PRESS RELEASE

NO.06/2025

SIAHA, 17 Nawh, 2025, Chutynoh – Ministry of Youth Affairs & Sports, Government of India ry liata Nehru Yuva Kendra (NYK), Siaha zy ta atanoh my dawh 10:30 AM kha ta MADC Forest Hall liata ‘Road Safety Volunteers Orientation Training Programme’ pachhuapanoh ei ta, he daihti liata Puhpa S. Vabeihasa, Sports & Youth Officer (S&YO) Mara Autonomous District Council (MADC), Siaha cha khichhai laipa châpa ta programme a hmâkhei.

Puhpa S. Vabeihasa, Chief Guest chata biereina chyupa daihti hmâh ta, Siaha Traffic Police nahzy ta Siaha khichhôh Traffic ama mohôh phana kyh liata alynabie reih ta, hmahsie via awpa deikua ama hnei hra nahta a hnabeiseih zie a reih.

“Atanoh liata NYK Siaha siepahliepa ta Road Safety Training eima hnei theipa he aly’pa a châ hmeiseih. Training a vaw kiahpazy, he hawhta Training daihti phapa he pasô thai kaw u la, Training liata miah ama pachupa eimâ vao tiah leipa nata hnôh lâ liata eima pahno thai khao leipazy a y pathlei awpa vâta asaipa ta notepad ama cha raipa liata a roh pâ lymâ u la, hmialâ daihti liata nama hmâ phahnai awpa ta nata namâ chupazy thai cheingei namâ chhuah awpa a châ.”

“Siaha Traffic police nahzy duty adaih leina a vaw y ti ta, volunteer nahzy bao awpa ta amâ châ hawna daihti a vaw y aw; cha daihti liata atanoh liata namâ training-pa he a vaw phahnai awpa a châ. Training akiahpazy, athôhkheina hnei cheingei u la, buabâna y tlâ leipa ta a chhâna taihta Training kiah patlô chyu awpa ta khokheina ei cha hlâ ei” tahpa ta pasyuna nata khokheina bie pha kawpa a reih.

Programme he Ls. N. Rosaline i/c MTS, NYK, Siaha ta chhihtha ta, Ls. NT. Lalchhanhimi, Secretary i/c Art & Culture, MTP Branch: Thosai ta Zawsua 3:3-4 Khazohpa Biehrai Pathaihpa reina nata thlahchhâna hneipa ta programme a pavaosa. St. Beiradua Notlia ta thai kawpa ta mo pakha hlasana hnei ta, Puha A. Lalthianghlima, ASI, Officer in-charge Traffice Branch, Siaha ta Resource person châpa ta atanoh Training liata pachuna a hnei.

Atanoh liata Training pie awpa he sawhkhâ lâ tawhta manôh 25 atly awpa tahpa a châ tarawpa ta, Training a kiah khohpa ama hluh kaw vâta NYK Siaha ryhraona ta manôh 27 zy hnoh ta Training piepa châ ei ta, Training Certificate nata NYK T. Shirt rai pâ khaipa ama châ.

Puhpa S. Vabeihasa he officials tawhta Puhpa Beirôkhu Beitâ, I & PO, Puhpa VT. Martin Vabeiduakhei, Asst. Sports Promotion Officer, Puhpa T. Pabua, Cameraman zy ta ama chakaochahlâh.

ISSUED BY:

Information & Publicity Department

Mara Autonomous District Council

Siaha.