PRESS RELEASE

NO.159/2022

SIAHA, 26 Phiata, 2022, Pakhynoh - Atamy dawh 10:30 Am kha ta Siaha District Volleyball Association (SDVA) pachhuahpanohpa “Puhpa Lalthianghlima (L) Memorial Siaha District Open Volleyball Tournament” cha Siaha District Volleyball Court, New Siaha East-II liata pahyna programme ahmâpa châ ta, he liata Puhpa ST. Vanmalsawmliana, Hon’ble EM i/c Sports & Youth Services etc. MADC cha khichhai laipa châpa ta pahyna daihti a hmâkhei.

Pahyna programme he Puhpa CZ. Hluna, President, SDVA ta chhihtha ta, Puhpa PC. Lalhmingthanga, Sr. Vice President, SDVA ta daihti ziehpa a hmâh. Puhpa F. Remlalnghaka, Secretary, SDVA ta hmiapahnosa hnei ta, Puhpa Steve Azyu, Asst. Secretary, SDVA ta team memberzy bietaina (Odd taking) a pahneisa. He daihti liata minute sâ 1 chhôh achalihpa ta Puhpa Lalthianghlima (L) taokheina hneipa a châ hra.

Chief Guest Puhpa ST. Vanmalsawmliana, Hon’ble EM biereina daihti piepa liata a bierei tlâhpi viapazy ary liata palâsapa a châ:-

“Atanoh liata daihti phapa nâ pie tuhpa SDVA nôpawpazy hnoh ta alynabie reih na ta, players, organisers nata he liata zawpi avypa zydua châ naoh ei na ta, alynabie ei cha hlâ ei.”

“SDVA leaderzy hmahlana reithai tlâh a châ kaw; SDVA Volley Ball court zy nata fencing pha kawpazy hnei ei chi ta, sports discipline hropazy amopâ tlâh nama châ kaw. Leaderzy ahawna hawhta pavilion tao awpa chhao, MADC budget chyh kaw hrasa la, hmialâ daihti liata amokhei laih aw pi ta, SDVA leaderzy nahta Volleyball liata hmahsie nawpazy eima reih laih awpa a châ.”

“Eima Sports officer zy nata eima CEM zachhihpa Puhpa H. Malvina chhihthana ry liata MADC Sports Department ta hmah eima la tuachai awpa châta Football Academy achhuahpa châ ta, mylâ liata pahyna hnei achhuahpa a châ. He hawh ta Volleyball Academy zy chhao padua awpa ei khoh kaw; 12th Term MADC he ta Sports chyhsazy châta hmahlana lai kawpa hnei awpa khoh pi ta; hmahlana kyh liata thlahchhâna chô ta miah deichhy awpa ta ei châ haw ei”

“Mara thyutliazy ta saw hluhpi sa awapa ta pahruana lai kawpa ei tao khoh kaw.“

“Kô 2001 census liata Mararâh population 61,056 châ pi ta, kô 2011 census liata 56,574 eima châ; kô 10 chhôh liata maluh 4,482 eimâ pahlei. He he apihpa hlâta athipa eima hluh via tahma châ ta; apei hmeiseih.”

“Eima Mara chanô nahzy chi hropa ama hnei nahta keimo Mara Satlia nah pi ta eima palôh pasa ta, keimo hra cha avahpa tlâh châ awpa ta chhôhkha, khitlâh nata Awnanopa liata ahmâh hoh lei pi ta, chavâta ataopathi ei suh u.”

“Chi nata pho aduapapua awpa nata chi hropazy ta miah ama disao lei nawpa ta chyhsa eima hluh byuh ta, Mararâh pabie thei awpa ta saw hluhpi sa ei suh u. Cha cha ti nata râh kyh eima pachâzie palâsana a châ,”

Puhpa ST. Vanmasawmliana, EM zachhihpa he ta SDVA zy hnoh ta hmosai piepa (sôh, volleyball & net) a hlâ pâ hra.

SDVA’s “Puhpa Lalthianghlima (L) Memorial Siaha District Open Volleyball Tournament” lia he ta Teams chanô-11 nata chapaw-11 ahlao ei ta, târi 29.10.2022 pa ta akhawna tao awpa a châ.

SDFA President Puhpa VT. Martin Vabeiduakhei nata a hrialâhpazy ta pahyna programme he ama hmâkhei hra.

ISSUED BY:

Information & Publicity Department

Mara Autonomous District Council

Siaha.