SIAHA, 9 Nawh, 2024, Hriaheinoh – Atanon my dawh 10:30 Am pa ta Puhpa T. Seido, EM i/c Sport & Youth Dept nata Social Welfare ta a Office Chamber liata a Depatment topa liata officers nata staff zy chhao ta Kôthiepa thopi dokheina nata Thlahchhâna programme a hmâkhei.

He Programme he Puhpa JB. Beihnai, Sport & Youth Officer, MADC ta chhihtha ta, Rev. RK. Chozah ta pasyuna bie reih ta, ngâchhihna he Abeipa kho chaipa châ ta, kô 2024 chhôh ta ngâchhih kawpa ta Office rai hria awpa ta a pasyu ei.

Puhpa T. Seido EM chhao ta bie reina hnei ta, Abeipa ngiachhiena vâta, kôthiehpa aly kawpa ta eima tlô theipa vâta Abeipa lâta alynabie reih ta, ama staff Puhpa Chhuasa (L) deikua ama hry liata â hlao thei khao vâta, pei tah ta, taokheina bie chhao a reih. Puhpa T. Seido, EM chata atakô 2024 he Department ta ama polite chai kô châsala, Discipline hnei chai kô nata rei amâ ngiah chai kô ta hmâ chyu awpa ta officer nata staff zy a pasyu ei. 

He Programme liata ahlao hrapa Puhpa Jeffrey Khara, Editor, Moonlight nata Puhpa B. Dawpho, Editor, The Times of Maraland zy hnoh ta Puhpa T. Seido, Hon’ble EM chata alynabie a reih.