PRESS RELEASE

NO.130/2024

SIAHA, 03 Di, 2024, Hriaheinoh – Atanoh dawh 11:00 AM khata ECM Higher Secondary School, Siaha liata Nehru Yuva Kendra : Siaha, District Youth Festival / Yuva Utsav programme he ECM Higher Secondary School, Siaha ta host ei ta, he Programme lia heta Puhpa S. Lalremthanga, Hon'ble Dy. CEM, MADC cha khichhai laipa (chief guest) châpa ta â hmâkhei ei.

Programme he Miss N. Rosaline, NYK, Siaha ta chhihtha ta, Rev. S. Beihruasa, Secy., ECM, KTP HQ, Siaha ta Abeipa lâta pavaosana devotion daihti â hmâh.

Pihnô Mercy Sellate i/c NYK Siaha, Mizoram ta introductory speech hnei ta, Miss Lalparthangi Zawtha, ECM Higher HSS ta welcome address a hnei.

Puhpa S. Lalremthanga, Hon'ble Dy. CEM chata, "Atanoh CEM, MADC vyuhpa ta District Youth Festival / Yuva Utsav programme peimawh kawpa liata khichhai laipa châ awpa ta hruapa ei châpa he a ly hmeiseih na ta, programme pachhuahpanohtuhpa zydua chô liata alynabie ei reih," a tah.

"Khazohpa ta khizaw liata hmo zydua he pha tah kawpa ta a taopa sai châ ta, keimo chhao pha a tah kawpa ta a taopa châ pi ta, chavâta eimâ mopahnai awpa châ vei," tahpa ta khichhai laipa ta a reih.

"Khazohpa ta chhâ hneipa ta miah tao chyu ta, Khazohpa ta talent miah piepa chyu he kheihta ta ei papôh lymâ thei aw, kheihta ma eima hmâh phahnai thei lymâ aw, kheihta ma hmah ei sie lymâ thei aw, ei pitloh lymâ thei aw tahpa he eimâ chhuah chyu awpa a peimawh," tahpa ta Dy. CEM ta a reih.

"Na taotuhpa Khazohpa he kheihta ma ei reithai palie thei aw tahpa he eima pachâ tyh awpa a byuh. Biehrai liata 'Na thyutliana nohzy liata, châ taotuhpa a thei thlâh ha mah y' a tahpa hawhta Khazohpa khoh dâh hawhta y lymâ awpa he a peimawh," tahpa ta khichhai laipa ta a reih.

"Mawrâh lia heta thytliapazy paritheipa a taopa nata paritheipa sei liata â tâhpa hluh kaw ei ta, hezy he kheihta ma eima pachhapapua thei aw tahpa ta hmahla lymâ peimawh kaw ta, eimâ dyuh lymâ awpa he a peimawh ngaita kaw," tahpa ta Dy. CEM ta a reih.

"Khizawh hmah kaw sie lymâ ta, thokha ta khizaw hmahsiena ama hmâh phahnai lymâ nota, thokha deikua cha a hmâh dâh thai leipa ta Smartphone liata hmo pha leipa sai buakheipazy ama y. Smartphone, etc khizaw hmahsiena ta â chakaihpa he hmâh phahnai ta, hmahsie a chhuah lymâ suh vy," tahpa ta khichhai laipa ta programme avaw hlaopa zydua hnohta pasyunabie pha kawpa a reih.

"Achuna kyh liana heta khizaw liata a kheihawhpa chyhsa rai eimâ zaoh (compete) thei khai. Chavâta, tiama kawpa ta châ achu lymâ ta Khazohpa lâta thlahchhâ ta thaina sona hiah lymâna chôta tiama kawpa ta châ achu lymâ awpa ta ei cha pasyu ei," tahpa ta Dy. CEM ta a reih.

"Keimo châ eimâ chu daihti liata pachutuhpa pakha ta hneipa ta achu pi ta, tiama kawpa nata palôh hnei kawpa ta achu pi ta, atahmâ cha pachutuhpa thai kawpa hluhpi hnei ei chi ta, nama tiama via lymâ awpa a byuh," tahpa ta khichhai laipa ta a reih.

Pihnô P. Chaki, President, MCHP HQ, Siaha chhaota pasyunabie pha kawpa reina a hnei hra.

Miss B. Priskily nata Anjelina, ECM Higher Secondary School zy ta   pahnie kawpa ta hlasapa ta zawpi ama palôhpahawh.

Puhpa S. Lalremthanga, Hon'ble Dy. CEM, MADC he Official lâ tawhta Puhpa TT. Kholaw, Sr. EO (P/S), MADC, Puhpa Pawsa Lava, AITO, MADC nata Puhpa Martin L Hlychho, Cameraman zy ta ama chakaochahlâh.

Puhpa Israel Chozah, General Secretary, MTP HQ, Siaha ta vote of thanks reina a hnei khai tawhta Session - 1 programme daihti pachhâsapa a châ.

ISSUED BY:

Information & Publicity Department

Mara Autonomous District Council

Siaha.