PRESS RELEASE

NO.112/2024

SIAHA, 19 Phiapi, 2024, Hriaheinoh - Atanoh my dawh 11:00 AM kha ta Machâ Laichhua Syuhlô châbu ropa “Biehrai bo nata châh tluana” cha Puhpa T. Seido, Hon’ble EM i/c Sports & Youth Services etc. MADC ta zawpi rei thei awpa ta a palâhâh.

Puhpa T. Seido, Hon’ble EM chata châbu a palâhâh khai tawhta biereina chyupa daihti hmâh ta, “Atanoh he hawhpa châbu palâhâh thei awpa ta nâ khokheituhpa eima Khazohpa nata Author hnohta alynabie reih na ta, ECM Awnano Machâ châna lâ tawh chhaota ei vaw ly kaw. Châbu ropa he hmo rairu kawpa châ ta, châbu hluhpi asaohiah awpazy byuh laih ta, châbu rohtuhpa Machâ Laichhua Syuhlô a hriapasana liata alynabie ei reih.”

“Chyhsa hluhpi cha Sermon ama reipa liata a bie phapa a vao leipa pi ta, a pha leipa, ama rei chhei tlamawpa zy avao laihpa ta chyhsa hropazy hmiakô ta eima reipachhie tyh – he hawhpa hmo liata a deichhy raihrie tah, a phana lâ eimâ pasyu awpa a peimawh kaw.”

“Sapa nata thlahpa liata Tisi bia he hmo ngiatlâh châpa a y hôlô. Ama bia chhôh liata Sermon ataopasuana zy patohpatia laih ei ta, ama taozie phapazy he eimâ amopâ awpa a pha kaw.”

“Atanoh liata eima palâhâhpa châbu he aparaparôh daihti nata lâlaona daihti liata ngâlâh dei châ leipa ta ngiapâtuhpa hluhpi ta eima hmâ phahnai awpa nata eimâ thôhkhei kaw nahta ei pangiasapa a châ. He châbu hmâpa ta Abeipa bie eimâ chuna kyh liata nata angiapâna kyh liata thatlôna miapietuhpa a châ awpa a châpa vâta aly’pa a châ hmeiseih” tahpa a reih. 

Puhpa T. Seido, EM zachhihpa chata, he châbu he pasô tah, a rotuhpa he eima deichhy awpa he a peimawh ngaitapa tahpa reih ta, “A rohtuhpa Machâ Laichhua Syuhlô he Abeipa ta byhnâ pie via lymâ sala, râh châta a thaina nata sona zy hmâh via lymâ sala, khih nata tlâh, râh châta lohpapua via lymâ awpa ta ei khokheina â sâh chaipa, Sports EM he ta ei vaw hlâ” tahpa ta pasyuna bie pha kawpa a hlâ.

Machâ Laichhua Syuhlô he, Tisi Middle School liata Pachutuhpa rai hria ngâhaipa châ ta, Awnano lâ liata ECM Tisi El-Bethel Local Church liata Local Secretary chakaona rai hria ngâhaipa châ ta, atahmâ tahpa chhao ta châbu sâ 5 a rohna a châ.

Palâhâhna Programme he Puhpa K. Beingiachhie, Sr. EO (M/S) & Secretary, Board of Mara Literature ta chhihtha ta, Rev. AZ. Beirakaw, Executive Secretary (SW & Dev.) ta pavaosana a hnei. Laihsa Priscilla Nôtlia (Mara Idol 2024 contestant, Top 10 liata a tloh ngâhaipa) ta hlasana ei 3 tlai hnei ta, Machâ Laichhua Syuhlô, Author ta alynabie reina a hnei khai tawhta, daihti chhâna liata Rev. FC. Nohu, ECM Tisi biatuhpa ta thlahchhâna daihti hmâh ta, châbu palâhâhna programme he pachhâsapa a châ.

Atanoh liata châbu palâhâhna he Board of Mara Literature, MADC ta ama pachhuapanohpa a châ. He châbu he ECM bookroom, New Colony, Siaha liata Rs.300/- ta chalei theipa a châ. 

ISSUED BY:

Information & Publicity Department

Mara Autonomous District Council

Siaha.