tisi tawhta a sie aw.

ISSUED BY:

Information & Publicity Department

Mara Autonomous District Council

Siaha.