PRESS RELEASE

NO.139/2024

SIAHA, 12 Di, 2024, Pobienoh - Atanoh dawh 12:00 PM kha ta Siaha District Volleyball Court, New Siaha E-II liata Siaha District Volleyball Association (SDVA) zy ta ama pachhuapanohpa MADC Chairman Trophy Volleyball Tournament 2024 khawna daihti a hmâpa a châ.  He daihti he khichhai laipa châta hruapa Puhpa T. Seido, Hon’ble EM i/c Sports & Youth Services etc. MADC ta hmâkhei ta, Puhpa PC. Lalhmingthanga, President, SDVA ta a chhihtha.

Puhpa T. Seido, Hon’ble EM chata biereina chyupa daihti hmâh ta, “Chyhsa to ta talent hnei khai hra ei si la, cha eima talent cha a lyu tlâ vei; eima District liata Volleyball player eimâ palaikhei ngaitapa nahzy, talent nama hneipazy he papôhsa lymâ awpa ta khokheina sâh chaipa chahlâ ei na ta, nama thaina nata theinazy he, he liata chhâ thlâh leipa sa la, Mizoram pôpalôhpa liata nama palâsa awpa peimawh ta, cha raohpa ta player-zy ta maophaohna sâh kawpa hnei ei chi ta, cha nama maophaohnazy cha hro asohsi awpa nata pari theipa tawhta a boh awpa hleikhô ta pa-ôpazy kyh liata namâ boh awpa zy he a châ - he nahzy he tawhta namâ sohsi awpa he a peimawh hmeiseihpa a châ - he hmophaleipa zydua he nama tao tlâ lei awpa ta ei cha hnabeiseih ei” tahpa pasyuna bie nata khokheina bie pha kawpa a reih.

Atakô MADC Chairman Trophy Volleyball Tournament he Chanô lâ liata Zawhnai United Volleyball Club (ZUVC) nata Thiahra Volleyball Club zy final a khaih ei ta, ZUVC zy ta pahniena topa ta trophy nata sôh Rs.10,000/- dao ei ta,  sânona Thiahra Volleyball Club zy ta thophy nata sôh Rs.8,000/- ama dao hra.

Chapaw lâ liata ZUVC nata Southern Spiker Volleyball Club zy ta final a khaih ei ta, ZUVC zy ta pahniena topa ta trophy nata sôh Rs.150,00/- dao ei ta, sânona Southern Spiker Volleyball Club zy ta trophy nata sôh Rs.10,000/- ama dao hra.

Best spiker Chanô liata VT. Lalbiakdiki, Thiahra Volleyball Club a tlypa châ ta, Chapaw liata B. Masona, ZUVC a tlypa a châ - he nahzy he ta trophy nata sôh ama dao raihrie hra.

Daihti chhâna liata Puhpa CZ. Hluna, Sr. Vice President, SDVA ta vote of thanks reipa ta MADC Chairman Trophy Volleyball Tournament 2024 khawna programme he pachhâsapa a châ.

ISSUED BY:

Information & Publicity Department

Mara Autonomous District Council

Siaha.