PRESS RELEASE 

NO.147/2025

Siaha, Târi 12 Di, 2025(Chutynoh) - Atanoh dawh 1:00 PM liana khata Puhpa S. Lalremthanga, Hon'ble Deputy Chief Executive Member, MADC cha Chief Guest châpa ta, ahrialapazy; Puhpa T. Seido, EM(Sports) nata Puhpa Beihu Nohro, Deputy Chief Whip zy chhaota Puhpa K.Hrahmo, MLA Inter Village Football Tournament, 2025 cha SDFA Playground, Meisatlâh liata Final Match Programme ama hmâkhei.

Final Match Programme he Puhpa Khusa Khaila, Vice President, SDFA ta chhihtha ta, Puhpa K.Malsawma, Ex.President,FCCV ta Beihrai; I Kawrini Mozy 9:24 reina hneipa ta Abeipa hnohta apavaosana thlah a chhâ.

Puhpa S.Lalremthanga, Chief Guest ta biereina hneipa ta," Atanoh liata Inter Village Football Tournament pachhuahpanopa a châpa he aly hmeiseih na ta, eima MLA Puhpa K.Hrahmo hnohta chhao ei ly ngaita. Atanoh he eima SDFA Chhihthatuhapzy he reithai tlâh ama châ kaw, ama term chhôh heta Tournament nanonanopa eikhazie leichâ ma ama pachhuahpanoh theipa he ama hriapasazie nata eima thyutliapazy kyh ama pachâ tahpa apalâsa hmeiseih.

"MLA Inter Village Football Tournament liata Chief Guest awhpa ta eina hruapa eichi he a ly ngaita na ta, kei châta cha noh ngiatlah châ ngaitapa a châ. VC members zy nata he liata a khaih moh awpa ta âvypa zydua nama chô liata ei ly ngaita."

"Atahmâ tah SDFA term liata Chhihthatuhpazy he ama hria pha hmeiseih. Atakô chhôh liana heta tournament ei hluhpi ama pachhuahpanoh hapa ta pahno na ta, alypah a châ hmeiseih. Eima saw nah nata thyutliapazy châta ama hria pha kaw. Paritheipa liata amâ hniahni leina awpa ta Sports he apeimawh kawpa a châpa ta ei pahno hra. Paritheipa tawhta thytliapazy pachha papuana kyh lia chhao ta SDFA activities he a pha ngaita.SDFA he hmahsie lymâ sala, MADC chhaota namâ ngiahpazy khâ eima cha mokhei lymâ aw"

"Pala Biatuhpa Puhpa k Hrahmo MLA ta Inter Village Football Tournament a vaw sponsor pa he a ly âchhih ngaita. MLA panoh eima hneipa nah heta eima thyutlia nahzy he pachâ kaw ei ta; Cricket, Football nata Sports discipline nanonanopazy amâ taopasua n'awpa vaw sponsor tyh ei ta, he kyh liata hmahlana ama hnei hluhzie kei tlai chhaota ei pahno hra.

"A khaihna liata tlôh leina chhâpa he hiehâhna vâta a châ khoh kaw. Kheihawhpa Sports rai châ sala, pathi-ia pata a khaihpa a châ khiahta cha tlô thai awpa châ hrahro vei. A khaihna liata tlô awpa na khoh khiah nâ khailâhpazy hie pahâh la na tlô pâ ha aw. Chavâta, kheihawhpa a khaihna rai rai liata palôh pathaipa nata pachâna pasohpa ta eimâ khaih khia cha eima tlô lymâ aw. A khaihna liata pathichhie kawpa ta eima y khiah cha tlô pasáh thei aw mapi."

"Zâhniah tliata lia chhao kha Siaha Laihsa nata Satlia State level Boxing ataopasuana liata tlô ei ta, a ly âchhih hmeisei. Chavâta Sports deciplines to liata Chhihthatuhpazy tiama papua viapa ta hmahla via ula, eima thyutlia nahzy paritheihpa sei liata amâ tâh leina awpa ta hmahla kho ei su u."

"Tipa join VC Team nata Meistla join VC Team nahzy a khaih awpa châ ei chita, palôh pathai kawpa nata fair kawpa ta a khaih awpa ta bie chata khoh ei na ta, a Khaih mopha kawpa maniah nama pamosa awpa chhaota eima châ hnabeisei hra ei. Atanoh ta players nahzy paritheipa tawhta a sohsi ula, State, National nata International club nanonanopa liata a khaih thei awpa ta khokheina ei cha hlâ ei. Nama zydua hnohta alynabie ei cha hlâ ei." tahpa ta Chief Guest ta a biereipa a pachhâsa.

Inter Village Football Tournament 2025 liana heta VCs 32 tawhta Senior Team liata 32 Team nata Veteran Team (38years plus) liata 11 Team ama pua(amâ hlao). Senior Team liata Tipa join VC Team nata Meisatlâh join VC Team zy a khaih ei ta, Meisatlâh join VC Team ta 3-0 ta pahniena ama to. Veteran Team liata College join VC Team nata Siaha Vaihpi join VC Team zy a khaih ei ta, College Vaih join VC Team 2-1 ta pahniena ama to hra.

Puhpa James Bikao Fachhai,Joint Secretary, SDFA ta vote of thanks reina hneita, Laihsa Clara K Melita nata Puhpa Sachhua Kheimeichho, President Tipa Zone FA zy ta hla sapa ta Zawpi ama palôh pahawh.

Puhpa S.Lalremthanga, Dy CEM, MADC he Official tawhta Puhpa LM.Beingalai, I&PO nata Puhpa K.Nehemia, Cameraman zy ta ama zi.

ISSUED BY:

Information & Publicity Department 

Mara Autonomous District Council 

Siaha.