PRESS RELEASE

NO.5/2024

SIAHA, 20 Nawh, 2024, Pachynoh - Atanoh my dawh 9:00 Am kha ta Puhpa T. Seido, EM i/c Social Welfare Department etc., MADC ta Tipa ‘V’ khih tlô chy liata Kross Pheisaih Tliahtlâ O liata so awpa châta Steel Almirah cha amohôtuhpa ECM Tipa Pastor Bia nôpawpazy hnoh ta hlâna a hnei.

ECM Tipa Pastor Bia nôpawzy ta programme chyupa vaw pachhuapanoh ei ta, Puhpa K. Laitha, AEO (Edu.) & i/c SWO ta Chairman châpa ta chhihtha ta, Machâ S. Pahlu, Bia Chairman ta pavaosana thlahchhâna a hnei. ECM Tipa Pastor Bia vyuhpa ta Machâ C. Zathanga, Board Chairman, Kross Pheisaih Tliahtlâ ta report chyupa nata alynabie reina daihti a hmâh.

He khai tawhta Puhpa T. Seido, Hon’ble EM ta Steel Almirah hlâna hnei ta, biereina chyupa daihti a hmâh pazao. Puhpa T. Seido chata atanoh liata bia nôpaw avaw ydypa zydua hnohta anaohna nata alynabie reih ta, “MADC Social Welfare Department ry liata budget a chyh kaw vâta tao theina chyh kaw hrasala MADC he Khazohpa byhnâ eima tona hnawh a châ vâta budget sôh a y tlakaihpa tawhta eima theina rakha liata Mararâh châta raihria lymâ eimâ chhuah” tah ta, “MADC liata sawhkhâ rai he moto ta rai miah adaih tiah vei hrasala Mararâh liata eima machâ nôpi/pawpi nah zydua deikua padaih awpa ta Machâ hlao he eima rai theipa vâta eimâ ly kaw” tah ta, “Machâ hlao chhao pahluh via awpa ta atahmâ he eima hiah ngâhai hra” tahpa a reih. 

“Mararâh liata tly awpa su nano nanopa y hra sa la Kross Pheisaih Tliahtlâ he cha Marasawzy miah a hriana dâh anano ha ta, atahmâ tawhta cha Marasaw hluhpi zy nata sawhkhâ Department zy chhao ta ku ama vaw pathla lymâ nahta eima hnabeiseih.”

“Nama thlahchhâkheina zawhzi ta Mararâh nata MADC sawhkhâ chhao hmahsiena lâ eima pangai lymâ; eima taotheina nochâ liata tiama papua via lymâ si la, Khazohpa ta byhnâ miah a pie lymâ aw.”

“Atanoh liata hmo chynawhpa kâchhiena chô ta eima cha hlâpa he, Abeipa ta byhnâ pie mawh sy tahpa he eima khopa nata thlahchhâna a châ.”

“Awnanopazy ta Mararâh châ nata MADC sawhkhâna châta thlah miah chhâkhei pazao lymâ awpa ta ei châ haw ei” tahpa ta biereina daihti a hmâh.

Daihti chhâna liata Rev. Enawsa Siakhai, ECM Tipa Biatuh pastor ta byhnâ awna ta programme he khawpa a châ.

Puhpa T. Seido he officials tawhta Puhpa Beirôkhu Beitâ, I & PO, Puhpa K. Laitha, AEO (Edu.) & i/c SWO, Pihnô K. Jenny, LDC, Pihnô Teresa Syuhlô, LDC nata Puhpa T. Pabua, Cameraman zy ta zi ei ta, azituhpa zydua châ ta Puhpa T. Seido nata a chhôhkhazy ta mypati amâ chhuanohpa hra.

ISSUED BY:

Information & Publicity Department

Mara Autonomous District Council

Siaha.