PRESS RELEASE

NO.84/2023

SIAHA, 24 Chhiepa, 2023, Pachynoh - Atanoh dawh 1:30PM khata Government Siaha College Basketball Court, Siaha liata Siaha District Basketball Association pachhuahpanohpa closing function of SDBBA Season Opening Tournament 2023 liata Puhpa T. Seido, Executive Member i/c Sports & Youth Services, MADC cha khichhai laipa (chief guest) châpa ta â hmâkhei ei.

Programme he TT. Jacob, General Secretary, SDBBA ta a chhihtha. 

Puhpa T. Seido, EM, MADC chata Mawrâh liata nôpawzy nata Mizoram Basketball Association zy tiamana nata hmahlana zawhzi ta Basketball liata National Level liazy Mawrâh State cha akaw lâ pha ta aly'pa a châ hmeiseih.

"Tlohleina chôta Sports EM vaw châ na ta, ei theina rakha ta tiama cha papuakhei aw ei na ta, SDBBA nata hriaparaoh lymâpa ta, kei nata Sports & Youth Services Department, MADC zy ta Basketball liata hmahsie via lymâ achhuahna chôta, hmah eima cha lakhei lymâ aw," tahpa ta EM ta a reih.

EM chata hmo eima taona maih liata palôh zydua piekhaina chôta nata tiama kawpa ta taona lia maih heta Khazohpa ta byhnâ a pie tyh, tahpa a reih.

"Atanoh he su liata Basketball akhaih awpa ta avypazy lâ ta ei reih khoh kawpa cha, tiama kawpa ta Basketball akhaih lymâ u la, nietluana taihta hlao pha kawpa hnei thei ta, chhôhkhazy chyh theina taihta hlaotlohna hnei namâ chhuah chyu awpa ta ei châ haw ei, tahpa ta EM ta a reih.

"Sport chyhsa châ ei chi ta, paritheipa arâsai ta, paritheipa tao rai rai lei awpa ta ei châ haw ei. Thyutlia thokha paritheipa sei liata â tâhpa hluhpi y ei ta, Sports hmâpa ta pachhapapua namâ chhuah chyu awpa he a peimawh ngai ta kaw," tahpa ta EM ta a reih.

"A chhâ chaina liata cha palô zydua piekhaina chôta, hlaotloh cheingei achhuahpa ta Basketball liata tiama nama vaw papua via lymâ awpa ta ei châ haw hmeiseih ei, tahpa ta EM ta a reih.

Puhpa H. Vabeitha, President, SDBBA chhaota pasyunabie pha kawpa reina a hnei hra.

ISSUED BY:

Information & Publicity Department

Mara Autonomous District Council

Siaha.