PRESS RELEASE

NO.150/2022

SIAHA, 17 Phiata, 2022, Hriatuanoh  – Atanoh dawh 10:00 AM pa ta DFA Playground Meisatlâh liata Mara Students'Organisation, General Headquarters, Siaha pachhuahpanohpa Vyhphao Sports Meet 2022 Opening Programme cha Puhpa ST. Vanmalsawmliana, EM i/c Sports & Youth Service, MADC cha khichhai laipa (chief guest) châpa ta â hmâkhei ei.

Programme he St. Byhna Chozah, General Secretary, MSO Gen. HQ, Siaha ta chhihtha ta, St. LD. Vabeihruasa, Adviser, MSO Gen. HQ, Siaha ta devotion daihti â hmâh. 

St. NT. Vabeido nata Laihsa AZ. Zarzomawii zy ta  pahnie kawpa ta hlasapa ta zawpi ama palôhpahawh.

Laihsa Zinô Hlychho, Counsellor, MSACS, H&FW Deptt nata President, DFA Siaha zy ta short speech reina hnei ei ta, ECM HSS and GHSS nata Don Bosco HSS zy ta special items ama hnei hra.

Puhpa ST. Vanmalsawmliana, EM, MADC ta pasyunabie a reipa tlâhpi viapazy:

MSO General Headquarters, Siaha zy ta Education he All Round Development a châzie pahnopa ta, eima thyutliazy Moral nata Physical liata amâ develop thei nawpa ta Vyhphao Sports Meet nama pachhuahpanohpa he ei ly hmeiseih. He heta eima thyutliazy châta theilâ phapa a patheisa cheingei nahta ei hnabeiseih.

Aizawl liazy cha Sports he nietluana châta ngiapâtlâh a châzie pahno bâ ei ta, thata hmahla pathao bâ ei ta, hlaotlohna chhao ama padi laih ngâ bâ hra. ISL Players chhao ama hnei hôlô bâ hra. Mizoram Football Player Jerry nata Lianzuala zy cha kôkha ta 180 lakhs hlâta hluh via ama lapapua ha bâ. He Football amâ khaihpa tawhta sôh ama hmôpa tawh heta Olyu pha kawpa padua ei ta, football tawhta nietluana phapa ama hnei hapa a châ. Cha hawhpa duasu liata aduah hra awpa ta keimo Marasaw thyutliazy châta MADC ta Siaha liata Football Academy pha kawpa kô 13-15 likawh châta padua â chhuah hra. A eikha nawpa a châpa vâta seat 30 châ ngâlâh tao chypa châ ta, trail chhao hnei khai hapa a châ.

Cha ngâlâh châ leipa ta, thyutliazy châta Futsal ground tao nawpa châta Work order chhao papua hapa châ ta, atahmâ ta eima DFA Playground chhao Stadium pitlohpa a châ thei nawpa ta project chhao pangia hapa châ ta, hlaotlohna chhao a y cheingei nahta eimâ hnabeiseih. He dei châ leipa ta Sports liata hmahsiena a y via lymâ thei nawpa ta project hluhpi taopa châ ta, Khazoh ngiachhiena vâta eima hlaotloh nahta eima pangiasa hra.

Khazoh pahnona chô ta tiama kawpa ta namâ chuna papeimawhsapa ta achu lymâ u la, thokha cha IAS kaw châ awpa zy, MCS, etc. Bill Gate chhao a nô nata paw ta la Ukil rônahpa châ awpa ta Harvard University liata pakiasa ei ta, achu patlô leipa ta bâhsai ta, Microsoft hmô papua ta kô 31 a châ no ta Billionaire a vaw châ haw. Kha noh khata Billionaire hawti chaipa a châ. Bill Gate leipa chhao tiama ta hriapasana vâta khizaw liata hlaotlohpa hluhpi reih awpa ama y. Chavâta, hnabeidy leipa ta Khazohpa pahnona chôta tiama papuapa ta, hlaotloh cheingei awpa ta hmialâ eima tôh lymâ awpa he a peimawh ngaita kaw. Hmopha leipa tao bâhsaipa ta palôh hnei kawpa ta tiama nama papua lymâ awpa ta thyutlia atanoh he su liata avypazy ei châ haw ei.

Ei châ ly kaw ei. 

Puhpa ST. Vanmalsawmliana, EM,  MADC he Official lâ tawhta Puhpa JH. Beihnai, S&YO nata Puhpa T. Pabua, Cameraman zy ta ama chakaochahlâh.

Puhpa JH.Beihnai, S&YO ta thlahchhâna ta daihti a pachhâsa.

ISSUED BY:

Information & Publicity Department

Mara Autonomous District Council

Siaha.