PRESS RELEASE

NO.134/2023

SIAHA, 19 Thlarâh, 2023, Hriaheinoh - Atanoh dawh 11:00 AM khata Siaha District Volleyball Association Court, New Siaha E-II liata Siaha District Volleyball Association (SDVA) pachhuahpanohpa SDVA Season Opening Volleyball Tournament programme liata Puhpa T. Seido, EM i/c Sports & Youth, MADC cha khichhai laipa (chief guest) châpa ta â hmâkhei ei.

Programme he Puhpa CZ. Hluna, President, SDVA ta chhihtha ta, Puhpa Reuben Hlychho, Vice Chairman Technical Board, SDVA ta Technical Report piena hnei ta, Satlia Steve Azyu, Assistant Secretary, SDVA ta Oath taking a pahneisa ei.

Puhpa T. Seido, EM, MADC chata, "Eima pahno chyupa hawhta Siaha District he Mawrâh liata District uhtheipa hry liatpa châ ta, eima thyutliazy nama duasu pachâ tyh pi ta, châhrasala, eima sôh duasuzy ta â chu leipa vâta nama duasu awpa hawhta châ thei tyh leipa ei chi ta, châhrasala, hnabeidyna lâ ta la leipa u la, Khazohpa ta chi hawhta miah padua tawhta cha daihti phapa miah pie daihti a y aw tahpa he khâchâ hnabeiseihna ta eima zydua ta pachâ hri sih la," tahpa ta a reih.  

"Kô no a khô hapa liana khata, eima râh he thata drugs ta miah angiahnao ta, eima thyutliapazy nohto rô ta thlâsu pangaipa ta eima pathlie tyh ei, thlâsu khophie pangai ngâpa zy, thlâsu pangai daihmâpazy ama y," tahpa ta EM ta a reih.  

Khichhai laipa chata, "Atahmâhlâ  ta Kuki duasu pahno chyu pi ta, Kuki unawh thyutliazy kha ama riahpha ta, amâ fit ngâsâ ha, paritheipazy tao veih ei, Siaha District heta buana lai kawpa hnei pi sala, eima thyutlia nahzy riahphapa nata a fit kawpa eima y tu tlamaw, tahpazy ei za pachâ nahta ei palôh a bua kaw ty." 

"Cha hawhta, a châ nota, tanoh players pha kawpazy he su liata namâ vypa he eina palysa hmeiseih ei chi, hnabeiseihna thata ei za hnei heih. Sports liata pha kawpa ta namâ khaih hleikhô ta, paritheipa chhao namâ dyuh awpa ta ei cha hrua ei," tahpa ta EM ta a reih. 

"Khizaw heta Sports he pasô via lymâ ta, Mawrâh liata keimo Siaha District chhaota Volleyball zy eima pasô kaw bâpa a châ. Siaha District liata Volleyball Players zy ei chi he zakhei a chhih leipa ei chi ta, ei châ palaikhei hmeiseih ei. Khazohpa ngiachhiena vâta namâ fit kaw, ei châ ly hmeiseih ei. He he Khazohpa ngiachhiena vâ deita a châ," tahpa ta khhichhai laipa ta a reih.

"Nama tiama via lymâpa ta a châ khiahta cha, nietlua khi taihta nama pua thei tahpa he ei cha chho khoh ngaita kaw ei. Khazohpa china chôta tiama nama papua lymâ khiahta cha, nama taotheina khôlâ taihta Khazohpa ta theina a cha pie aw ei. Thyutliapazy ei chi heta paritheipa adyuh lymâ ta, tiama lymâ ta, eima râh heta thyutlia phapa cha peimawh kaw pi ta, mylâ ta eima râh chhihthatuh awpa châ ei chi ta, atahmâ tawhta palôh hnei kawpa ta hro namâ hmâh lymâ awpa he a za peimawh ngaita kaw," tahpa ta EM ta a reih. 

Puhpa T. Seido, EM, MADC ta a peimawhpa nata ângiahna liata hmâh awpa sôh a hlâ pâ pa hra ei.

ISSUED BY:

Information & Publicity Department

Mara Autonomous District Council

Siaha.