PRESS RELEASE

NO.96/2024

  

SIAHA, 23 Phiata, 2024, Pakhynoh – Mara Hlasa Py (MHP) General Headquarters pachhuapanohpa Mara Idol Season-7, 2024 pahyna ‘Opening Programme’ cha atazâ dawh 6:30 PM kha ta NSV Studio, New Colony, Siaha liata ahmâpa châ ta, he liata Puhpa T. Seido, Hon’ble EM i/c Sports & Youth Services Department etc. cha khichhai laipa châpa ta programme a hmâkhei.  

 

Puhpa T. Seido, Hon’ble EM chata biereina chyupa a hneina liata atazâ liata tovyuh pha kawpa a pietuhpa Mara Hlasa Py General Headquarters leader-zy hnohta alynabie reih ta, “Eima mahnô mahpaw daihti liata eima hla parohpazy pachâpa ta Marapazy pi he palôh a lie kawpa chyhsa eima châ tah thei awpa a châ. Atahmâ thyutlia chhâ lia chhao ta Love song ama phipazy a bie pachâpa ta palôhlie chhih ngaitapa a châ” tahpa a reih.

 

“Khazohpa ta Marapa châta reih pha ngaitapa miah a pie. Cha cha Mara reih he a châ. Cha a cheituh awpa cha keimo Marasawzy miah a rao; a sôh ngaita. Cha Mara reih chata Chi nata Pho ta miah a padua. Shillong liata vaih thokha cha Khasi reih leipa ta reih hropa rai angia thei vei. Mararâh lia chhao, he eima Siaha khihpi liata reih hropa ângia thei leina vaihzy vaw y pâ tyh hra ta, eima thlâh miah a palôh ngaita t yh. Atahmâ deikua, cha vaihzy liata Mara reih he pho awpa ta reih hropazy ta thata miah a ngiathlu ta, palôh pasa â chhih ngâsâ tyh. Eima Mara reih duasu mopa ta ICU liata ypa dei hawhta a châ khiah ma tah thei awpa a châ – eima kaw pahro heih awpa he a peimawh hmeiseih.”

 

“He hawhta nôpo kawpa ta eima y haino ta Mara Idol ataopasuana, Mara reih cheingei ta tao awpa a vaw châpa he, Mara reih hmah pasiena nawpa chhaichhi a châpa ta pahno na ta, Mara Literature pa-ina pillar pha kawpa a châpa ta ei pahno vâta aly â chhih hmeiseih.”

 

“He Idol competition he Mara reih laiseih nawpa a châ – eima reih, chei-o nata chi nata pho palâhâhna nata phualuahna chhaichhi peimawh kawpa a châ. Idol a vaw châ hapazy ta hla record ama taopazy he Motor chhôh liazy ta play laih ei ta, Music nata IT he Mara reih pabohsana nata palaiseihsana châta chhaichhi peimawh kawpa a châ.”

 

“Atakô Idol zy, rypaohna tlua tah, lahpi/vahpa thlai hneina châta Mara Idol he hmâh leipa u la, Mararâh châta nama daihti nama hmâ pazao chy awpa eima khoh kaw. Mara Idol he hla sapa dei châ leipa ta, nama ky liata Mara phopi nama phaoh tahpa my leipa u la – amopâtlâh châ achhuah teh u. Mara Idol a vaw châ awpazy cha Mara reih hmia pasah lymâtuhpa, hrozie nôchâ phapa nata Awnano liata ahmâtuhpa châ sala tahpa eimâ khokhei”

 

“Hlasa thaipazy cha Khazohpa ta talent a piepazy nama châ; sada, karao nata pa-ôpazy tao lei ta, ti lalôh nata ao nata sapa châta phapa nie/do awpa a pha kaw aw. Reingia kawpa ta nama y khiatala atanoh hlâta duahmo pha viapa ta Khazohpa ta a chachhihtha aw ei.”

 

“Mara Idol Season-7 he ta Mara Hla nata bie liata hmahsiena vaw tlôkhei sala, Mara reih pabohsana kyh liata â sosâh chaina kô vaw châ sala, atazâ programme nata competition nama vaw hnei laih lymâ awpa zydua liata  apha kawpa ta ahmâ awpa ta khokheina sâh chaipa ei cha hlâ ei” tahpa ta pasyuna bie pha kawpa a reih.

 

Atazâ programme he John Beizachhi Phuto, President, MHP General Headquarters, Siaha ta chhihtha ta, Rev. AZ. Beirakaw, Executive Secretary i/c Social Mission, ECM Assembly ta devotion hmâh ta, Enez David, Secretary, MHP General Headquarters, Siaha cha report pie ta, Joseph Zawtha, Mara Idol Season-6 Top 10 ta mopakha hlasana a hnei. He daihti liata Mara Pho Hla aphipasuana lymâ raina hnei pâpa châ ta, Judson KT. Zephatha ta sâkhana lymâ dao ta, Reuben C. Beikypacha nata J. Hrabei zy ta sânona nata sâthôhna lymâ dao ei ta, he nahzy hry liata sâkhana lymâ a daotuhpa Judson KT. Zephata ta a phipa hla cha atakô Mara Idol Theme Song châta hmâ pâpa a châ aw.

 

Mara Idol Season-7, 2024 host awpazy cha Host T. Cassidy nata Co-host N. Beichhotha zy châ ei ta, Judge châta raopa Puhpa L. Khuly, Puhpa Reuben C. Beikypacha nata Pihnô T. Merisa zy ta Mara Idol Season-7 Competition liata ahlao awpata moh a pangiapa manôh 80 zy mopadona ama hnei aw.

 

ISSUED BY:

Information & Publicity Department

Mara Autonomous District Council

Siaha