PRESS RELEASE

NO.55/2023

TIPA, 9 Pamih, 2023, Pobienoh - Atamy dawh 11:00 Am pa ta Lyuva Khutla 2023 cha Centenary Square, Tipa 'V' liata arônah kawpa ta ahmâ pathaopa châ ta , Azipa châta raopa Puhpa T. Seido, EM i/c Sports etc. cha arônah kawpa ta ahmâna su liata dypa châ ta, noh yta alyna Programme a hmâkhei.

Programme he chhaih 2 lâ ga pachhaipa châ ta, chhaih khana daihti ziehpa liata Puhpa C. Vabeirathie, Organising Committee Chairman ta chhihtha ta, Rev. Jimmy F. Sachai, Admin. Secy. ECM Tipa ta daihti pavaonasa a hnei. He khai tawhta Azipa Puhpa T. Seido ta Lyuva Khutla pohraipa (flag) parai ta, he raohpa ta MTP Branch: Tipa Bazar zy ta Pahyna Hla pha kawpa ama sa. He khai tawhta Azipa Puhpa T. Seido cha biereina hnei awpa ta daihti piepa châ ta, ary liata palâsapazy he a bierei tlâhpi viapazy a châ:

1.Atanoh liata Lyuva Khutla 2023 hmâ thei awpa ta daihti phapa a pie tuhpa Khazohpa hnoh ta alynabie reih ta, zawpi avaw hlaopa zydua Lyuva Khutla 2023 anaohna Samaw a hlâ.

2.Azipa ta apaduatuhpa Org. Committee lâ alynabie reih ta, Nôpaw & MTP chhihtuh ahriapasa hmiatuapa, chhâzaw râh lâ asie hapazy zana a hlâ.

3.Mara Missionary nahzy reithai ta, âmo zawhzi ta Mara chipho aduah pi ta, MADC ry liata Sawhkhâ rai taihta hriatheina byhnâ eima to tahpa a reih.

4.Marapazy ta cha-ypi eima hneipa Lyuva Khutla, Khohna kia, Lâlaichhia, Pazita zy hnei pi ta, he hry liata Khohna kia nata Pazita he Chaypi phuahpa ta eima tao pazao khao leipa a châ. He Cha-ypi nahzy he eima Economy pha nawpa ta Tourist asy thei tuhpa festival eima hneipazy châ ta, manôh mahpaw taozie nata cheiozy cheihchalo lymâ awpa he Marasawzy eima maophaohna a châ.

5. Hlâno Lyuva Khutla Chaypi ahmâpa he lyu rao â daih mâh lei no, rai atly daihti no a châ; Chiahchi nata Avyuh paw daihti châ ta, hlâno Satlia laihsazy vâ-ia hla taihta ama vaw vaw phi hnâ pâpa pawpi ngia ngaitapa paw daihti a vaw châ. He Lyuva Khutla he ta Marapazy Kyhpachâna, apôhkhana liata unawh châna miah pa-i sa la, Mara phothyuzy cheihchalona nata pabohsana chhaichhi vaw châ mawh sy.

6.Mara reih he ICU liata y ngâhaipa hawh dei a châ; oxygen pie si la, eima zydua ta pachha papua awpa ta Mara reih cheih si la, pasâhsapa ta hmâh lymâ suh u.

7.Adona, ngâchhihna my leipa ei si la, Manôh Mahpaw daihti liata pasô kawpa ta ama hmâ tyhpa hawhta atakô Lyuva Khutla he Thapa nata aly kawpata hmâh awpa ta zawpi zydua khokheina a hlâ.

Puhpa K. Thawngduna ta hladyuh pathluah ta, he khai tawhta Host/Comperes Puhpa Zakaria N. Beihrokhai nata Laihsa Ngorangia Solo chhihthana ry liata chhaih 2-na Cultural programme ahmâpa châ ta, ary liata palâsapazy hawhta daihti hmâpa a châ.

Hla asapazy:

John Beizachhi Phuto, S. Ngodei, HS. Maiso (Khopai), Rovina Khaimeichho (Khopai), Jessica B. Khuhly, Sachhua Khaimeichho, Veronica (Theiri), Brenda Marangia (Tisi), Z. Beiratha (Tisi).

Cultural/Special Item apamosapazy:

New Light School (Mara-Lai-Mizo Unity Dance), Zyhno MTP (Thyutlia lâ), Tipa Dairy (Sawlakia), MTP Branch Tisi (Awhkhypa lâ), MCHP Dairy (Skit show),  Vaihpi MCHP (Modern sawlâkia)

Ary liata palâsapazy he atakô Lyuva Khutla liata atlypa nata atlypatlohpazy ama châ:

Chhivaw - Teressa Tluma, Dairy

Khydi - FC. Zawkhai, Bazar

Saliah Beinô manôh pa 3 atlypazy:

1.Grace Lynaki, D/o N. Beingiasa

2.Byhnadaorili, D/o Pawlai Chozah

3.Joycee B. Lalhriati, D/o B. Lalruata

4.KC. Vahlangia Tlapyu, D/o T.Luakhai

Saliah Beipa manôh pa 3 atlypazy :

1.Laidao Beihô, S/o Mesak

2. K. Beikypachasa, S/o K. Ambrose

3.John Lalchhuanawma , S/o S. Vanlalhruaia

Apuapa hry liata Uhthei chaipa: Puhpa C. Chhaihlo, Kô 83

Apuapa hry liata Hawtichaipa: K. Beilynachai, S/o K. Larry, 3

Alâh tiama chaipa: Beihlaotlo, Tipa ‘V’

Daihti chhâna lâ liata VT. Lykhei, Secretary, Organising Committee ta alynabie reina daihti a hmâ khai tawhta programme he pachhâsapa a châ. 

Atakô Tipa liata Lyuva Khutla ahmâpa he zawpi puapha kaw ei ta, Siaha lâ tawhta Puhpa Beihu Nôhro, Dy. Chief Whip nata a lahpinô hleikhô ta a PA Miss Gospel Khithie zy za hmâh hra ei ta, Officers nata Staff thokhazy chhao Azipa Puhpa T. Seido ama za chakaochahlâ hra.

ISSUED BY:

Information & Publicity Department

Mara Autonomous District Council

Siaha.