PRESS RELEASE

NO.14/2025

 

SIAHA, 4 Hmypi, 2025, Hriaheinoh - Atamy dawh 7:30 AM kha ta Mara Autonomous District Council (MADC), Public Health Engineering (PHE) Department hmahlana ta CEM Bungalow, Siaha liata Mararâh chhôh liata peimawh kawpa odyh 95 atlypazy hnoh ta Puhpa S. Lalremthanga, Dy. CEM ta Plastic Tipâh (Plastic water storage tank) Litre 1,000 adaopa sâkha chyu raina a hnei.

 

He daihti he Puhpa S. Chozah, EE (PHE) Department, MADC ta chhihtha ta, Machâ C. Chehnei, Hon’ble Dy. Chairman, MADC ta pavaosana a hnei. Puhpa K. Chhuabei, EM i/c PHE Department nata Puhpa S. Lalremthanga, Hon’ble Dy. CEM zy ta biereina hnei ei ta, Puhpa John Beizachhi Phuto, Artiste ta hlasana a hnei.

 

He daihti liata MADC PHE Department mohôtuhpa Puhpa K. Chhuabei, Hon’ble EM ta biereina hnei tua ta, “MADC PHE Department eimâ hawna hawhta 15th Finance Commission Tied Grand sôh tawhta VC nahzy ta Tipâh he vaw rai tyh hra ei ta, chahawhta keimo PHED chhao ta atakô tawhta achyhchyhta ta eima budget sôh tawhta odyh 95 hnoh ta rai awpa ta rairu viapazy atlypa a châ” tah ta, “a heihpa liata rai via lymâ a chhuahpa a châ” tahpa a reih.

 

Puhpa S. Lalremthanga, Hon’ble Dy. CEM chata biereina chyupa daihti hmâh ta, “He hawh daihti ahmâ theipa aly â chhih hmeiseih, MADC Executive Committee ta zawpi châta eima theina rakha rai hria lymâ pi ta, atamy chhao a hmeiseihpa ta raihriana eima hmô theipa he aly’pa a châ kaw. He hawhta budget sôh chyh kawpa tawhta ryhraona pha kawpa a taotuhpa EM Puhpa K. Chhuabei nata EE Puhpa S. Chozah zy hnoh ta alynabie ei reih.”

 

“Khih he ti a pha lei khiatala palôtlâh kawpa ta pahrâ thei ma pi; hmialâ daihti liata khih thokha liata khichhai zy ta amâ rie khoh leina chhâpa cha ti rairuna vâta a châ; tahmâ daihti liata cha sawhkhâ phana zawhzi ta O to ta ti connection zy hnei khai theipa vaw châ laih bâ ta, he hawhta a châ no ta ti connection y hra sa la, ti sona a y lei khiah yzie y leipa a châ. Zawpi rairuna pathlâ awpa ta Budget chyhta tawhta MADC PHE Department ta he hawhta ti sona ama rai theipa he no-âh a chhihpa châ ta, Department ta ama rai tuana ei khana châpa ta ei pahno hra. Hmialâ eima sie lymâ nawpa lia chhao he hawhta ama tao pazao awpa he kho a chhih kawpa a châ.”

 

“12th Term MADC he ta eima theina hawhta zawpi nata a râh chakaona rai hria lymâ a chhuah pi ta; rai hria theina chyh kaw chy hrasala MADC he atahmâ duahmo liata a chhâ thlâh ha awpa ta Khazohpa ta miah tao aw vei - sapa nata thlahpa liata hmah eima sie lymâ thei nawpa ta District Council miah a piena hawhta biehneina lai viapa eima hnei thei nawpa ta zawpi chhao ta Khazohpa lâ thlahchhâpa ta eima hiah lymâ awpa a châ.”

 

“Atanoh liata Tipâh eima raipa adaotuhpazy ta a pha kawpa ta mohôh si la, pasô kawna chô ta mohôh pazi pha chaipazy châ achhuah chyu awpa ta atotuhpazy khokheina ei cha hlâ ei” tahpa reih ta, he khai tawhta Beneficiary zydua vyuhpa ta Zyhno bia tawhta a doa awpa hnoh ta Dy. CEM zachhihpa he ta Tipâh he raina a hnei pazi.

 

He daihti liata 12th term MADC liata Executive Members, Elected officer holders, MDCs nata Party lâ nôpawpazy hleikhô ta Officer thokhazy hruapa ama châ. Tipâh raipazy he, beneficiary-zy ta ama O chyu liata ama dao thei nawpa ta Biatuhpa MDC nata khitlâh nôpawpazy hmahla pazi awpa ta ahawna taopa a châ.

 

ISSUED BY:

Information & Publicity Department

Mara Autonomous District Council

Siaha.