PRESS RELEASE

NO.131/2024

SIAHA, 04 Di, 2024, Pakhynoh – Zâhnia târi 03.12.2024 zâ dawh 06:30 PM khata MADC Golden Jubilee Hall, Siaha liata Mara Idol Season - 7, 2024 result phuahna, entertainment nite nata lymâ raina programme ahmâhpa châ ta, Puhpa S. Lalremthanga, Hon'ble Dy. CEM, MADC cha khichhai laipa (chief guest) châpa ta â hmâkhei ei.

Programme he Puhpa John Beizachhi Phuto, President, MHP HQ, Siaha ta chhihtha ta, Rev. B. Beilua ta Abeipa lâta pavaosana devotion daihti â hmâh. Estherine K. Khaingia ta programme a pahy.

Puhpa S. Lalremthanga, Hon'ble Dy. CEM chata, "Mara Hlasa Py liata hriapa zydua nata atazâ Mara Idol Season - 7 moh awpa ta avypa zydua, nama   chô liata alynabie ei reih. MHP ta Mara Idol Season 7 nama pachhuahpanoh thei heih vâta nama chô liata alynabie ei reih hmeiseih," a tah.

"Khazohpa ta Mara chi nah pho miah padua ta, eima palaiseihsa lymâ awpa he eima maophaohna a châ. Eima reih nata culture chhao hmah pasiesa ta, pabohsa ta, eima palaiseihsa lymâ awpa he a peimawh ngaita kaw," tahpa ta Dy. CEM ta a reih.

"Hlasa thaipa nata hla phithaipazy nata eima zydua ta chi nah pho eima pabohsa lymâ awpa he a peimawh ngaita kaw. Thyutliapazy ta drugs tao leipa u la, nama viasa ataopazy pachhapapua namâ chhuah lymâ awpa a châ," tahpa ta khichhai laipa ta a reih.

Dy. CEM chata, " Drugs he eima hmiahao lai chaipa châ ta, chavâta eimâ dyuh lymâ awpa a byuh. Drugs he eima chi nah pho paraotheituhpa châ ta, Mararâh kyh eima pachâ khiahta la, Mara satlia nata laihsazy ta drugs nama tao lei awpa a châ," a tah.

"MADC liata cha paritheipa ataopazy explanation call pi ta, ama pathleih thei n’awpa ta thata hmah eima la lymâ. Awnanopazy nata NGOs chhaota drugs adyuhna kyh liata hmahla lymâ hra ei ta, eima zydua ta eimâ dyuh chyu awpa a byuh," tahpa ta khichhai laipa ta a reih.

"Pachutuhpa thokhazy cha Agape Home liazy soh pi ta, Khazohpa ta chi nah pho miah padua ta, eima pabohsa vei khiahta la, eima leilô tlamaw aw. Chavâta, hmahla lymâ sih la, eima chi nah pho eima pabohsa lymâ awpa he a peimawh ngaita kaw," tahpa ta Dy. CEM ta a reih.

"Khazohpa ta talent cha pie ei ta, hla nama sa thaina talent hmâpa ta palôhru hmeiseih ta Khazoh hla nama sapazy he chyhsa palôh a hria hmeiseih. Khazohpa ta hlasa thaina talent a cha piepa ei hmâpa ta nietluana khi taihta thai namâ chhuah chyuh awpa a châ," tahpa ta khichhai laipa ta a reih.

"Eima population a chyh tu hapa vâta Hindi hla zy, Mongyuh hlazy thai namâ chhuah lymâ awpa byuh ta, namâ expose lymâ awpa he a peimawh ngaita kaw," tahpa ta Dy. CEM ta a reih.

"Hindi training programme ahmâna liata Jessica Ngôdy Hlychho hrua pi ta, Hindi hla sa ta, eimâ ly ngâsâ. State nata National lia taihta alâluah thei châ namâ chhuah lymâ awpa a châ," tahpa ta khichhai laipa ta a reih.

Mara Idol Season 7, 2024 Final Result:

Winner : HC. Teresa Ngianô, Meisavaih West, Siaha.

(Trophy nata Phusa Rs. 1,50,000).

1st Runner-up : FC. Siteite, Lialaipi

(Trophy nata Phusa Rs. 1,00,000).

2nd Runner-up : Dezili Bohia, Khôpai

(Trophy nata Phusa Rs. 70,000).

Pihnô P. Chaki, Chairman, Mara Idol Board ta pasyunabie pha kawpa reina a hnei hra.

Enez David, General Secretary, MHP HQ, Siaha ta report nata introduction piena a hnei.

A. Beilaipha, Mara Idol Season - 6 2nd runner up, Dorothy Lalruatfeli Vytuchho zy ta  pahnie kawpa ta hlasapa ta zawpi ama palôhpahawh. Âmo hleikhô ta, Mara Idol Season - 7 Top 10, Joseph Zawtha, Rovina Khaimeichhô, John Litas nata Jessica Ngody Hlychho, Mara Idol season -6 zy ta hlasapa ta zawpi ama palôhpahawh hra.

Dy. CEM he Official lâ tawhta Puhpa TT. Kholaw, Sr. EO (P/S), MADC, Puhpa Pawsa Lava, AITO, MADC nata Puhpa K. Nehemia, Cameraman zy ta ama chakaochahlâh.

ISSUED BY:

Information & Publicity Department

Mara Autonomous District Council

Siaha.