PRESS RELEASE

NO.97/2024

SIAHA, 29 Phiata, 2024, Hriaheinoh - Atanoh dawh 10:30 AM khata Laila Hall, College Vaih - 1, Siaha liata Maraland Primary Teachers' Association General Headquarters, Siaha pachhuahpanohpa 29th MPTA General Conference 2024 Programme liata Puhpa S. Lalremthanga, Hon'ble Deputy Chief Executive Member i/c Education (P/S), MADC cha khichhai laipa (chief guest) châpa ta â hmâkhei ei.

Puhpa HC. Rochungsanga, President, MPTA General Headquarters, Siaha ta programme chhihtha ta, Rev. AZ. Beirakaw, Executive Secretary, Social Mission & Development, ECM Assembly ta devotion daihti â hmâh.

Puhpa S. Lalremthanga, Hon'ble  CEM, MADC chata, hawti cha a sie n’awpa lâthlôh dopa pachu la, a kaw lai ti chhaota my aw vei tahpa bie he my leipa ta kyhpachâna palâsa lymâna chôta pachuna dopa ta nama pachu lymâ awpa he a peimawh ngaita kaw, tahpa ta a reih.

"Hawtizy he eima pakah ta eima pachupa nata chhoreipa ngâlâh he nahthliepa ta zyh leipa ei ta, eimâ pielyu dâhzy he miah moh ty ei ta, ama copy tyhpa a châ. Chavâta, atobi dâhzy chhao zachhih kawpa ta atobi awpa he a peimawh ngaita kaw," tahpa ta khichhai laipa ta a reih.

"Pachutuhpa he siku hawti ama future kaw paphatuh awpa nama châpa vâta, peimawh kaw ei chi ta, tiama kawpa ta Khazohpa khodâh hawhta siku hawti nama pachu awpa a byuh," tahpa ta Dy. CEM ta a reih.

"Siaha District liata pachutuhpa paritheipa taona chôta siku hawti châ pachupa ama y nata y lei tlua lymâpa châ ta, ama y khiah Agape Home, etc liata sopa ta pathleih awpa ta chance pie pi ta, a pathleih khoh leipa cha action la lymâpa a châ aw," tahpa ta Dy. CEM ta a reih.

"Siku hawti ei pachupa tawhta hmâtlâh châ awpa ta pakhazie ma ei papua, Officer, Pastor, Dawhty, etc ei papua thei tahpa he namâ chhuah chyu awpa ta cha hrua chyu ei na ta, Khazohpa khodâh hawhta pachu ta, tiama kawpa ta nama pachu lymâ awpa ta ei châ haw ei," tahpa ta khichhai laipa ta a reih.

"Siku hawtizy châ nama pachu hlâta thlahchhâna hnei tua tyh u la, nohtochhieh cha hawhta nama tao lymâ thei khiahta la, Khazohpa ta hlaotlohna a cha pie lymâ aw ei," tahpa ta Dy. CEM ta a reih.

"Pachutuhpa rai he Khazohpa chakaona rai na a châ e, tahpa he nama biepipa châta nama vaw hmâh chyu awpa ta ei châ haw ei," tahpa ta Dy.CEM ta a reih.

Laihsa Jessica Ngôdy Hlychho ta pahnie kawpa ta hlasapa ta zawpi a palôhpahawh.

Puhpa S. Lalremthanga, Dy. CEM, MADC he Official lâ tawhta Puhpa TT. Kholaw, Sr. EO (P/S), MADC, Puhpa Pawsa Lava, AITO, MADC, Puhpa T. Pabua, Cameraman nata Puhpa K. Nehemia, Cameraman zy ta ama chakaochahlâh.

ISSUED BY:

Information & Publicity Department

Mara Autonomous District Council

Siaha.