PRESS RELEASE

NO.125/2022

SIAHA, 21 Thlarâh, 2022, Pakhynoh – Atamy dawh 10:00 Am kha ta Council Vaih Multipurpose Hall liata Siaha District Police zy ta “Sports Meet 2022” Opening Cememony programme a hmâh ei ta, he liata Puhpa ST. Vanmalsawmliana, EM i/c Sports, MADC zachhihpa cha Chief Guest châpa ta programme a hmâkhei ei.

Puhpa Tlualaisa Hlychho, Addl. SP, Siaha ta pahyna programme he chhihtha ta, Puhpa VL. Lura Hauzel, SP, Siaha ta introductory speech daihti hmâh ta, Laihsa H. Lalruarpari ta solo hlasana a hnei. Puhpa Robert S. Beihrosa, Dy. SP, Siaha ta Player zy bietaina pahneisa ta, Puhpa Zamzamung Vualnam, OC, Siaha ta a baokhâ.

Puhpa ST. Vanmalsawmliana, Chief Guest biereina chyupa daihti hmâh ta, atanoh daihti pha kawpa apietuhpa Khazohpa hnoh ta alynabie reih ta, MDC nata EM châna a patosa tuhpa a bia zawpi nata MADC nôpawpazy hnoh ta alynabie a reih. Atanoh liata khichhai laipa châ awpa ta ahrua tuhpa SP Siaha nata a hrialâhpazy, MADC tawhta officers avaw zipazy hnoh ta alynabie a reih.

“Eima râh liata thyutlia hluhpi talent pha kawpa ahneipa, pari theipa sei liata atâh haipazy pachha papua awpa ta MADC Sports & Youth Services Department he ta a theina papua lymâ awpa a chhuah ta, thlaheihpa tawhta kô 13-17 zy tawhta pathaopa ta Football Academy padua achhuahpa châ ta, Meisatlâh liata Futsal Ground tao achhuahpa chhao arâh thlie hapa châ ta, thla heihpa tawhta rai pathao achhuahpa a châ.”

“Thlathiehpa liata Football ataopasuana 1st Sixth Scheduled Premiere League a y awpa châ ta, Football apahâpazy châta, chance pha kawpa eimâ pie theina daihti hawhta pachâ pi ta, (MADC vyuhpa ta) he liata ahlao awpa ta apatohpatiana siekhei ngâhai hra.”

“Eima râh ta eima peimawh kawpa, eima hnei mâh leipa Meisatlâh Field Stadium, Multi Purpose Halls, Hockey Ground etc. zy Sports Department ta Project taopa ta eima buakhei lymâ hra. Hezy he a hlaotloh ti ta Mararâh châta hmahsiena a tlôkhei nahta eima hnabeiseih. Ti nata râh châta hmopha eima taopa maih liata miah support tah miah deichhy lymâ awpta ei châ haw ei.”

“Mararâh liata pahrâpazy pi he 56,000 rachhôh tlâ y pi ta, he hawhta maluh chyh kawpa eima châ no ta thata thi lymâ pi ta, eima thina chhâpa hluh chaipa cha pari theipa vâ pyly a châ. He hawhta eima sie lymâ khiah daihti rei leipa liata eima chi nata pho he eima chhâ thlâh ha aw tahpa chi â chhih ngaita kaw.”

“Eima râh liata pari theipa adyuhpa NGO zy he theina nata limit hnei pi ta, azo avâ ta full time ta ahria theipa cha nâmo Police nahzy he ma châ. Eima chi nata pho eimâ duapapua heih thei nawpa ta pari theipa adyuhna kyh liata atahmâ tahpa hlâta thapi phia viapa ta hmah lakhei awpa ta, he su liata avypa zydua nata eima hyutuhpazy, palôh hmeiseihpa ta cha hrua ei na ta, he Mararâh – chi nata pho aduapapua nawpa liata nâmo liata eimâ pahnieh tahpa he miah nama pahnopa awpa nata thapi miah phiakhei lymâ awpa ta ei châ haw ei” tahpa reih ta, alynabie reina chô ta biereina a pachhâsa.

Puhpa ST. Vanmalsawmliana, EM zachhihpa he MADC officials - Puhpa S. Chozah, EE (PHED), Puhpa JH. Beihnai, Sports & Youth Officer, Puhpa VT. Martin Beiduakhei, Asst. Sports & Youth Officer nata Puhpa T. Pabua, Cameraman zy ta ama zi.

ISSUED BY:

Information & Publicity Department

Mara Autonomous District Council

Siaha.