PRESS RELEASE

NO.56/2025 

SIAHA, 13 Patô, 2025, Hriaheinoh – Atanoh dawh 12:00 PM khata Puhpa S. Lalremthanga, Hon'ble Deputy Chief Executive Member i/c Education (P/S), MADC ta I & PRO Hall, Siaha liata Siaha District Football Assiciation Silver Jubilee Celebration Cun General Body Meeting and Election 2025 liata khichhai laipa (chief guest) châpa programme â hmâkhei ei.

Programme he Puhpa VT. Martin Vabeiduakhei, President, SDFA ta chhihtha ta, Km. Reuben Hlychho, Executive Committee Member, SDFA ta Abeipa lâta pavaosana devotion daihti â hmâh.

Puhpa S. Lalremthanga, Dy. CEM, MADC chata, "Tiama kawpa ta Football akhaih u la, National nata International liata akhaih thei awpa châ namâ chhuah chyu awpa a châ. Football a thai hmeiseihpa nama châ khiahta la, nâmo ta namâ khaih n’awpa tlua ngâ kaw byuh vei. Football Club alâluah kawpazy ta ama Football Club liata akhaih awpa ta ama cha vaw hrua lymâ thlâh ha aw," a tah.

"Hmo a kheihawhpa rai tao u la, tao thlâhthli leipa ta palôh zydua pie khaipa ta hlaotloh cheingei achhuahpa ta nama tao lymâ awpa he a peimawh ngaita kaw. Football ma namâ khaih ma, Sports hropa a kheihawhpa rai rai, thyutlia nama thatlô chai daihti châ ta, tiama kawpa ta tao lymâ ta, a pahchaipa ta Football he international lia chhao Sports alâluahpa châ ta, Football akhaihpa nata pahâhpa châta cha tiama kawpa ta namâ khaih lymâ awpa a châ," Khichhai laipa ta a tah.

Dy. CEM chata, "Sôh nah thihzy a hluh y thei sala, Siku hawtizy Class 1 tawhta Sports, Football, etc tiama kawpa nata a pha kawpa ta training pie awpazy byuh â chhih kaw ta, anodeikua, sôh nah thih rairuna a y vâ heta khoh dâh hawhta hmahla thai’pa châ tyh leipa ta. Chyhsa hropa ta Siaha District thâchhie reih ei sala, keimo Siaha District liata ypa pi ta la, eima palôh pasa aw ta, chavâta, Siaha District moh papha awpa ta kao totie liata tiama eima papua lymâ awpa he a peimawh ngaita kaw," a tah.

"Mara Hlasa Py nata LAD, MADC zy ta pathaihna tlâhrai hria ei ta, aly’pa a châ hmeiseih. Atanoh he programne liata avaw hlaopa zydua pathaihna pachâ peimawh chyu awpa ta ei cha hrua chyu ei. Mawrâh sawhkhâ ry liata Urban Development & Poverty Alleviation (UD&PA) Department pachhuahpanohpa Mizoram Cleanliness Competition 2024 liata Siaha khihpi ta District Headquarters Category liata khihpi pathaih chaipa lymâ sâ 2-na dao pi ta, District Hospital Siaha ta kô 2023-2024, 2024-2025 chhôhta Kayakalp ataopasuana liata lymâ sâ 2-na nata Eco-Friendly 2023-2024 liata lymâ sâkhana la pâ heih pi ta, cha hleikhô ta, NQAS Certificate vaw la pâ heih pi ta, aly’pa châ hmeiseih ta, hâhkô cha pathaihna liata sâkhana châ eimâ chhuah chyu awpa a peimawh," Dy. CEM ta a tah.

Puhpa Martin V. Beiralai, Finance Secretary, SDFA ta Finance report pie ta, Puhpa F. Vanlalmuanpuia, Honorary Secretary, SDFA ta Secretary report a pie. 

Puhpa Beirahmo Syhly, Ex-President, SDFA, Adviser, SDFA nata Puhpa T. Samuela, Ex-Honorary Secretary, SDFA zy ta pasyuna bie pha kawpa reina ama hnei hra.

Laihsa HC. Teresa Ngianô, Mara Idol Season 7, 2024 nata Laihsa Rovina Khaimeichhô zy ta pahnie kawpa ta hlasapa ta zawpi ama palôhpahawh.

Dy. CEM he Official lâ tawhta Puhpa Pawsa Lava, AITO, MADC nata Puhpa K. Nehemia, Cameraman MADC zy ta ama chakaochahlâh.

Puhpa T. Vabeichhuakhu, Sr. Vice President, SDFA ta vote of thanks reina a hnei khai tawhta Abeipa thlahchhâna (The Lord's Prayer) reihparaohpa ta daihti pachhâsapa a châ.

ISSUED BY:

Information & Publicity Department

Mara Autonomous District Council

Siaha.