PRESS RELEASE

NO.136/2024

SIAHA, 11 Di, 2024, Pakhynoh - New Light School (NLS) Tipa zy ta kôchareih ama pachhuapanohpa ‘Winter Fest’ cha atakô châta zâhnia 10.12.2024 zâ liata zâ kha (1) châta pachhuapanoh heih ei ta, he daihti he Puhpa S. Lalremthanga, Hon’ble Dy. CEM, MADC ta Chief Guest châpa ta programme a hmâkhei ei.

Dy. CEM zachhihpa chata biereina chyupa daihti hmâh ta, achuhaipazy cha hmialâ daihti liata Awnanopa nata Sapa liata eima râh chhihthatuh awpazy ama châ vâta Teachers nata Nô & Paw zy hleikhô ta Awnanopa nata NGO zy chhao ta ama laiseih nawpa liata hmahlakhei ta, eima mohôh awpa a peimawh ngaita kaw tah ta, chahleikhô ta paritheipa tawhta amâ boh cheingei awpa a châ tahpa a reih.

He daihti liata Dy. CEM chata Siku hawti zy cha “Pari theipa tao aw vana” tahpa bie a taih ngâhpa maih amâ tyuna tawhta a duah chyu awpa ta pahaona nata ahawna tao ta, Siku hawtizy chata Dy. CEM biereipa eima zyh tlai aw tahpa pamosa nawpa ta amâ duah.

Dy. CEM chata student-zy cha ama pachutuhpazy nata Nô & Paw rei angiah lymâ awpa ta pasyu ei ta, ato liata Khazohpa hmia pasah awpa nata pabeisa chai ta, Khazohpa chi awpa ta pasyu ei ta, chahawhpa student-zy cha ama pitloh ti ta eima râh Politician rônahpa, Officers, Doctors nata chyhsa pitlohpa ama châ aw tahpa a reih.

“Hawti zy he hmialâ eima râh chhituh awpa ama châ vâta Teachers nata nôpaw zy ta ama sie nawpa lâpi dopa liata eima chhihtha awpa a châ, chataleipa ta la hmialâ daihti liata eima palôhrie patheituh awpa ama châ pathlei thei; chavâta atahmâ daihti he chhihtha ama pha no châ ta, tiama eima papua lymâ awpa a châ” tahpa a reih.

Puhpa S. Lalremthanga, Hon’ble Dy. CEM chata 12th Term MADC chhao ta eima râh liata paritheipa adyuhna kyh liata thata hmahlana a siekhei ngâhai tah ta, he kyh liata Khazohpa liata apahniehna chôta pahniena chhao eima to aw tah ta, NGOs, Awnanopa nata Mararâh liata apahrâpa zydua, hrialâh phapa châ awpa ta ahawna nata pahruana a tao.

NLS student-zy, he hawhpa programme a ypa he ama vâhnei kaw tah ta, Khazohpa pahnona chô ta apalysa awpa a châ tahpa reih ta, programme apachhuapanohtuhpa Teacherzy hnoh ta alynabie rei nawpa ta exam lia taopha a chhuah chyu awpa ta pasyuna bie pha kawpa reih ta, Winter Fest 2024 a vaw hlaopa zydua, aly kawpa ta hmâh chyu awpa ta khokheina bie a reih.

He programm he dawh 6:30 PM - 10:00 PM chhôh ta ahmâpa châ ta, Puhpa K. Chhuahlu, Chairman, School Management Committee ta devotion hmâh ta, Puhpa S. Vanlalhruaia, Principal, NLS ta welcome address reih ta, Class-V student zy ta pahyna hla ama sa. Puhpa C. Laldinsanga, Vice Principal, NLS ta lymâ (Award/Prize) raina chhihtha ta, Puhpa S. Lalremthanga, Hon’ble Dy. CEM nata Puhpa TT. Kholaw, Sr. EO (P/S) zy ta lymâ he ama rai. Host Miss R. Lalchhuansangi nata co-host Hannah Lyno, Class-IX, Gloria Rohlunpuii Class-IX student zy ta pahnie kawpa ta programme ama chhihtha.

NLS student-zy ta Special items chi nano nanopazy pamosa ei ta, talent ama hneipazy cha daosâh taopa liata ama palâsa chyu. Achuhaipazy ta kô chhâna liata apalypa-uasana nata talent ama hneipazy palâsa nawpa platform châ hleikhô ta, sapa nata thlahpa liata lâpi dopa amâ chhih thei nawpa ta pasyunabie pha kawpa reina nata nahthliena daihti châta he Winter Fest he pachhuapanohpa châ ta, student-zy ta amâ thôhkhei kaw tyhpa ta pahnopa a châ.

Kg.1 tawhta Class-X taih achu theina NLS, Tipa he kô 2001 lia paduapa châ ta, Mizoram pôpalôhpa lia chhao ta School phapa hry liata reipa nata a lâluahpa châ ta, tahmâno he Teaching staff 20 nata Non-teaching staff 3 zy ta school he mohôh ei ta, atakô Academic Session (2024-2025) liata student 400 tlai ama hnei.

Dy. CEM zachhihpa he Puhpa TT. Kholaw, Sr. EO (M/S), Puhpa HC. Lalropuia, DAO (Tipa), Puhpa BeiRôkhu Beitâ, I & PO, Laihsa Marina Vanlalruati Solo, PA to Dy. CEM, Puhpa K. Nehemia, Cameraman zy hleikhô ta hlasathaipa Puhpa John Beizachhi Phuto nata Laihsa Pricilla Nôtlia (Mara Idol 2024 Top-7) zy ta chakaochahlâh ei ta, Aizawl tawhta hrua-eihpa Young Fella, chhao â kaw hlao thei hra.

ISSUED BY:

Information & Publicity Department

Mara Autonomous District Council

Siaha.