PRESS RELEASE

NO.153/2022

SIAHA, 19 Phiata, 2022, Pakhynoh – Atamy dawh 7:00 AM pa ta Government Higher Secondary School Complex, Siaha liata Samagra Shiksha Siaha District nata District Taekwondo Association, Siaha pachhuahpanohpa Rani Laxmi Bai Raksha Prashikshan (Self Defence for Girls) Kick Off Programme cha Puhpa ST. Vanmalsawmliana, EM i/c Sports & Youth Service, MADC cha khichhai laipa (chief guest) châpa ta â hmâkhei ei.

Programme he Puhpa T. Chatlua, Addl. DPC, Samagra Shiksha ta a chhihtha. Satlia KT. Beimokhai, General Secretary, District Taekwondo Association, Siaha ta technical report piena hnei ta, Puhpa FC. Jacob Laldinthara, Taekwondo Instructor, District Taekwondo Association, Siaha nata Government Higher Secondary School students zy ta Taekwondo demonstration ama hnei.

Pihnô Nazee Khailah, Sr. EO ta short speech pha kawpa reina hnei ta, Puhpa Hilei Lakher, Dy. DPC, Samagra Shiksha ta vote of thanks reina a hnei.

Puhpa ST. Vanmalsawmliana, EM, MADC ta pasyunabie a reipa tlâhpi viapazy:

India sawhkhâ heta chanô he pachâ peimawh kaw ta, India sawhkhâ ta chanô mohôh nawpa ta dâh a taopa he chapaw hlâta hmah a hluh via khiahma tah thei awpa a châ. Chapaw nata chanô mohôh nawpa ta dâh a tao hleikhô ta, a noeihta ta chanô châta dâh nata phôh tao ta, India sawhkhâ heta chanô he a pachâ peimawh hmeiseih.

Chapaw thokha ta chanôzy chô liata ku pathla khohnazy hnei tyh ei ta, patupakhi khohnazy tah chapaw thokha ta la ama hnei tyh. Chavâta, chanô châ heta self defence he peimawh kaw ta, School bâh tawhta nama yna su pangaipa ta nama sie laih ngânozy ta chapaw ta ama cha vaw pabua pathlei khiah namâ vaih nawpa ta nama Pen, Pencil, Hanky, Necktie, etc hmâpazy ta namâ vaih nawpa dâhzy hmâh thai awpa he India sawhkhâ ta a khoh kawpa châ ta, chavâta, he programme chhao pachhuahpanohpa ta self defence châta Taekwondo zy chhao Samagra Shiksha Siaha District nata District Taekwondo Association, Siaha hriaparaohpa ta he hawhpa programme zy pachhuahpanoh ngâpa a vaw châ.

Ei lahpinô ta einâ vaw pahasai tawh heta ochhôh lia nata khôtho liata chhao chanô role peimawhzie he ei vaw pahnopasia via hei. Olyu mohôh kyh lia zy, sawnah mohôh kyh lia zy, chhôhkha pawhrâhpa mohôh kyh liazy chanô ochhôh liata nôhrâhnô sia nata sia lei likawh he â pahlie ngâsâpa a châ. Chhôhkha defence theituhpa châ awpa namâ chhuah chyu awpa he a za peimawh hmeiseih.

India dâh nata phôh liata chhao article hluhpi y ta, chanô mohôh nawpa dâh nata phôh he a vaw hluh kawpa a châ. Article 38 liata chanô nata chapaw eimâ equal-zie a sia kawpa ta miah a chho. Cha vâta, chapaw hlâta âhnai viapa hawhta a pachâ lei awpa a châ. Chapaw nata eimâ lyu thlâh hana tahpa he nama pahno awpa a byuh. Tahmâ chhochhi cha, Municipality lia chhao ta suthôh pachhaih ta sukha he chanô châta a vaw reserve hapa a vaw châ. Nama pahnopasia via nawpa ta cha VC zy atlyhna hnei tyh pi ta, chanô châta seat reserve pa a châ.

India sawhkhâ ta chanô mohôhna kyh liata cha pachâ peimawh kaw ei ta, anodeikua cha, atobina kyh lia heta sexy pâ tupa ta atobipazy deikua he cha nama pathleih awpa a peimawh kawpa a châ. Chapaw kiapâh liazy ta y dâh angiatu leipa ta y lei awpa. Chapaw hmiakô liata sexy pâ tupa ta atobinazy heta patupakhinazy he a vaw tlô tyhpa a vaw châ. Chavâta, eimâ tobinazy he zachhih kawpa ta eimâ tobi awpa a byuh ngaita kawpa a vaw châ.

India sawhkhâ ta dâh nata phôh hmâpa ta miah vaih thlâh na tah vâta khodâh hawhta y achhuahpa deikua cha hmophapa châ leipa ta, pathleih eimâ chhuah chyu awpa ta ei châ haw khoh kaw ei. Chyhsa hropa châta phaohri châ achhuah lei awpa namâ chhuah chyu awpa a châ.

A chhâ chaina liata cha India sawhkhâ ta right a cha piepa ei he nama hmâh thai kaw awpa he a peimawh kawpa a châ.

Ei châ ly kaw ei. 

Puhpa ST. Vanmalsawmliana, EM,  MADC he Official lâ tawhta Puhpa Pawsa Lava, AITO nata Puhpa T. Pabua, Cameraman zy ta ama chakaochahlâh.

ISSUED BY:

Information & Publicity Department

Mara Autonomous District Council

Siaha.