PRESS RELEASE

No.45/2021

Puhpa T. Seido, Deputy Chief Whip, MADC ta Siaha MJA zy thopi do khei

 Puhpa T. Seido, Dy. Chief Whip, MADC

SIAHA, 1 Thlarâh, 2021, Pakhynoh – Atanoh my dawh 11:30 Am liata Puhpa T. Seido, Deputy Chief Whip, MADC ta Mizoram Journalist Association (MJA), Siaha District zy ano office room, MADC Complex liata thopi dolâhna nata apakyhna a hnei.

 Puhpa T. Seido, Dy. Chief Whip,  Beirokhu Beita, I & PO with MJA, Siaha District

He thopi dolâhna liata Puhpa T. Seido chata bieriena chyupa hnei ta, MJA member zy hnoh ta anaohna hlâ ta, atanoh thopi dolâh awpa ta hruana liata avaw hlao theipazy hnoh ta alynabie a reih. Khazoh ngiachhiena nata Laki bia zawpizy saiheina nata khokheina vâta 11^th term MADC liata MDC vaw châ ta, ku ruapa ta vâro tlai vaw y hra sala, atanoh liata Deputy Chief Whip châna rônah kawpa a to theipa he â lyzie reih ta, Puhpa N. Zakhai, CEM nata a hrialâhpazy chô liata alynabie a reih.

 MDC a vaw châ tawhta a bia thâtih zy, MJA Siaha zy ta ama newspaper liata ama vaw papua tyh vâta nata â hawna zy hlao ama vaw patloh tyh vâta alynabie reih ta, MJA zy cha apa khichhai sa leipa ta Deputy Chief Whip office room liata thopi vaw tyh awpa ta a hrua ei.

Puhpa Seido chata MADC sawhkhâ nata Mizoram sawhkhâ mopanai, mopasâh tah leipa ta MADC liata hmo tlôpa nata Mararâh liata hmo tlôpazy cha MJA Siaha District zy ta zawpi lâ ta tiama kawpa ta phualuah lymâ awpa ta ahawna tao ta, MJA zy cha media siepahliepa ta ti nata râh châta raihriapa ama châ tah ta, Mararâh thâtih, Khizaw lâ ta phualuah tuh peimawh chaipa ama châna hawhta dao pathla leipa ta tiama papua lymâ awpa ta ahaw ta, ano chhao ta MJA Siaha zy nahta hrialâh phapa châ lymâ awpa a khozie reih ta, hrialâh phapa châ ly mâ awpa ta MJA Siaha District member zy hnoh ta ahawna a tao hra.

MJA Siaha District President Puhpa M. Baithai, Editor, ‘Chhim Aw’ ta Deputy Chief Whip thiehpa alykheina nata biereina chyupa hnei ta, Deputy Chief Whip he MDC, tovyuh phapa ato leipazy pabie nawpa portfolio hawhta pachâna y tyh ta, he he ado leipa ta, MADC sawhkhâ a siehaipa nata MADC nôpawpazy lâsie apado patlâ tuhpa portfolio peimawh kawpa a châ tah ta, Puhpa T. Seido liata hnabeiseihna lai kawpa a hnei zie a reih.

Puhpa B. Dawpho, Editor, the Times of Maraland, Puhpa Jeffrey J. Khara, Editor, Moonlight, Puhpa Lalramnghaka Chinzah, Editor, Kawl-eng, Puhpa Lalnunkima Pisa, Editor, HSV zy ta biereina chyupa hnei chyu hra ei ta, alykheina bie ama hlâ chyu hra.

Atanoh thopi dolâhna liata MJA Siaha District member zy pua pha kaw ei ta, Puhpa T. Seido ta apakyhna daihti chhâna lâ liata Siaha District MJA hnoh ta alynabie a reih. Puhpa T. Seido he Puhpa Beirokhu Beita, I &PO ta â tyudua khei.

ISSUED BY:-

Information & Publicity Department

Mara Autonomous District Council

Siaha.