PRESS RELEASE

NO.180/2022

SIAHA, 18 Phiapi, 2022, Chutyhnoh - Atanoh dawh 1:30 PM pa ta Mara Thyutlia Py (MTP) Branch Siaha (Siaha Vaihpi) Opi, Siaha liata  Special Flying Squad  pachhuahpanohpa Paritheipa Paraona Programme liata Puhpa TA. James Riatha, EM i/c LAD, etc. MADC, cha khichhai laipa (chief guest) châpa ta â hmâkhei ei. 

He Paritheipa Paraona programme â hmâna lia heta Puhpa TA. James Riatha, EM, MADC ta MTP Branch, Siaha (Siaha Vaihpi) chhihthana ry liata paduapa Special Flying Squad (SFS) ta Paritheipa ama patupa Rs. 5 lakhs mâ rachhôh cha a parao (dispose). 

Paritheipa ama patupa he sahma, number 4 (brown sugar), Ganza nata thohnazy a châ.

Special Flying Squad â vaw duah tawhta Paritheipa ama patupa zydua cha Rs. 788,600 (Seven Lakh Eighty Eight Thousand Six Hundred) mâ a châ.

Programme he St. Beihmôsia, Chairman, SFS ta chhihtha ta, Rev. VL. Ngaia Hlychho, Sr. Executive Secretary, ECM HQ ta Abeipa lâ pavaosana devotion daihti â hmâh.

Puhpa TA. James Riatha, EM, MADC ta a peimawh â ngiahna liata ama hmâh awpa Special Flying Squad zy hnohta sôh a pie (hlâ) pâ hra ei.

Puhpa Kaisanga Chozah, Treasurer, SFS ta report piena hnei ta, Puhpa V. Samson nata Puhpa Khusa Khaila, President, MTP Branch, Siaha ta pasyunabie pha kawpa reina ama hnei.

Puhpa TA. James Riatha, EM (LAD) MADC ta pasyunabie a reipa tlâhpi viapazy:

Atanoh ta Paritheipa Paraona programme nama pachhuahpanohpa he a rônah tah na ta, khitlâh nata Mara zawpizy kyhpachâna palâsapa ta he hawhpa hmo nama taopa he ei ly hmeiseih. 

He Paritheipa nama patupa zydua he vaw patu leipa vaw châ ha sala, Marasaw thyudyupa hro pakhazie ma a parao aw, hnabeidy leipa ta tiama papua ta nama hriapasana Marasaw châta hria pazao via lymâ awpa ta ei châ haw ei.

He hawhpa vaih châ, râh châta rai nama hria no heta reipachhiena, maochhienazy chhao hluhpi a y thei aw, a kheihawhpa reipachhiena namâ vaw tyh hapa chhaota hnôhsy leipa ta nama hria pazao lymâ awpa ta ei châ haw ei.

He nama hriapasana vâ heta chyhsa hrona pakhazie ma nama pachha, Mawrâh lia heta birth rate za moh na ta chanô hlâta chapaw birth rate â sâh via. Anodeikua la, chapaw hlâta chanô hroh pitlohpa ama hluh via. Khazia vâta ma he hawhpa hmo a tlôpa maw eima tah khiahta la chapawzy ta paritheipa ama vaw tao hluh vâ a vaw châ. Eima thyutliapa Chapawzy heta thina lyutlâh thata ama ngai vâ a vaw châ.

Hnabeidy leipa ta tiama papuapa ta vaih nata Mararâh châta nama hria via lymâ awpa ta ei châ haw ei.

Ei châ ly kaw ei.

Puhpa TA. James Riatha, EM, MADC he Official lâ tawhta Puhpa Henry PL. Hnaihly, Sanitation Officer, Puhpa Pawsa Lava, AITO nata Puhpa Michael Lalhmangaihthangzuala zy ta ama chakaochahlâh.

ISSUED BY:

Information & Publicity Department

Mara Autonomous District Council

Siaha.