PRESS RELEASE

NO.116/2024

SIAHA, 22 Phiapi, 2024, Chutynoh – Atamy dawh 10:15 AM khata I & PRO Conference Hall, Council Vaih, Siaha liata Zohnahthlak Inpumkhatna Seminar "Niebaw ativyna" tahpa biepipa hmâpa ta Programme ahmâhpa châ ta, Puhpa S. Lalremthanga, Hon'ble Dy. CEM, MADC cha khichhai laipa (chief guest) châpa ta â hmâkhei ei.

Programme he Dr. Chawngkhuma Chawngthu, President, Chhimtuipui Academy of Letters (CAL) ta chhihtha ta, Rev. Vannunsanga, LIKBK, New Siaha ta Abeipa lâta pavaosana thlahchhâna a hnei.

Puhpa S. Lalremthanga, Hon'ble Dy. CEM, MADC chata, Atanoh he kei châta cha noh ngiatlâh châ kawpa châ ta, palôhlie chhao â chhih kaw, kô 1985, 1986 rachhôh Shillong liata châ ei chu no khata Mizo Students Union liata General Secretary châ na ta, he daihti liata Zohnahthlak apôhkhana chôchâhzy reih tyh pi ta, he daihti nota a y pha khoh leipa Zohnahthlak moh pachhienazie ta a ypazy tlua tyh pi ta, Mawrâh lâ eima kaw paphao tyh. Kha hmozy cha ei za pachâpa lie nahta zâhniata liata hmo tlôpa zy a za lyu thlâh haw. Atanoh programme lia heta Puhpa M. Laikaw, Hon'ble CEM, MADC he khichhai laipa châta hruapa châ ta, ano a hmâ leipa vâta, ano vyuhpa ta khichhai laipa châta ei vaw duah theipa he ei ly hmeiseih, tahpa ta a reih.

"Atanoh ta programme eimâ hmâh ngâhaipa he Zohnahthlak inpumkhatna seminar tahpa châ ta, zohnahthlak zy pi he a pôhkha tu ma pi tahpa a sia kawpa ta â lâ. Apôhkha kawpa châ haw sih la, apôhkha n’awpa seminar zy tao ngâ kaw byuh aw vei.  Apôhkha awpa heta kao nano kao nanopa lia heta eimâ pôhkha awpa he a byuh ngaita kaw. Zohnahthlak tahpa reikah he a thaipazy ta châ lâta thata roh ha ei ta, a chyunazie ta reih sala, Lushei eima tahpa zy, Lai, Mara, Hmar, Gangte, Kuki, Paite, a hluhpi y pi ta, cha zydua cha zohnahthlak châ pi ta, Khichha Myanmar liata ypazy ta Mawrâh he vaw vâ kaw ei ta, hlasapathaipa Vulmawi zy ta Zoram pel tahpa hla liatazy cha Mawrâh ama vâna hlazy sapa ta ama palôh â lie kaw tyh. Chata a châ nota, Aizawl amâ zâ ngia nahta chi hropa hmô ta hmô ei ta, khichha lâ tawhta a zupa tahpa ta ama reih tyh. He su hro lâta a ypa zohnahthlak a tahpa zydua ta cha Mawrâh ngâlâh ta he eima râh tahpa ta ama reih tyhpa cha a châ," tahpa ta khichhai laipa ta a reih.

"Chahawhta a châ nota, a chhôh liata a pahrâpazy pi heta za pachâpasia tua ei sih la, achuhaipazy, Officers zy, Politician, Mawrâh chhôh liata a pahrâpa zydua, amohpasia ei sih la, eimâ pôhkha ma tahpa he eimâ mohpasia chyu awpa he a peimawh ngaita kaw tahpa ta," Dy. CEM, MADC ta a reih.

"Eima dady chyu he za moh chyu sih la, a taopathi n’awpa ei hnei ma, kheihtama, apôhkha n’awpa heta hmah ei la hra aw tahpa ta eimâ chhuah chyu awpa he a peimawh ngaita kaw," tahpa ta khichhai laipa ta a reih.

"Unawh eima châna he my leipa ta, apôhkhana patypamâ theituhpa hmo liata la adyuhkhoh chyu sih la, apôhkhana eima hnei thei lymâ n’awpa ta hriaparaohna phapa hnei lymâ achhuah suh vy," tahpa ta Dy. CEM ta a reih.

Special guest Puhpa Lalmuanpuia Punte, Adviser to Chief Minister, Mizoram chhaota pasyunabie pha kawpa reina a hnei hra.

Laihsa Chhingpui Azyu ta pahnie kawpa ta hlasapa ta zawpi a palôhpahawh.

Puhpa K. Vanlalzama, Assistant Treasurer, MAL Joint HQ, Lunglei nata Puhpa KH Beithie, Joint Secretary, Chhimtuipui Academy of Letters (CAL) zy ta report piena ama hnei.

Puhpa S. Lalremthanga, Hon'ble Dy. CEM, MADC he Official lâ tawhta Puhpa TT. Kholaw, Sr. EO (P/S), MADC, Puhpa Pawsa Lava, AITO, MADC nata Puhpa K. Nehemia, Cameraman zy ta ama chakaochahlâh.

ISSUED BY:

Information & Publicity Department

Mara Autonomous District Council

Siaha.