PRESS RELEASE

NO.27/2025

SIAHA, 10 Pamih, 2025, Hriatuanoh - Atanoh Mara Chanô Py   (M.CH.P.) aduana atyh heihna noh, M.CH.P. Branch: Siatlai zy ta alyna programme ama taopa liata Puhpa T. Seido, Hon’ble EM i/c Sports & Youth Services, Social Welfare Department, MADC cha khichhai laipa châpa ta programme a hmâkhei ei.

Puhpa T. Seido, EM zachhihpa cha ta, “M.CH.P. zy he, paritheipa adyuhna kyh liata MTP kuphei a châ chaipa, râh zawpi zy chhao ta eima ngâ kawpa châ ei chi ta, reih pabohsana kyh liata nata Cultural dress pabohsana kyh liata maophaohna lai kawpa a hneipa nama châ; chhienoh phanoh liata M.CH.P. apie lyuna he a moh pha ta, khih nata tlâh liata maophaohna ahnei chaipa nama châ.”

“Nama biepipa liata, Hriapasana nata Reiraohna tahpa châ ta, Hriapasa awpa ta kao hluhpi hnei ei chi ta, O chhôh mohôhna kyh liata sawnawh zy lâthlôh dopa liata a chhih a chhuah awpa a peimawh.”

“M.CH.P. liata hriapasa kaw tlôh ta, sawnawh paritheipa sei liata amâ tâh ha khiata cha, nama hriapasa chhao kha palôtlâh a chhih thlyu vei. O chhôh a do sala, palôh ki kawpa ta, khôtho lâ ta eima ka papua thei aw. ABEIPA lâthlôh liata eima saw nahzy a chhih khai thei ei sila, byhnâ eima to cheingei aw. Mararâh chhôkhah zydua he a do khai ha ei sila, eima râh he â do cheingei aw” tahpa reih ta, M.CH.P. zy cha Mara Culture nata Dress pabohsa ta, Mara reih pasâsa lymâ awpa ta a pasyu ei.

He Programme he Pihnô HT. Dape, President ta chhihtha ta, MC. Vahi ta thlahchhâna a hnei.

MTP Sub HQ: Tipa President Puhpa C. Vabeirathie, Siatlai VCP, Headmaster (M/S) nata MTP Branch tawh chhaota biereina nahthliepa a châ hra. MTP Siatlai Branch ta Sawlakia ama pamosa.

M.CH.P. Day alyna châta Viachao thiepa ta a rônah kawpa ta kyhchhina hneipa a châ hra.

Chief Guest ta M.CH.P. nata MTP zy hnohta sôh, Football nata Volleyball net zy a hlâ pâ hra ei.

EM zachhihpa he Pihnô HC. Nano, MTP Sub HQ:  Tipa President Puhpa C. Vabeirathie, Puhpa N. Perry , Artiste Ls. Dezili Bohia nata Ls. HS. Maiso zy ta ama chakaochahlâh.

ISSUED BY:

Information & Publicity Department

Mara Autonomous District Council

Siaha.