PRESS RELEASE

NO.101/2023

 SIAHA, 7 Thlazoh, 2023, Hriatuanoh – Atanoh my dawh 10:30 Am kha ta MADC School Education Department ry liata pachhaihpachhuahpa Primary School mohôhna office rai hriatuh awpazy Office thiehpa cha Puhpa S. Lalremthanga, Hon’ble EM i/c Primary School (PS) etc. ta a pahy.

He office thiehpa he, MADC ta SSA â vao daihti liata BRC Hall châta hmâ tyhpa su a châ. Rôh hnia pathi khaipa châ ta, flooring nata partition zy hleikhô ta Ceiling chhao taopa a châ. He liata Primary School Department mohôh tuh awpa officer nata staff zy amâ tyuh aw. Middle School mohôhtuh awpazy deikua School Education Department office parohpa, MADC Main Complex Ground Floor, a olopa liata amâ tyuh aw.

He atyuna apananopa he atahmâ 12th Term MADC liata School Education Department ry liata Primary School nata Middle School pachhaihpa a châ vâta a châ.

He daihti liata Puhpa S. Lalremthanga, EM zachhihpa chata Khazohpa Biehrai Pathaihpa –“Na ku ta hria’pa a hmôpa maih cha, na hria theipa hawhta hria teh” Biechhotuhpa 9:10 bie tawhta officer nata staff zy hnoh ta pasyunabie pha kawpa reih ta, chyhsa hluhpi my-zâ thla awpa liata rairuna amâ tyh hai no ta, MADC office liata ahriapazy deikua keimo mo pakha, chhôhkhazy hleikhô ta eima sanawhpazy taihta mohôh thei awpa ta hlao hneipa ta Khazohpa ta sawhkhâ rai pha kawpa miah pie ta, eima vâhnei ngâsâ tah ta, Khazohpa lâ ta alynabie khâ eima reih awpaa châ; Khazohpa bie liata miah a chhopa hawhta eima ku liata rai hria awpa a ypa maih cha zôpha thei chaina hawhta nata eima theina zydua papuapa ta eima hria awpa a châ tah ta, he office liata atyu theipa ta hnatlâ hri-iah pathaihpa eima hneino he ta Mararâh châta eima theina zydua eima papua awpa a châ” tahpa a reih.

“Biehrai liata ‘ahria leipa cha a nie chhao nie khah se’ tahpa bie hmô pi ta, sawhkhâ rai hria tah, hlao hnei tlô ta, office rai a hria phathi hoh leipa eima châ khiata la ativy leipa, leibâh ahneipa sawhkhâ rai a hriapa deita eima châ pathlei aw; eima rai liata ngâ achhih ei suh u.”

“Hriapasana kyh liata Marasawzy eimâ phahla kaw – daoh ataopazy chhao pi, mydi dawh 5:00 Am liata daoh apahypa ta, zâ rei a châna taihta apahypa cha Marasaw châ lei pi ta, chi hropazy ama châ – keimo eima thyu hlâ ta âmo cha vâro tlai amâ zuah hmâ ha tyh. Chavâta sawhkhâ rai ahriapa chhao, ahria leipa chhao – hriapasa tah, niebaw ahmô awpa eima châ zie Khazohpa bie tawhta eima pahnopa a châ. A bie hawhta ataopa nata ahriapazy cha Khazohpa ta byhnâ a pie tyh ei.”

“Hriapapuapa tawhta sôh avypa he Khazohpa khozie a châ tahpa pahnona chô ta sawhkhâ rai hria awpa ta eimâ pasyu.”

“MADC office liata raihriapa Grade-IV tawhta Level 13A taihta ahyzy ama rai hria pha ta, ama line nochâ liata kheihawh post lia rai soh sih la hmâtlâh a châ aw ei tahpa, Executive ta a pahno khai; chavâta hmâtlâh a châpa employee châ achhuah chyu awpa ta eimâ khokhei hmeiseih.”

“Eima raihriana liata Khazohpa ta miah a ypâ thlâhna tahpa pahnona chô ta rai hria si la, hmo pha leipa tao lei awpa châ ta, he office thiehpa liata miah a vaw daotuhpazy châta hnabeidyna ataotuhpa châ leipa ta byhnâ châ awpa ta apasyu pi ta, he office thiehpa liata Khazohpa chi-zana chô ta rai hria chyu si la, he building he Mara zawpi châta byhnâ vaw châ mawh sy” tahpa ta pasyuna nata khokheina bie a reih.

Puhpa S. Lalremthanga, Hon’ble EM chata atahmâ sawhkhâna thiehpa ama vaw siekhei tawhta Service Cell, Hindi Wing nata Primary School ry liata Officer nata Staff zy amâ tyuduana office taopathi khaipa châ ta, chahleikhô ta ano mohôhpa AH & Vety. Department ry liata Very. Farm liata Quarter sâ 3 chhao taopathieh hapa a châ tahpa reih ta, ary liata officer nata staff zy cha amâ phana nata ama theina hawhta Mararâh châta hria lymâ awpa ta pasyuna nata ahawna a tao hra.

Daihti chhâna liata office thiehpa pavaosana nata mo pakha ahlâ pathiehna châta zawpi thlahchhâna hneipa ta pahypa programme chyupa he khawpa a châ.

ISSUED BY:

Information & Publicity Department

Mara Autonomous District Council

Siaha.