PRESS RELEASE

NO.103/2023

SIAHA, 16 Thlazoh, 2023, Pakhynoh – Zâhnia târi 15.8.2023, India khotalaina alyna ei 77-na noh liata Puhpa T. Seido, Hon’ble Executive Member (EM) i/c Sports etc., MADC ta Laki liata Independence Day 2023 programme taopa liata Chief Guest châpa ta Programme a hmâkhei.

Puhpa T. Seido, Hon’ble EM chata biereina chyupa daihti hmâh ta, “atanoh liata he hawhta India ta khotalaina nata ryureina eihrâhpâ eima vaw hnei theina chhâpa he eima chhituh hmiatuapa nahzy hriapasana vâta a châ” tah ta, Leaders hmiatuapa Mahatma Gandhi, Jawaharlal Nehru,  Bhaghat Singh, Subhas Chandra Bose etc. zy zana hlâ ta, bie hmiachhihpa a reina liata Myanmar nata Manipur liata eima unawh nahzy taokheina a hlâ.

“Atahmâ cha India chhao râh asosâhpa hry liata a kaw hlao laih ha bâ ta, Puhpa Narendra Modi sawhkhâ chhao khizaw pi ta pasâhsa ei ta, ama parônahsa lymâpa ta chhihtuh rônahpa a châna pamosana cha lymâ hluhpi chhao a dao; India râh he Digital Country ta tao tah, super power râh tao awpa achhuah lymâ ta, riethei sipasapa y leina râh ta tao a khoh vâta hmahlana schemes hluhpi a siekhei lymâ hra. Khotalaina a hmô tawhta kô 75 hlei a châ chypa India hmahsiena dâh he, khizaw pi ta noâchhih tah ei ta, India he ama reithai ngaitapa a châ.”

“He hawhta Centre ta hmahsiena kyh liata hmah la lymâ ta, cha hawhpa zawhzi ta Mizoram sawhkhâ chhao ta a theina hawhta a State chhôh hmahsiena châta hmah la lymâ hra ta, eima râh chhao a rakhapa liata miah a chapia lymâ hra. Cha no ta MADC zy chhao ta, he râh he Abeipa ta miah a piepa châ ta, he deileipa ta Marapazy ta râh hropa hnei khao lei pi ta, Mara chi nata pho hmahsie via nawpa ta project hluhpi taopa ta apatohpatia lymâpa a châ.”

“District Council main building thiehpazy hnei thei awpa ta hmahla haipa châ ta, Delhi, Guwahati nata Shillong liazy ta Mara House hnei thei awpa ta hmahlana siekhei ngâhaipa châ hra ta, Aizawl tlô chy Falkawn lia chhao MADC ta Ohmo pha kawpa chalei ha ta, he liata hmialâ daihti liata atlâhleipazy eima y daihti liata chyhsa hro O tlô khao leipa ta eima O liata tlôpa ta thohna eimâ mohôh thei nawpa ta MADC ta a patohpatia ngâhaipa a châ.”

“Lunglei lia chhao Mara House apatohpatia ngâhaipa châ ta, hmialâ daihti liata keimo Marasaw cheingei ta eima mohôh awpa a châ.”

“Mara chi nata pho châta Abeipa ta miah a piepa MADC he biehneina a chyh kaw vâta District Council palai via awpa ta eima hyutuhpazy ta hmahla ei ta, Sixth Schedule Amendment tao awpata buakhei ngâhaipa a châ.”

“MADC Session hnôhchaipa liata Mararâh he Mara pheisaihzy hnei hra lei pi ta, Sixth Schedule ry liata biehneina ta miah a pasaipa hawhta Town Police zy hnei hrapa châ mawh sy tahpa ta pathlupa châ ta, Mizoram Governor ta a vaw approve ti ta MADC ta Town Police eima vaw hnei hra aw tahpa he eima hyutuhpazy hmahlana a châ. District Council Abeipa ta miah a piepa he a papha thei tuhpa nata a parao thei tuhpa cha keimo Marasawzy eima châ.”

“Atanoh India Independence Day eimâ hmâna daihti lia he ta eima thyutliapazy, sports lâ hmahsiena liata thyupathi heih awpa ta chahrua ei na ta, bia zawpi, eima zydua lâh châta eima hro do leipazy, eimâ chhuahna ado leipa zydua, atanoh daihti liata ataopathina châta rie hmâh ei si la, Laki bia zawpizy aphana lâ ta eima hro â thlana kô nata hmahsiena eimâ chadaina kô rie vaw châ sala; atakô Independence Day eimâ hmâ heih kô he byhnâ eima to kô, thlao eimâ chhih kô, reiraoh chai kô vaw châ sala, 2023 India Independence Day he ta Laki bia liata hmahsiena rie vaw tlôkhei mawh sy” tahpa ta biereina nata pasyuna bie pha kawpa reih ta, Mararâh châta raihriana kyh liata eimâ patohpatiana zydua liata hlaotlohna miah pie theituhpa cha Khazohpa a châ; hlaotlohna phapa a hmô lymâ thei nawpa ta Bia zawpizy thlahchhâna liata avaw thei lymâ awpa ta ahawna a tao pâ hra. 

ISSUED BY:

Information & Publicity Department

Mara Autonomous District Council

Siaha.