PRESS RELEASE

NO.141/2024

SIAHA, 14 Di, 2024, Pachynoh – Atanoh dawh 11:00 AM kha ta Farmers Training Centre, Mara Autonomous District Council (MADC), Siaha liata Central Institute of Hindi (CIH) Regional Centre: Shillong nata MADC School Education Department (P/S) apakaohpa ta pachhuapanohpa ‘Orientation Training for Hindi Teacher under MADC’ closing programme ahmâpa a châ. He daihti he Puhpa S. Lalremthanga, Hon’ble Dy. CEM i/c School Education (P/S) ta Chief Guest châpa ta programme a hmâkhei ei.

Dy. CEM zachhihpa chata biereina chyupa daihti hmâh ta, “Professor zy ta lâhla kawpa Shillong tawhta akhypa ta Training cha pie ei ta, aly’pâ a châ hmeiseih; nâmo chhao ta a thôhkheina nama hnei cheingei nahta hnabeiseih na ta, a heihpa liata he hlâta a pha viapa ta pachhuapanoh eimâ chhuah laih awpa a châ. Hindi Training theina su he Aizawl liata ngâlâh y ta, chavâta eima râh lia chhao ta, B.Ed taihta eima hnei thei mâh leipa chhao ta D.El.Ed level taih chhâ he a y thei hra nawpa ta hmahla awpa khoh pi ta, atanoh liata a khy thei hrapa Prof. Parth Sarthi Pandey, Regional Director, Shillong nahta chhao eima reikhoh hapa a châ. Atahmâ he, MADC ry liata Hindi chhao, Department pitlohpa lâ so a chhuahna y ta, Hindi Wing office zy chhao, ano-eih tlai ta room zy tao ha pi ta, hmahsiena kyh lia deikua taotia awpa hluhpi eima hnei chy.”

“India ti nata râh chyhsa eima châna hawhta Hindi he eima thai cheingei hra awpa châ ta, Hindi he eima râh liata promote via lymâ tah, a chu via lymâ awpa eima peimawh kawpa a châ” tahpa reih ta, “Training hnei daihti chhôh liata Department lâ tawhta aphahlana hluhpi a y aw, cha kyh zy liata pachâthaina ei châ haw ei; Training a vaw patlôpa zydua chô liata alynabie ei cha hlâ hmeiseih ei” tahpa reipa ta pasyunabie nata khokheina biepha kawpa a reih.

Programme he Puhpa David K. Azyu, A.H.E.O. ta chhihtha ta, Puhpa S. Lalremthanga, Hon’ble Dy. CEM, Chief Guest hleikhô ta Prof. Parth Sarthi Pandey, Regional Director, Shillong ta biereina chyupa daihti a hmâh hra. Puhpa TT. Kholaw, Sr. EO (P/S) ta vote of thanks reina daihti hmâh ta, programme he pachhâsapa a châ.

Orientation Training he târi 2 – 13 Di, 2024  chhôh ta hneipa châ ta, atanoh liata a khawna programme ahmâpa a châ. He daihti chhôh ta Prof. Parth Sarthi Pandey, Regional Director, Shillong, Dr. Mayank, Asst. Regional Director nata Dr. VR. Ralte, Hindi Education Officer zy ta resource person châpa ta training ama piepa a châ.

Training a patlôpa zydua he Hindi Teacher 68 châ ei ta, ama zydua hnoh ta Certificate rai khaipa ama châ.

ISSUED BY:

Information & Publicity Department

Mara Autonomous District Council

Siaha.