PRESS RELEASE

NO.93/2024

CHAKHEI, 17 Phiata, 2024, Pobienoh - Atanoh dawh 11:30 AM kha ta Puhpa K. Hrahmô, MLA Cup 2024 Pahyna programme cha Siaha District Football Association (SDFA) Chakhei Zone Football Association Tlyliah, Chakheitlâh liata ahmâpa châ ta, he liata Puhpa S. Vabeihasa, Sports & Youth Officer (S&YO), MADC cha Chief Guest châta hruapa a châna hawhta programme a hmâkhei.

Puhpa S. Vabeihasa, S&YO chata biereina chyupa a hneipa liata atanoh liata daihti phapa a pietuhpa Khazohpa nata tovyuh phapa a pietuhpa SDFA & Chakhei Zone leader-zy hnoh ta alynabie reih ta, Chakhei khihsawzy ta pahnie kawpa ta Puhpa K. Hrahmo, MLA Cup 2024 amâ chhuanohna kyh liata a tlôtuhpa Chakhei khihsawzy hnoh ta alynabie a reih.

“Eima Players, leaders nata zawpi avypazy pahno awpa ei khoh kawpa cha, eima Mararâh chheipâh liata ahyzy ma y ei tahpa he a châ; keimo Marasawzy ta rairuna a vaw tyh ei si la, eimâ râhreih nawpa eima chheipâh liata ypazy mo pa ta keimo eima duahmo awpa he pahno â daih kaw bâ. Chi hro pho hropazy ry liata eimâ bôh/khu lei nawpa ta palô eima hnei awpa he a peimawh kawpa a châ.”

“Marasawzy eima chariah lai chaipa cha pari theipa a châpa ta ei pahno. Player nahzy pari theipa ataopa eima y khiah a râsai si la, sports ta â chhuahpa hmo sâkha a châ hrapa cha pari theipaw tawhta a boh awpa he a châ. Chavâta pari theipa sei liata eimâ tâh awpa châ vei.”

“Chipho zydua ta common language – reihkha hawhta eimâ hly theipa châ football châ ta, chipho zydua eimâ pôhkhana a châpa hawhta atanoh liata atanoh Puhpa K. Hrahmo MLA Cup 2924 he ta Mararâh liata eima Players nahzy apôhkhana nata kyhpachâna vaw sa papua sala tahpa he kho achhih kawpa a châ” tahpa reih ta, players nahzy cha apha kawpa ta akhaih chyu awpa ta khokheina a hlâ chyu ei.

Atanoh pahyna he Chairman Puhpa T. Vabeichhuakhu, Sr. Vice President, Siaha DFA chhihthana ry liata ahmâpa châ ta, Machâ T. Sazi, Secretary, ECM Chakhei Vaihpi ta 1 Kawrini Mozy 9:24-25 reipapuana nata reipakawhna hneipa ta pavaosana thlahchhâna a hnei.

Puhpa VT. Martin Vabeiduakhei, President, SDFA ta welcome speech reih ta, laihsa K. Zairi, Chakhei, laihsa Rovina Khaimeichho nata laihsa Jessica Ngody Hlychho, Mara Idol zy ta hlasana ama hnei. 

Chakhei Zone Football Association tawhta Puhpa C. Beirosia, Vice President ta biereina hnei ta, Puhpa B. Beichakao, AIFF Coach ‘D’ License Holder & ECM SDFA ta bietaina ‘oath taking’ a pahneisa.

Puhpa Khusa Khaila, Joint Secretary, Siaha DFA ta vote of thanks reih ta, he khai tawhta Kick off hneipa ta Tournament he pathaopa a châ.

Atakô MLA Cup liata Team 23 zy ta moh pangia ei ta, he hry liata khih/vaih nano nanopa 14 tawhta Team 18 châ ei ta, Chakhei khichhôh tawhta Team 5 amâ hlao thei hra. Siaha MLA Constituency tawhta Team 2 – College Vaih FC nata Siaha Vaihpi SUFC tawhta amâ hlao thei hra.

Puhpa S. Vabeihasa, S&YO he official lâ tawhta Puhpa Beirokhu Beita, I & PO, Puhpa VT. Martin Vabeiduakhei, ASPO, Puhpa Martin L. Hlychho, Cameraman, I & P Department zy ta ama chakaochahlâh.

ISSUED BY:

Information & Publicity Department

Mara Autonomous District Council

Siaha.