PRESS RELEASE

NO.44/2025

SIAHA, 22 Pachawh, 2025, Hriaheinoh - Atanoh dawh 1:00 PM kha ta Siaha District Football Association (SDFA) Playground, Meisatlâh, Siaha liata Dr. K. Beichhua, MLA Cup Football, 2025 Closing Ceremony ahmâpa châ ta, khichhailaipa Puhpa T. Seido, Hon’ble EM i/c Sports & Youth Services, MADC ta he programme he a hmâkhei.

Puhpa T. Seido, Hon’ble EM  SDFA chata biereina hnei ta, “Chhituhpazy hmahlana zawhzi ta Siaha District chhao Football liata hmô thei awpa tlai ta thata hmahsie pi ta, sports lâ liata eima thyutliapazy hmah pasiesa lymâ awpa liata nama theinazy papuapa ta tha nata zâh, sôh nata piah namâ hryuhnazy chhao he hmô thei awpa ta a vaw lâ lymâ ta, arônah tah pi ta, reithai tlâh nama châ kaw” tahpa a reih.

Puhpa T. Seido, Hon’ble EM chata “Eima râh liata thyutlia hluhpizy cha paritheipa hmozy vâta buana nata rairuna atyh ngâhaipa ama y no ta, atanoh liata pari theipa atao leipa sport chyhsa hluhpi nama y tahpa ei vaw hmô vâta aly â chhih ei tah hmeiseih” tahpa reih ta, sports chyhsazy cha paritheipazy he a tao chhaota tao pachhi rai rai lei awpa ta pasyu ei ta, Siaha District lia ngâlâh champion achhuah thlâh leipa ta district khothô lâ chhao champion achhuah awpa nata National nata International player hlaotlohpa châ achhuah chyu awpa ta khokheina nata pasyuna bie pha kawpa a reih.

Puhpa Martin VT. Vabeiduakhei, President, SDFA ta programme he chhihtha ta, Puhpa F. Lalmuanpuia, SDFA Secretary ta report pie ta, laihsa Rovina Khaimeichho ta hlasapa ta zawpi avypazy a palôpahawh.

Dr. K. Beichhua, MLA Cup, 2025 Tournament liana he ta Senior liata Model United FC zy ta Council Vaih FC zy cha 5 = 2 ta pahniepa ta champion ei ta, Veteran liata New Colony FC zy ta Model United FC-B zy 4 = 2 ta pahniepa ta ama Champion hra.

Lymâ he Puhpa T. Seido, Hon’ble EM, Puhpa K. Beingiachhie, Sr. EO, Puhpa Martin VT Vabeiduakhei, President, SDFA, Puhpa David J. Byhnadaolai, Commandant, MAP, Puhpa Lalhmuliana, KVK,  Puhpa Jeffrey J. Khara, Moonlight Editor zy ta ama rai.

ISSUED BY:

Information & Publicity Department

Mara Autonomous District Council

Siaha.