PRESS RELEASE 

NO.80/2022

SIAHA, 16 Khihpa, 2022, Pachynoh - Atanoh dawh 1:00 PM liata SDFA Cup 2022, Final Programme cha SDFA Playground, Meisatlâh liata ahmâpa châ ta, he liata Puhpa ST. Vanmalsawmliana, EM i/c Sports, MADC cha Chief Guest châpa ta Programme a hmâ khei ei.

Programme he Puhpa VT. Martin Vabeiduakhei, President, SDFA ta chhihtha ta, K. Machâ JH. Beihnai, Sports & Youth Officer, MADC ta devotion a hmâh. Puhpa K. Beirahmô nata Laihsa Emilia N. Byhnâdisô zy ta hlasapa ta zawpi palôhpahawh ei ta, Match Commissioner Puhpa KT. Neikha, Vice President, SDFA ta Report a pie. 

Puhpa H. Vabeitha, Chairman, Siaha District Sports Committee ta biereina chyupa hnei ta, 

Puhpa F. Vanlalmuanpuia,

Honorary Secretary, SDFA ta vote of thanks reina a hnei.

Chief Guest Puhpa Vanmalsawmliana hnoh ta Ls. Beireisi Sawthly, Exe. Member, SDFA ta SDFA vyuhpa ta hmosai piepa hlâna a hnei khai tawhta   Puhpa Vanmalsawmliana biereina hnei awpa ta hruapa châ ta, ary liata palâsapa he a bierei tlâhpi viapazy a châ:-

1. Ahmiatua chai ta atanoh Chief Guest châ awpa ta nâ khokhei tuhpa SDFA chhituhpazy hnoh ta alynabie ei reih. Eima Chairman nata SDFA chhihtuhpazy, MADC tawhta Officers nâ vaw zi tuhpazy, MSO Gen. HQ chhituhtuhpazy, Siaha District Sports Committee Chairman zy nata atanoh liata zawpi avypakhypazy - nama zydua hnoh ta alynabie reih na ta, atanoh he keima châta noh ngiatlâh a châpa, EM i/c Sports ei vaw châ tawhta Chief Guest ei 2 ei châ nawpa châ ta, ei ly ngaita. A eihpachaipa ta Playground thata eima vaw buakhei tyh hrapa su lia cheingei ta Chief Guest ei vaw châ theipa he ei ly via heihna a châ.

2. Siasi khih chyhsazy hnohta alynabie reih na ta, Thotlâh viapa tawhta khihpi viapa liata akhaih ei ta, chihuhna chhao hnei leipa ta District level liata ei 2 nawpa ta Final amâ ngia heih theipa he alykhei ei na ta, ei palaikhei hmeiseih ei. EM i/c Sports ei châna hawhta Daihti phapa a y ti ta Siasi khih he tly cheingei ei chhuah aw.

3. He Field (Meisatlâh Playground) tao thaoh no ta reipachhiena nata rairuna thata y ta, atanoh taihta my thei ma pi. He Field chhia awpa ta hmah miah lapa tuhpa nah, eima my lei awpazy cha:

(i). Puhpa N. Chakhai, PD, DRDA ta Job Card tawhta chhia miah a pathaopatôpa. 

(ii). Eima chhia thei nawpa ta NOC miah pie tuhpa Puhpa N. Pachhunga, Sr. RO, MADC.

(iii). Puhpa C. Malsawma, EE, UD&PA ta Field pangaina lâpi miah mo khei â chhuah.

(iv). Job Card tha hluhpi miah athyupa tuhpa Meisatlâh zawpi hnoh ta.

Mararâh nata Mara Thyutlia zy châta hmo phapa miah taopa tuhpazy he, thyutliapazy ta my khah ei suh y. 

4. Aizawl ei tlyna liata Mizoram Youth Commission Secretary ahmô na ta, ano ta na chho ta, Saudi Arabia liata motor driver chyhsa 2000 peimawh ei ta, Siaha District liata Driver zy châta daihti phapa (chance) a y hra awpa vâta Driver zy cha aw thei awpa ta eimâ vaw mâ hra awpa a châ aw. 

5. MADC Sports & Youth Services Department ta Skill Development châta IELTS achu awpa hmah la pi ta, aheihpa liata budget liata thyutlia zy châta sôh a hluh via eima so thei nawpa ta eima MADC nôpawzy hiah aw pi ta, rai hria awpa ta Foreign lâ taihta sietheina apahmô lymâ eimâ chhuah. 

6. MADC lia ngâlâh ta sawhkhâ rai miah â daih tiah lei awpa vâta nietluana hluhpi a ypa, keimo eima thaipa liata keimo tlai ta eimâ khaohrâ laih awpa he apeimawh ngâsâ.

7. Aizawl ei daohna liata Siaha liata Football Academy tao awpa ta hiah na ta, Siaha liata Football Coach manôh pa 3 vaw soh eimâ chhuah ama tah, ei ly kaw.

8. Eima CEM zachhihpa Puhpa H. Malvina ta atahmâ MADC Term liata Football Academy miah padua khei awpa a khohzie reih hra ta, eima MLA pa 2 nahzy chhao miah bao awpa ta ahaw aw pi ta, Puhpa KT. Rokhaw, ta MLA Fund tawhta miah bao â chhuah hra vâta Football Academy padua thei awpa hnaneiseihna laipa eima hnei.

9. Futsal Ground he atakô chhôh ta tao achhuah pi ta, Basketball Tournament he atakô chhôh ta tao eimâ chhuah hra.

10. Eima byuhchhiahpa nata khohpa maih tao chakhyh thlâh leipa ta eima Talent he eima pahno awpa apeimawh kaw - eima Talent liata pahâkhei tah, akih tlô eimâ chhuah awpa he apeimawh ngâsâ. Sports hmâpa ta eima râh hmah pasiesa awpa ta cha eima zydua hriaparaohna apeimawhpa a châ. Tiama kawpa ta eimâ dady chyu liata Talent eima hneipa liata achhuahna pi patloh chyu awpa ta akhokhei pi ta, eimâ hrua hmeiseih.

Puhpa Vanmalsawmliana he Puhpa JH. Beihnei, S&YO, Puhpa Beirôkhu Beitâ, I & PO, Dr. Beizakaw Vytu, VO, MADC zy ta ama chakao chahlâh.

He Final Programme ahmâ khai tawhta SDFA Cup 2022 Final angiapa Chhôchhôpaw FC nata Siasi FC zy ta akhaih pazao ei ta, Full time (90 mins) liata 1-1 ta a draw ei ta, daihti pie baichhipa Add. Time (30 mins) liata 3-2 ta Chhôchhôpaw FC ama tlô.

ISSUED BY:

Information & Publicity Department

Mara Autonomous District Council

Siaha.