PRESS RELEASE

NO.10/2025

SIAHA, 28 Nawh, 2025, Hriaheinoh – Atanoh dawh 11:00 AM kha ta MADC Golden Jubilee Hall, MADC Complex liata Mara Hlasa Py (MHP) Raising Day ei 22-na alyna Programme ahmâpa châ ta, he daihti he Puhpa T. Seido, Hon’ble EM i/c S&YS, Social Welfare Department, MADC cha khichhai laipa châpa ta progamme a hmâkhei ei.

Puhpa T. Seido, Hon’ble EM chata biereina chyupa daihti hmâh ta, atanoh liata khichhai laipa châta hruapa a châpa cha â lyzie reih ta, “Eima râh liata py hluhpi aduah ta, cha hry liata chyhsa pei ahria leipa nata chyhsa apalysa kaw tyhpa cha Mara Hlasa Py he a châ cheingei aw; eima reih zy he zakhei leipa ta cheihchalo thai lymâ ei si la, eima chipho nata eima râh châta hmo pha kawpa eima tao tahpa athiehpa ta pahno heih ei suh u”.

“Idol zy he chi hropazy tao awpa hawhta pachâ tyh pi ta, atahmâ deikua cha Mara Hlasa Py vâta keimo Marasawzy chhao ta Idol atlyhpa ta Mararâh liata talent ahnei pha kawpa, ama talent thao papua nawpa su y tyh leipa kha atahmâ deikua cha khito tawhta hlasathaipa, talent hnei pha kawpazy ta ama talent ama vaw thaoh papua thei lymâ bâpa he a ly â chhih hmeiseihpa a châ.”

“Mara Hlasa Py zy ta hmo nama taopa rônah kawpa Charity Concert nama tao tyhpa he aly a chhih hmeiseih ta, tao pazao lymâ awpa chhao ta khokheina ei cha hlâ pâ hra ei.”

“Pa-ôpazy, chanô chapaw châna nata paritheipa zy tawhta aboh awpa he a chhuah chyu awpa ta bie cha ta khoh ei na ta, Khazohpa ta talent pha kawpa a cha piepa ei he papôhsa lymâ awpa ta khokheina ei cha hlâ hmeiseih ei” tahpa reih ta, Mara Hlasa Py founder Puhpa A. Thazi hnoh ta zana a hlâ pâ hra. 

“Chi hropazy he angiaroh awpa y leipa ei ta, Khazohpa ta â lyupa ta miah tao khai ta, chi hropazy ta ama theipa maih zy he eima tao thei hrana tahpa pahno thlâh ha u la, State level tly ma, National level taih chhao ta eima thainazy he eima palahâh thei khaina tahpa he pahno thlâh ha ei suh u” tahpa ta pasyuna bie kawpa reih ta, Mara Hlasa Py aduana noh alyna châta programme taopa avaw hlaopa zydua hnoh ta MHP Day he aly kawpa ta hmâh chyu awpa ta khokheina a hlâ ei.

He daihti he Puhpa John Beizachhi Phuto, President, MHP General Headquarters, Siaha ta chhihtha ta, Rev. VL. Ngaia Hlychho ta Devotion hmâh ta, Puhpa Enez David, General Secretary, MHP General Headquarters ta report pie ta, Pihnô Nakho Solo, Senior Adviser, MHP General Headquarters ta beireina chyupa daihti a hmâh. Puhpa Pakhaw Choza, President, MTP General Headquarters, Siaha ta greetings reina hnei ta, Laihsa Angeli Marapawpi, Mara Idol 2024 Top-5, Laihsa Teresa Ngianô, Mara Idol 2024, Laihsa Siteite, Mara Idol 2024 1st Runner-up, Laihsa Dezili Bohia, Mara Idol 2024 2nd Runner-up zy ta hlasana ama hnei. 

ISSUED BY:

Information & Publicity Department

Mara Autonomous District Council

Siaha.